ကျာ်ထဝ်၊ ဂျာန်နဝါရဳ ၁၆
တွဵုရးမန် ပွိုၚ်ဍုၚ်ကျာ်ထဝ် ပ္ဍဲဍုၚ်တိၚ်သယျာတ် သၟတ်ဟွံအောန်နူ ၁၀ တၠ ဒးဒုၚ်ရပ်ဏာ သွက်ဒးယိုက်ဝန်ပၞာန်ရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
တုဲကၠုၚ်စနူဂျာန်နဝါရဳ ၇ ဒဵုကဵု ၁၄ တေံ ပ္ဍဲပွိုၚ်မွဲသတ္တဟဏံ ပ္ဍဲဍုၚ်တိၚ်သယျာတ် သၟတ်လုပ်အဝေါၚ်ယိုက်ဝန်ပၞာန်တံ ဒးဒုၚ်ရပ်ဏာလဝ် မဒှ်ရ။
သၟတ်နူကဵုအရာပ် ၁ ဍုၚ်တိၚ်သယျာတ် ထက်ယှိုၚ်ကိုကို၊ ရဲကွာန် သၠာတ်ဝါဒက် သဳတူထောန်တံ သီုဖအိုတ် သၟတ်ဟွံအောန်နူ ၁၀ တၠ ဒးဒုၚ်ရပ်ဏာရ။
အတိုင်ညးဒေသတံဟီုမ္ဂး သၟတ်နူလ္တူဍုၚ်တိၚ်သယျာတ်ကီု ကွာန်သၠာတ်ဝါဒက်ကဵုကွာန်ပိခွာၚ်ကီု ဒၞာဲဂၠံၚ်အာကၠုၚ်မံၚ်တံဂှ် စွံပွန်ပတဝ်ကဵုသၟတ်တံတုဲရပ်ဏာလဝ် မဒှ်ရ။
ရပ်ဏာသၟတ်တံတုဲ ပြဟ်ဟ်ဂှ် စွံလဝ်ပ္ဍဲဗ္ဒိုပ်ဗၠာဲသၟိၚ် တိၚ်သယျာတ် ဗွဲယာယဳမွဲခဏထိၚ်စွံလဝ်တုဲ ပလံၚ်ဗစိုပ်ဏာ ဇရေၚ်ဒပ်ပကောံကောန်ပၞာန်တၟိ ပ္ဍဲကဵုမတ်မလီု ဂွံတီရ။
ဗီုဏံကီုရ ပ္ဍဲကဵုကျာ်ထဝ်ကဵု ပွိုၚ်ဍုၚ်ၜဳလေၚ်ဂှ်လေဝ် ဒပ်ကဝ်မယှေန်ပၞာန် ဗက်ရပ်မံၚ်သၟတ်တံ သွက်ဂွံပလံၚ်ဘာပၞာန်ဂှ် သၟတ်ဗွဲမဂၠိုၚ်ဟွံဂံၚ်တိတ်မ္ၚး အောပ်မာတုဲဒးမံၚ်ဒၟံၚ်ရဂှ် ဂွံတီနူကဵုညးဒေသတံရ။
အတိုၚ်ဌာန်ပရိုၚ်သြၚ်လောန်တိုၚ် ပကောံဂွံလဝ်တၚ်နၚ်တံမ္ဂး ပ္ဍဲကဵုတွဵုရးမန် နူကဵုဘာသ္ဇိုၚ် တန်ဗတောန်ယိုက်ဝန်ပၞာန် စၟတ် ၁ ဒဵုစိုပ်စၟတ် ၂၁ ဏံ သၟတ်ကြပ် ၄၀၀၀ တၠ ဒးဒုၚ်ပကောံလဝ် ကောန်ပၞာန်တၟိတံ မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media