မတ်မလီု ၊ ဂျာန်နဝါရဳ ၁၆
အနှေန်ထဝ်ဂၠးကဝ်တိုန်မံၚ်တုဲ ထဝ်ဒကောင်မဳလေၚ်အပ္ဍဲဍုၚ်လျိုၚ်မွဲဒကေဝ် ၁၀၀ ကိုတ်ဒကေဝ်ပြၚ် တိုန်အာၜက်နူသၞောတ်ထ္ၜတ်ယျဂှ် ညးတၠကမၠောန်ထဝ်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
တန်တဴမံၚ်ကဵု အကာဲအရာပရေၚ်ဍုၚ်ကွာန်ဂၠးကဝ်တုဲ အနှေန်ထဝ်ဂၠးကဝ်တိုန်စှ်ေဟွံညိၚ်မံၚ်ဂှ် ပ္ဍဲဂျာန်နဝါရဳ ပထမသတ္တဟ လျိုၚ်ထဝ်မွဲအံၚ်သမ္ဂး ဒဝ်ဠာအမေရိကာန် ၜိုတ်ပွဳပွူ ၄၃၀၀ နွံတုဲ ပ္ဍဲဂျာန်နဝါရီ ၁၅ ဂှ် စိုပ်အာ ၄၆၀၀ ဒဝ်ဠာ ထပက်တိုန်အာရ။
ဟိုတ်နူ အနှေန်ထဝ်ဂၠးကဝ်တိုန်ဂှ်ရ ၚုဟ်ထဝ်အပ္ဍဲဍုၚ် နူပွဳပွူ ၉၁ ကိုတ်ဒကေဝ်ဂှ် ဒှ်အာဒဵုကဵု ၉၉ ကိုတ် မွဲအလန်ဓဝ် ထပက်တိုန်အာဟဂှ်ရ။
ယဝ်ရ ပရေၚ်ပၞာန်အမေရိကာန်ကဵု ပရေၚ်ဂၠးကဝ်တံဟွံညိၚ်ဝပ်မ္ဂး အနှေန်ထဝ် ဘိုအ်ဂွံထပ်သၠုၚ်တိုန်အာမာန်ပၠန်ရဂှ် တၠကမၠောန်ဆေင်ထဝ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“အနှေန်ထဝ်ဂှ် တန်တဴမံၚ်ကဵု အကာဲအရာ ပရေၚ်ပၞာန်အမေရိကာန်ရ။ အနှေန်ထဝ်ဂၠးကဝ်တိုန်အာသၠုၚ်အိုတ် ဒှ်အာ။ ၜက်အာသၞောတ်တုဲ တိုန်မံၚ်တိုန်ကၠုၚ်မံၚ်ဂှ်တှ်ေ အနှေန်ထဝ်အဏံ ထပ်သၠုၚ်တိုန်အာပၠန်။ ပရေၚ်ဂၠးကဝ် ဟွံညိၚ်ဝပ် ဆက်ဒှ်အာမံၚ်အတိုၚ်ဏံမ္ဂး အနှေန်ထဝ် ဘိုအ်ဂွံထပ်သၠုၚ်တိုန်အာပၠန်ဏောၚ်” သာ်ဝွံ သ္ဂးရ။
အတိုၚ်တၠုၚ်လအာ အကာဲအရာပရေၚ်ဍုၚ်ကွာန်ဂၠးကဝ်မ္ဂး အနှေန်ထဝ်ဘိုအ်ဂွံထပ်သၠုၚ်တိုန်အာနွံတုဲ ဟိုတ်နူ ပရေၚ်ဝေၚ်သြန်ဒဝ်ဠာအပ္ဍဲဍုၚ်ဂှ် ၚုဟ်ထဝ်အပ္ဍဲဍုၚ်ဘိုအ်ဂွံထပ်တိုန်အာရနွံ ညးဆက်ဟီုရ။
ဟိုတ်နူအနှေန်ထဝ်အပ္ဍဲဍုၚ် တိုန်မံၚ်ၜက်အာသၞောတ်ထ္ၜတ်ဂှ်ရ ဆေင်ထဝ်ဗွဲမဂၠိုၚ်မာတ်လဝ်အိုတ်တုဲ ဆေင်ထဝ်လ္ၚဵုလ္ၚဵုတံပၠန် ခြာလဝ်ကဵုကိုတ်တုဲ ကၠောန်မံၚ်ပရေၚ်သွံရာန်လေဝ်နွံမံၚ်ကီု ဂွံတီရ။
ဆဂး အနှေန်ထဝ်တိုန်မံၚ်ၜက်သၞောတ်ကီုလေဝ် နူကဵုကမ္မတဳခုတ်စၟတ်ၚုဟ်ထဝ် ကဝ်မယှေန်ပၞာန်တံ ပ္တန်လဝ်ၚုဟ်မးဂှ်တှ်ေ ထဝ်ဒကောၚ်မဳလေၚ်လျိုၚ်မွဲဒကေဝ် ၆၀ ကိုတ်ဒကေဝ် မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media