သိုဝ်လ်၊ ဂျာန်နဝါရဳ ၁၇
ပ္ဍဲသၞာံ ၂၀၂၄ တေံ ဆေင်စပ်ကဵုလလောၚ်တြးလဝ် ဥပဒေပရေၚ်အုပ်ဓုပ်ပၞာန် ဟွံအံၚ်ဇၞးတုဲ အမှုပတိတ်လိက်အမိၚ်ဗၠေတ်တ်၊ ပရေၚ်မာတ်လဒဵုဥပဒေ၊ စကာအဝဵုဟွံသေၚ်ကဵုဒၞာဲတံဂှ် ဖျေံလဝ်ထံၚ်ကဵု သမ္မတကိုဝ်ရဳယာတြေံ ယောန်သောတ်ယော ၅ သၞာံရ။
စပ်ကဵုအမှု ဂစာန်လွဳလဝ် သွက်ဂွံလလောၚ်တြးအမိၚ်ပရေၚ်အုပ်ဓုပ်ပၞာန် ၄ အမှုဂှ် ဖျေံဒုဟ်ဒဏ်အလန်ပထမ မဒှ်ရ။
အမိၚ်ပရေၚ်အုပ်ဓုပ်ပၞာန် လလောၚ်တြးလဝ်မွဲခဏဓဝ် လံကၠုၚ်ကီုလေဝ် အလုံဍုၚ်မွဲဒှ်အာရုသံၚ်အိုတ်တုဲ အမာတ်စၠတ်ဓဝ်တြေံတံ ကော်ဂွံကောံဓရီုဗွဲမပြဟ်ဂှ် ဖျေံသ္ဂုတ်သွာတ် တးပါဲမာန်အာ အမိၚ်သမ္မတတြံ ယောန်ရ။
ပွသမ္မတယောန်ကၠောန်လဝ်ဏံ ပြဿနာပရေၚ်ဍုၚ်ကွာန် က္တဵုဒှ်ကၠုၚ်အပ္ဍဲဍုၚ်ကီုလေဝ် ပ္ဍဲကဵုညးတေံ လကျှ်န်ဂွံဓဝ်သံဝေဂမွဲမွဲဗီု ဟွံဆဵုလဝ်ပုဟ် နာဲဗ္စာဟီုလဝ် ပ္ဍဲဂျာန်နဝါရဳ ၁၆ ရ။
ဒးဒုၚ်စောဲလဝ်အမှု စနူကဵုပရေၚ်စကာလဝ်အဝဵု ဒစေၚ်ဗၠေတ်ဒၞာဲ ဒဵုကဵုပရေၚ်ဖံက်ပကဝ်ပရေၚ်တံၚ်ဂြဲမာဲတံ ဂတနူဏံ ဗီုလဵုဆက်ဖျေံအာအမှုရောဟီုဂှ် အမိၚ်လၟုဟ်ဏံ ပ္ညုၚ်ထမံက်ထ္ၜးကဵုမံၚ် ပရေၚ်စဳရေၚ်သွက်ဒုဟ်ဒဏ်တံရ။
လ္တူညးတေံ ဒုဟ်တၚ်ကြံၚ်အိုတ် စောဲစပ်လဝ် ပရေၚ်ပုန်ပၠန်ဂတးဍုၚ်မဒှ်တုဲ သွက်ဂွံဖျေံအမိၚ်ကာဂစိုတ် သၟာဂဗုတ်အလဵုအသဳတံ အာတ်မိက်လဝ် မဒှ်ရ။
အခိၚ်ပတိုန်ရုၚ် စၟဳစၟတ်မံၚ်သမ္မတတြေံယောန် ဂျာန်ဝါရဳ ၁၆ ဂှ် ညးထံက်ဂလာန်ညးတေံ ၜိုတ် ၁၀၀ တံ ကောံစိုပ်ဗဵုမံၚ် ပရေၚ်ဗလးပရိုၚ်တိုက်ရိုက် ပ္ဍဲဂတမုက်ဒ္ၚေါဝ် TV မ္ၚးရုၚ်သၞောဝ်ဓဝ်ရ။
အခိၚ်ဂစာန်ရပ်မံၚ်ဂှ် ယောန်စကာသုၚ်စောဲ ဒပ်ဂီုကၠီုသမ္မတတုဲ ဟိုတ်နူဒုၚ်တဝ်စၞေဟ်ဂှ် ဒုဟ်နွံမံၚ် စၟဳစၟတ်ဆဵုညာတ်လဝ်ရ။
တင်လလောၚ်ပရေၚ်အုပ်ဓုပ်ပၞာန်ဂှ် သ္ကိုပ်ဝန်ဇၞော်ကဵု ဝန်ဇၞော်ပရေၚ်စဵုဒၞာတံ ညံၚ်ကဵုဒုၚ်တဲသ္ပလဝ်ဒတန် လိက်တံဏံ ညံၚ်ဂွံထေင်လဝ်ဍာံဍာံ ညးတံဖန်ဖက်ကၠောန်လဝ်ရောၚ် သၟာဂဗုတ်အလဵုအသဳတံ သ္ဂးရ။
လ္တူသမ္မတတြေံ ဖျေံကဵုထံၚ် ၁၀ သၞာံညိ သၟာဂဗုတ်အလဵုအသဳတံ အာတ်မိက်ပ္ဍဲအခိၚ်ဖျေံအမိၚ် ဂျာန်နဝါရဳ ၁၆ တေံရ။
သွက်ဒုဟ်ဒဏ်ဖျေံလဝ်လၟုဟ်ဏံ သီုၜါလပါ် သွက်ဂွံတိုန်ခၠေဝ်သှ်အာ သှ်ေမံၚ်အခိၚ် ၜိုတ် ၁၀ တ္ၚဲဏီရောၚ်။
အမှုစောဲစပ်လဝ်လ္တူညးတေံသီုဖအိုတ်ဂှ် သမ္မတတြေံတးပါဲလဝ်တုဲ လလောၚ်တြးအကာဲအရာကာမံက်တိုန်ဟီုဂှ် သွက်ဂွံဒးအာချပ်စကဵု ဂကောံအလဵုအသဳတံ ဟွံမွဲပုဟ် ဟီုလဝ်ရ။
Ref:BBC