ကိဗ်၊ ဂျာန်နဝါရဳ ၁၆
ဟိုတ်နူရတ်ယှာ ဗတိုက်ဂှ် ညးဒေသဂၠိုၚ်ကဵုလ္ၚီ ပၟတ်ဓါတ်လလဳပိုတ်အာတုဲ ပ္ဍဲယူခရုၚ် စပ်ကဵုပရေၚ်ဓါတ်လလဳ အကာဲအရာကာမံက်တိုန်ဒှ်မံၚ် အလဵုအသဳယူခရုၚ် လလောၚ်တြးရ။
အတိုၚ်ဗျူဟာ လဝေၚ်ပၞာန်ရတ်ယှာတံ မွဲသ္ကုတ်မွဲသ္ကူ ကေတ်အခေါၚ်အရာကဵု အခိၚ်ရာသဳၜိုဟ်ဂံက်တုဲ ဗတိုက်မံၚ်ဒၞာဲသ္ဇိုၚ်ဓါတ်လလဳ ယူခရုၚ်တံရောၚ် အလဵုအသဳကိဗ် ဟီုရ။
ပ္ဍဲယူခရုၚ် အခိၚ်ဂံက်စိုပ်အာ ဗ္ၜတ်နုက် ၂၀ ဒဳကရဳဂှ် ဟိုတ်နူဇြဟတ်ဓါတ်လလဳပိုတ်အာတုဲ ညးဒေသလၟိဟ်ကဵုလ္ၚီတံ စကာစက်ကဵုဓါတ်ကတဴတံဟွံမာန် ဒှ်မံၚ်ရ။
ပေါဲပၞာန်ပွိုၚ်ပန်သၞာံ ဒှ်မံၚ်ကဵုရတ်ယှာ ညံၚ်ဂွံဒေါအ်အာ သၠုၚ်အသိၚ်တုဲ အဃောဂစာန်ကေတ်မံၚ် ပရေၚ်ၜိုဟ်လလမ် သမ္မတအမေရိကာန် ဟီုမံၚ်ဂှ် ပ္ဍဲကဵုယူခရုၚ် စပ်ကဵုပရေၚ်ဓါတ်လလဳ လလောၚ်တြး အကာဲအရာကာမံက်တိုန် မဒှ်ရ။
ယူခရုၚ်တံ မိက်ဂွံကေတ်တၚ်တုပ်စိုတ် ပရေၚ်ၜိုဟ်လလမ် အောန်မံၚ်နူကဵု သမ္မတ ဗလာဒဳမာ ပူတေၚ်ဏီ ထရ ဟီုလဝ် ပ္ဍဲဂျာန်နဝါရီ ၁၄ ဂှ်ရ။
ၜိုန်ရကၠောန်မံၚ်ပေါဲသဳကၠဳပရေၚ်ၜိုဟ်လလမ်ကီုလေဝ် မုဟိုတ်ပေါဲပၞာန်ဟွံဒေါအ်ရော သၟာန်ဏာဂှ် ဟိုတ်နူ ဇဳလန်သကဳရ ပၞာန်ဒှ်မံၚ် ထရ ဟီုရ။
ပ္ဍဲသတ္တဟဂတဏံ ဍုၚ်သိပ်ဇြာလန် ကၠောန်အာ ဖိုရမ်ပရေၚ်ပိုန်ဒြပ်ဂၠးကဝ်ဏံ က္ဍိုပ်သ္ကိုပ်သီုပိတၠ တိုန်စိုပ်မာန်ရောၚ် စၟဳရ။
ပ္ဍဲကဵုဍုၚ်ဇၞော်ယူခရုၚ် သ္ၚိဌာန်ၜိုတ် ၇၀% ဇြဟတ်ပၟတ်ဓါတ်လလဳ ပိုတ်မံၚ် ညးတာလျိုၚ်တံ ဟီုရ။
နူကဵုရတ်ယှာ သၠုၚ်အသိၚ်ဗတိုက်အာ စမြိၚ်ဒၞာဲပတိတ်ဓါတ်လလဳ နကဵုကမ်သၠောဝ်၊ ဒရုၚ်တံတုဲ ဆဵုဂဗ တင်အခက်အခုဲဗီုဏံ မဒှ်ရ။
အခိၚ်ဥတုရာသဳပရေအ်မံၚ်ဏံ သွက်ဂွံကလေၚ်ပလေဝ်ပလေတ်အာ ဒၞာဲလီုလာ် ဟိုတ်နူရတ်ယှာဗတိုက်လဝ်တံဂှ် ပံက်လဝ်ဂကောံကာမံက်တိုန် ဇဳလန်သကဳ ဟီုလဝ်ရ။
Ref:BBC