ဗေဂျေင်၊ ဂျာန်နဝါရဳ ၂၀
ပ္ဍဲသၞာံ ၂၀၂၅ ကေတ်ကၠုၚ်လဝ်အရေဝ် ပူဂဵုစလာဘ်ဗဇဴ ကြပ်မွဲပြကောတိကိုတ်နွံမံၚ် ဂကောံဗတိုက်သရိုဟ် စလာဘ်ဗဇဴဍုၚ်ကြုက် ဟီုရ။
အတိုၚ်တင်လလောၚ်တြး ကမ္မတဳဗဟဵု ဆေင်စပ်ကဵုအရာထိင်ဒဝ်စေဝ်ပၞောန် (CCDI) မ္ဂး ပ္ဍဲသၞာံအာဂှ် ကေတ်လဝ်အရေဝ်မၞိဟ် ၉၈၃၀၀ တၠ နကဵုအမှုအရာ ဒုဟ်ဂကူစုၚ်ၚ်တံရ။
ကၠာဟွံစိုပ်သၞာံတေံပၠန် စပ်ကဵုအမှု ဒဂေတ်ပဋိပတ်လီုလာ် ကေတ်လဝ်အရေဝ် ၈၈၉၀၀၀ တၠနွံတုဲ ပ္ဍဲသၞာံ ၂၀၂၅ ပၠန် ညးဒးဒုၚ်ကေတ်အရေဝ် ၁၀ ဒသမ ၆% ပဵုဂၠိုၚ်တိုန်မံၚ် ပ္ဍဲတင်လလောၚ်တြးဂှ် ချူလဝ်ရ။
ပြဟ်ဟ်ဏံ စၟဳစၟတ်မံၚ် ဝန်ဇၞော်အဆံၚ်တွဵုရးကေုာံ ညးတာလျိုၚ်အဆံၚ်သၠုၚ် ၁၁၅ တၠဖိုအ်ဏီ၊ အပ္ဍဲဏံ ဖျေံလဝ်ဒုဟ်ဒဏ် ၆၉ တၠ တုဲအာ CCDI ဟီုရ။
ပ္ဍဲကဵုစရၚ် ပရေၚ်ကေတ်လဝ်အရေဝ်လက်ကြဴအိုတ်ဏံမ္ဂး ညးတာလျိုၚ်ဇၞော်ဇၞော်တံ၊ ညးတာလျိုၚ်တြေံ တက္ကသိုလ်တံ၊ ညးဇၞော် နူကဵုဂကောံအလဵုအသဳတံ ပါလုပ်ရ။
ပ္ဍဲကဵုပရေၚ်ကေတ်အရေဝ် စလာဘ်ဗဇဴဏံ ညးဂြိပ်ပါဲဒဴအာဍုၚ်မ္ၚးတံ၊ ညးတာလျိုၚ်အဆံၚ်သၟဝ်တံလေဝ် ပါလုပ်ကီု ဂကောံဗတိုက်သရိုဟ် စလာဘ်ဗဇဴဍုၚ်ကြုက် ဟီုရ။
ပ္ဍဲဂျာန်နဝါရဳ ၁၂ အတိုၚ်ဂလာန် သမ္မတကြုက် ယှဳကျေအ်ဖျေင်ဟီုလဝ်မ္ဂး လၟေၚ်ပရေၚ်ကမၠောန် ဗတိုက်သရိုဟ် စလာဘ်ဗဇဴ ဆက်နွံမံၚ်တုဲ ယှုက်ထုဲမံၚ်ဏီရောၚ် သ္ဂးရ။
ပရေၚ်ဗတိုက်သရိုဟ် စလာဘ်ဗဇဴတံဂှ် ဒှ်မံၚ်ပရေၚ်တာဒၞာ သွက်ဍုၚ်နိဂီုကဵု ဗော်တုဲ ပေါဲဗတိုက် ပရေၚ်သရိုဟ်ဗတိုက် စလာဘ်ဗဇဴဍုၚ်ဂှ် သွက်ပိုဲတံ ဒုၚ်ကဵုအာပယျဟွံဂွံပုဟ် ညးဟီုရ။
နူကဵုဗော်ကောန်မျူနေတ်ဂွံလဝ်အဝဵု နုက်ပတိတ်ထောံ ညးတာလျိုၚ်ပၞာန် အဆံၚ်သၠုၚ် ၂ တၠတုဲ ပ္ဍဲဂိတုအံက်တဝ်ပါဂှ် ကေတ်လဝ်အရေဝ် နကဵုဥပဒေဆေင်စပ်ကဵု ပရေၚ်ပၞာန်ရ။
စပ်ကဵုပရေင်ကေတ်လဝ်ကဵုလဝ် လာဘ်ဗဇဴတုဲ စၟဳစၟတ်လဝ်မၞိဟ် ၃၃၀၀၀ တုဲ အပ္ဍဲဏံ သၠောဲပအပ်ကဵုလဝ် ဇရေၚ်သၟာဂဗုတ်တံ မၞိဟ် ၄၃၀၆ တၠ ဂွံတီရ။
Ref:CAN