ကအ်ကြိက်၊ ဂျာန်နဝါရဳ ၂၀
တွဵုရးကရေၚ် ပ္ဍဲပွိုၚ်ဍုၚ်ကအ်ကြိက် သွက်ဂွံကၠောန်အာပေါဲရုဲမာဲနွံဂှ် အကြာဒပ်ပၞာန်ဗမာကဵု ဂကောံဇြဟတ်ပၠန်ဂတးတံ ပ္ဍဲမွဲၜါတ္ၚဲတံဏံပေါဲဗတိုက်သ္ကာတ်ဒှ်မံၚ်တုဲ နူကဵုဒပ်ပၞာန်ဗမာကြဳဗုၚ်ပန်ဖျေံမံၚ်ကဵု ၜင်ကျာတံနွံမံၚ်ရဂှ် တမ်ရိုဟ်ကၞက်ပရိုင်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
စနူကဵုဂျာန်နဝါရဳ ၁၆ ကရောၚ်ပၞာန်ကဝ်မယှေန်ပၞာန်ဗမာ ထပက်ကၠုၚ်လပါ်ဒၞာဲတာဲဗိုလ်သၟဝ်ကဵု ကွာန်မိဖာလေဝ် ဂၠံၚ်တြေံ လ္တူဒဵုဒဝ်န သ္ကုတ်သၟဝ်ကျာဍုၚ်ကအ်ကြိက်ဂှ် ဒှ်ပေါဲဗတိုက်ကဵုဂကောံဇြဟတ်ပၠန်ဂတးတံရ။
ပ္ဍဲပေါဲဗတိုက်တံဏံ ဟိုတ်နူဒပ်ပၞာန်ဗမာဒးအာဝပ်ဂၠိုၚ်တုဲ ပ္ဍဲဂျာန်နဝါရဳ ၁၇ ဂှ် ၜင်ကျာဒပ်ပၞာန်ဗမာ ကၠုၚ်ကြဳဖျေံဗုၚ် ဒၞာဲကဵုပွဳပွူကွာန်မိဖာလေဝ် ဂွံတီရ။
သွက်ဂွံကလေၚ်ထိင်ကေတ်အာ အလုံဒေသသ္ကုတ်သၟဝ်ကျာ သီုဖအိုတ်မာန်ဂှ် စနူကဵုဂိတုအံက်တဝ်ပါတေံရ ကရောၚ်ပၞာန်ဒပ်ပၞာန်ဗမာထပက်မံၚ်တုဲ ဒဵုကဵုလၟုဟ်ဂျာန်နဝါရဳ သတ္တဟတတိယ ဏံ ဆက်ဒှ်မံၚ်ပေါဲဗတိုက်ကဵု ဂကောံဇြဟတ်ပၠန်ဂတး KNLA သ္ကိုပ်သ္ကတံ ဖိုအ်ရ။
တုဲပၠန် ဗ္ဒိုပ်ဗျူဟာပၞာန်ဗမာဂ္ဇအ်လဝ် ပ္ဍဲဍုၚ်ကြုၚ်ဒဵုဂှ် ဂကောံဇြဟတ်ပၠန်ဂတးတံ ဗတိုက်မံၚ်ကဵုဒရုၚ်ကီုတုဲ နူကဵုဒပ်ကဝ်မယှေန်ပၞာန်တံလေဝ် ကလေၚ်ပၠန်ကဵုမံၚ်လွဟ်ဇၞော်ပန်စုတ်လဝ် အပ္ဍဲကွာန်ဂမၠိုၚ်တံရဂှ် ဂွံတီနူညးဒေသတံရ။
အခိၚ်ပၞာန်ၜါလပါ်ကြံၚ်မ္ၚိုဟ်မံၚ် ပ္ဍဲသ္ကုတ်သၟဝ်ကျာဍုၚ်ကအ်ကြိက်လၟုဟ်ဏံ ရဲဒဴပၞာန်စဴကၠုၚ်သ္ၚိဌာန်ဇကုလ္ၚဵုတံဂှ် ဒပ်ပၞာန်ဗမာရပ်လဝ်နွံတုဲ ညးဒေသတံ ကလေၚ်စဴသ္ၚိဌာန်ဟွံထေက်ဏီ တမ်ရိုဟ်ကၞက်ဒေသတံသ္ဂးမံၚ်ရ။
ဒၞာဲတွဵုရးကရေၚ် သှ်ေမံၚ်သွက်ဂွံကၠောန်ပေါဲရုဲမာဲသ္ကုတ် ၃ ပွိုၚ်ဍုၚ် ကအ်ကြိက်ကဵု လှာဒကှ်တံဂှ် ဒပ်ကဝ်မယှေန်ပၞာန်ဗမာ ပလံၚ်လဝ်ဇြဟတ်ဗွဲမဂၠိုၚ်တုဲ ပ္ဍဲဂျာန်နဝါရဳ ၂၅ နူကၠာဟွံကၠောန်ပေါဲရုဲမာဲဂှ် ပေါဲဗတိုက်အကြာၜါလပါ် ထပ်ဒှ်မံၚ် မဒှ်ရ။
ပရိုင်-သြၚ်လောန်တိုၚ်မ်
Photo – Social Media