မတ်မလီု ၊ ဂျာန်နဝါရဳ ၁၈
တွဵုရးမန် ပ္ဍဲဍုၚ်မတ်မလီု နူဂကောံအုပ်ဓုပ်အရာပ်/ကွာန်တံ ဗက်ကံက်မံၚ်စရၚ်သၟတ်ဗြဴ သွက်ဂွံယိုက်ဝန်ပၞာန်ရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဂကောံပရေၚ်အုပ်ဓုပ် သၟဝ်တဲကဝ်မယှေန်ပၞာန်တံ ဗက်ကံက်မံၚ်တင်နင်သၟတ်ဗြဴတံ စနူကဵုအိန်ထံၚ်နွံ/ဟွံမွဲ သောဲသောဲတံကီုရ။
တင်နၚ်ကံက်ဂွံလဝ်တံဂှ်တှ်ေ ဆက်ပတိုန်ထ္ၜးကဵုဌာနဆေင်စပ်တုဲ ယဝ်ခါရပၟိက်နွံကၠုၚ် ကော်သၟတ်ဗြဴ သွက်ယိုက်ဝန်ပၞာန်မ္ဂး သွက်ဂွံစကာအာဂကောံပရေၚ်အုပ်ဓုပ်တံ ဟီုလဴလဝ်နွံရဂှ် ညးဒေသတံသ္ဂးရ။
ပြဟ်ဟ်ဏံ ဂကောံအုပ်ဓုပ်အရာပ်/ကွာန် သၟဝ်တဲကဝ်မယှေန်ပၞာန်တံ ဇၟာပ်သ္ၚိသၟတ်ဗြဴနွံဂှ် ဗက်ကံက်မံၚ်စရၚ် စနူကဵုတၚ်နၚ်သောဲသောဲဗြောဲဗြောဲ ကေတ်လဝ်ကီုလေဝ် သွက်အရာသာ်လဵုဂှ် ဟီုလဝ်ဟၟဲပုဟ် ညးဒေသမတ်မလီုမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ဗက်ကံက်မံၚ်စရၚ်ညးဗြဴ ဇၟာပ်ပ်သ္ၚိရ။ ညးဗြဴနွံမူစိတၠရော ကၠုၚ်ကံက်ကေတ်တၞဟ်ခြာရ။ မုကမၠောန်ကၠောန်မံၚ်ရော ကွးဘာဟာ၊ တိုန်မံၚ်တက္ကသိုလ်ဟာ၊ ကွးဘာတန်သၠုၚ်ဟာ၊ အိန်ထံၚ်နွံဟာ။ အိန်ထံၚ်ဟၟဲဟာ ကံက်မံၚ်သောဲဗြောဲ” သာ်ဝွံသ္ဂးရ။
ပ္ဍဲကဵုဒၞာဲအရာပ်လ္ၚဵု ကံက်မံၚ်စရၚ်သၟတ်ဗြဴကီုလေဝ် ပ္ဍဲကဵုဒၞာဲအရာပ်လ္ၚဵုဂှ် ဟွံဒှ်ကံက်ဏီ၊ ကာလဒးကေတ်သၟတ်ဗြဴ ယိုက်ဝန်ပၞာန်တံမ္ဂး ညံၚ်ဂွံဂွံပြဟ် ဒစးဒုၚ်ကံက်လဝ်စရၚ်ဒှ်မာန်ရောၚ် ညးဆက်ဟီုရ။
သွက်ယိုက်ဝန်ပၞာန် ကံက်မံၚ်စရၚ်သၟတ်ဗြဴတံဂှ် ဒှ်မံၚ်ဒွိၚ်ကွေံကွေံရောၚ် ညးဗြဴမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဂွိၚ်မံၚ်အိုတ်စောန်ရ။ မုဒှ်ရောတှ်ေ ညးတြုံကဵုညးဗြဴဟွံတုပ်ပုဟ်၊ ညးတြုံတံဂှ် ဒုၚ်ဒဝ်ကြံၚ်မ္ၚိုဟ်မာန်။ ညးဗြဴတံ ဓဝုဲခြေၚ် တောမ်တပ်ပုၚ်သွ ယိုက်ဝန်တာလျိုၚ်သ္ၚိဌာန်ရ ဂပ်ဝ်။ ဇကုဇကုဂှ် စဵုဒၞာကေတ်ဟွံမာန်ပုဟ်” သာ်ဝွံ သ္ဂးရ။
အတိုၚ်ဥပဒေယိုက်ဝန်ပၞာန် ကဝ်မယှေန်ပၞာန် ကလေၚ်ထပၠုပ်လဝ်လမျီုမ္ဂး ညးဗြဴအယုက် စနူကဵု ၁၈ ဒဵုကဵု ၂၇ သၞာံ သွက်ဂွံယိုက်ဝန်ပၞာန်လုပ်အဝေါၚ်တုဲ ယဝ်ရဒှ်မၞိဟ်စီုသ္ကီုမ္ဂး ဒဵုကဵုအယုက် ၃၅ သၞာံ လုပ်မံၚ်အဝေါၚ် သ္ဂးလဝ်ရ။
ဒှ်မၞိဟ်စီုသ္ကီုဟီုဂှ် သဝ်ဝန်၊ အေန်ဂျေၚ်နဳယာ၊ လေပ်ကွတ်တဲကွတ်စက်ဟွံသေၚ်မ္ဂး ညးဂမျိုၚ်မံၚ်လမျီု နကဵုကွတ်ပညာမွဲမွဲသာ်တံရောၚ် ပ္ဍဲကဵုဥပဒေယိုက်ဝန်ပၞာန် ချူခၞံလဝ်ရ။
အတိုၚ်တၚ်နၚ် ဌာန်ပရိုၚ်သြၚ်လောန်တိုၚ်ပကောံဂွံလဝ်မ္ဂး ပ္ဍဲကဵုတွဵုရးမန် ကဝ်မယှေန်ပၞာန်ပံက်လဝ် ဘာတန်ဗတောန်ယိုက်ဝန်ပၞာန် နူကဵုလၟေၚ်၁ ဒဵုကဵုလၟေၚ် ၂၁ ဂှ် သၟတ်တြုံ ဒးဒုၚ်ပကောံလဝ်ယိုက်ပၞာန်ကြပ် ၄၂၀၀ နွံမံၚ် မဒှ်ရ။
ပရိုၚ်-သြၚ်လောန်တိုၚ်မ်
Photo – MOI