ရဳယာဒ်၊ ဂျာန်နဝါရီ ၂၃
ပ္ဍဲကဵုဂကောံဗုက် ပရေၚ်ၜိုဟ်လလမ် သမ္မတအမေရိကာန် ဒဝ်နေဝ်ထရဂှ် ဍုၚ်ဇြဝ်ဒဳ၊ တူရကဳကေုာံ အိဂျေတ် သီုဖအိုတ် ၇ ဍုၚ်တံ ပါလုပ်အာကီုရောၚ် ပံၚ်တောဲလလောၚ်တြးလဝ်ရ။
နူကဵုဍုၚ်အေတ်သရေဝ် ပါလုပ်အာ ပ္ဍဲကဵုဂကောံဗုက် ပရေၚ်ၜိုဟ်လလမ်ဂှ် နူအခိၚ်ပြဟ်ဟ်တေံ လလောၚ်တြးလဝ် ကဵုညးဂမၠိုၚ်တီလဝ်တုဲတုဲရ။
ပ္ဍဲဂျာန်နဝါရဳ ၂၁ အခိၚ်ဗတံဂှ် ဗလာဒဳမာ ပူတေၚ်လေဝ် သွက်ဂွံပါလုပ်အာ တုပ်လဝ်စိုတ်ဂှ် ထရဟီုကီုလေဝ် စပ်ကဵုပရေၚ်ကော်ဘိက်လဝ်ဏံဂှ် နကဵုရတ်ယှာ လ္ၚတ်မံၚ်ဏီ ကလေၚ်လဝ်ပရိုၚ်ရ။
ကိုပ်ကၠာ တၚ်ရန်တၟံ ဂကောံဗုက်ဏံဂှ် သွက်ဂွံဗဒေါအ်အာ ပေါဲပၞာန်ဒေသဂါဇာ အကြာဟာမက်ကဵု အေတ်သရေဝ်ကေုာံ သွက်ဂွံကဵုအရီုဗၚ် အရာကလေၚ်ဒက်ပတန်တံရောၚ် ခယျလဝ်အိုတ်ရ။
ဆဂး ပ္ဍဲကဵုတၚ်နၚ်ပတိုန်ထ္ၜးလဝ် ပရေၚ်တုပ်စိုတ်ညးသ္ကံဂှ်မ္ဂး ဟီုစုတ်လဝ်ပရေၚ်တိဍာ်ဒေသ ပါလက်သတိုၚ်ဂှ်ဟွံဂွံဆဵုတုဲ ဒှ်မံၚ်ညံၚ်ကဵုရန်တၟံလဝ် လုပ်ကေတ်ဒၞာဲတာလျိုၚ် ပရေၚ်ကမၠောန်ကုလသမဂ္ဂရောၚ်။
ဆဂး ဍုၚ်မူသလေၚ်ဗွဲမဂၠိုၚ် ဇြဝ်ဒဳအာရေဝ်ဗဳယာ၊ တူရကဳ၊ အိဂျေတ်၊ ဂျဝ်ဒါန်၊ အေန်ဒိုနဳယှာ၊ ပါကေတ်သတာန်ကဵု ကာတာ ၇ ဍုၚ်တံ ပ္ဍဲကဵုဒေသဂါဇာ ညံၚ်ဂွံချိုတ်ပၠိုတ်ပရေၚ်ဒေါအ်ပန်ပှော်လၟိုန်ဂှ် ဒုၚ်လဝ်တဲတၚ်ရန်တၟံဏံရောၚ် ဇြဝ်ဒဳအာရေဝ်ဗဳယာ ဟီုရ။
အရာကလေၚ်ဒက်ပတန် ကေုာံ ညံၚ်သ္ဂောံဂွံပရေၚ်ၜိုဟ်လလမ်ဍာ်ဇမၠိၚ်မာန် ထံက်အာဂလာန် ပရေၚ်ဂိုတ်ဂစာန်တံရောၚ် ၇ ဍုၚ်ဏံ ဟီုလဝ်ရ။
ပ္ဍဲကဵုဖိုရမ်ပရေၚ်ပိုန်ဒြပ်ဂၠးကဝ် ကၠောန်လဝ်ဍုၚ်သိပ်ဇြာလန်ဂှ် ပူတေၚ်လေဝ် သွက်ဂွံပါလုပ်အာ တုပ်လဝ်စိုတ်ရောၚ် ထရ ဟီုလဝ်ကဵု အစာပရိုၚ်တံရ။
ပ္ဍဲကဵုဂကောံဗုက် ပရေၚ်ၜိုဟ်လလမ်ဏံ သွက်ဂွံပါလုပ်အာဂှ် ဍုၚ်ဗွဲမဂၠိုၚ်တုပ်လဝ်စိုတ်နွံမံၚ်ရောၚ် ထရ ဟီုရ။
ဆဂး အဃောချပ်မံၚ်ဖိုအ်ဏီ ပူတေၚ် ကလေၚ်ဟီုလဝ် ဗွဲမပြဟ်ရ။
နကဵုသ္ဇိုၚ်စှ်ေစှ်ေ ထေက်ကြိုက်ဂပ်ဂဝ်မံၚ်ကဵု သွက်ဒေသ ဗၟံက်လဒေါဝ်ဂှ် နကဵုဇကု ညာတ်လဝ်ဂကောံဗုက်ဏံတုဲ ပလေဝ်ပလေတ်စလဝ် သွက်ဂွံကဵုသြန်လုပ်ဂကောံဗုက်ဏံ နူကဵုအမေရိကာန်သီကေတ်လဝ် ပရေၚ်ရတ်ယှာပိုၚ်ပြဳလဝ်တံဂှ် နုက်ကေတ်ဒဝ်ဠာ ၁ ဗဳလဳယာန် ဟီုလဝ်ရ။
သွက်ဂွံပါလုပ်အာ ပ္ဍဲဂကောံဗုက်ဏံ ကော်ဘိက်လဝ် မူစိဍုၚ်ရော ဟွံဂွံတီလဝ် ကၠးကၠမးမးဏီလေဝ် ဍုၚ်ကနေဒါကဵု ဍုၚ်အဂႅလိက်တံ ဒးဒုၚ်ဘိက်လဝ်ရ။
ဆဂး ဍုၚ်ကနေဒါကဵု ဍုၚ်အဂႅလိက်တံဂှ် ဟွံကလေၚ်ပရိုၚ် သောၚ်ၚ်ကၠးကၠးဏီပုဟ်။
ယူအေအဳ၊ ဗါရုၚ်၊ အေဝ်လ်ဗေဝ်နဳယာ၊ အဇြာဗိုၚ်ဂျာန်၊ ဗဳလာရုဇ်၊ ဟာန်ဂေရဳ၊ ကာဇက်သတာန်၊ မဝ်ရိုကိုကဵု ဗဳယက်နာမ်တံ ပါလုပ်ရောၚ် ကဵုလဝ်စရၚ်တုဲယျ။
အစာတၠပုက် ညးဇၞော်နန်ထဝ် ဗာတဳကာန်လေဝ် သွက်ဂွံပါလုပ် ဒးဒုၚ်ကော်ဘိက်လဝ်ကီု ပ္ဍဲကဵုဂျာန်နဝါရဳ ၂၁ ဂှ် သ္ပလဝ်ဒတန်ရ။
Ref:BBC