တနၚ်သဳ၊ ဂျာန်နဝါရဳ ၂၉
ရးတနၚ်သဳ ပ္ဍဲကဵုသၞာံ ၂၀၂၅ ပွိုၚ်မွဲသၞာံဂှ် ကောန်အရာပ်ညးဍုၚ်ကွာန် ဟွံအောန်နူ ၁၆၀ ဒးဒုၚ်ဂစိုတ်လဝ်နွံ ဂွံတီလဝ် နူကဵု ဂကောံသုတေသန FE5 Thanintharyi ရ။
ပ္ဍဲအကြာပွိုၚ်မွဲသၞာံဏံ ဟိုတ်နူဒပ်ကဝ်မယှေန်ပၞာန်ဂှ် ကောန်အရာပ် ညးဍုၚ်ကွာန် ၁၀၃ တၠ၊ ဟိုတ်နူဒပ်ပၠန်ဂတးတံကဵု ဂကောံရပ်လွဟ် ကောန်ဍုၚ်အရၚ်တံဂှ် ကောန်အရာပ်ညးဍုၚ်ကွာန် ၂၆ တၠ၊ တၠတဲဟွံမံက်ဒးဒုၚ်ဂစိုတ်လဝ် ၃၁ တၠ သီုဖအိုတ် ကောန်အရာပ် ညးဍုၚ်ကွာန် ၁၆၀ တၠ ဒးဒုၚ်ဂစိုတ်လဝ်ရ။
ဗွဲမဂၠိုၚ်မ္ဂး ဟိုတ်နူဒပ်ကဝ်မယှေန်ပၞာန် ပန်လွဟ်ဇၞော်၊ ကြဳဗုမ် ဗတိုက်လဝ်ကဵုၜၚ်ကျာတံဟွံသၟးက အခိၚ်ထပက်ကရောၚ်ပၞာန်ဂှ် ရပ်ဂစိုတ်လဝ်မၞိဟ်တံ ဒှ်ဂၠိုၚ်အိုတ် ညးတာလျိုၚ် FE5 Thanintharyi မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဗွဲတၟေၚ် အခိၚ်ဒပ်ကဝ်မယှေန်ပၞာန် ဒစးဒုၚ်ပလေဝ်စမံၚ် သွက်ဂွံကၠောန်ပေါဲရုဲမာဲ အခိၚ်ကၞောတ်သၞာံဂှ် ပန်လဝ်ကဵု လွဟ်ဇၞော်တံကဵု ပၞာန်ကျာတံဗတိုက်လဝ် လ္တူကောန်အရာပ် ညးဍုၚ်ကွာန်တံ ဂၠိုၚ်အိုတ် မဒှ်ရ။
အတိုၚ်တင်နၚ် FE5 Thanintharyi မ္ဂး ဟိုတ်နူဒပ်ပၠန်ဂတးတံကဵု ဂကောံရပ်လွဟ်ကောန်ဍုၚ်အရၚ်တံ တက်လဝ်က္ဍိုပ်လိက် ပသောၚ်လေံထံက်သၞဂးတုဲ ဂစိုတ်လဝ် ကောန်အရာပ်ညးဍုၚ်ကွာန် တံ သ္ဂးရ။
ပ္ဍဲဍုၚ်ဗမာ အခိၚ်သီလဝ်အဝဵုဏံ ဟိုတ်နူတၠတဲဒပ်ကဝ်မယှေန်ပၞာန် ကဵု ကောန်ရဲတဝ်သွာဍေံတံဂှ် ကောန်အရာပ်ညးဍုၚ်ကွာန် ၇၇၀၀ ပြၚ် ချိုတ်အာလဝ်နွံမံၚ် ဂွံတီလဝ် နူကဵုတၚ်နၚ် ဂကောံရီုဗၚ်မင်မွဲ ကောန်ထံၚ်ပရေၚ်ဍုၚ်ကွာန် AAPP ရ။
ပရိုၚ်-သြၚ်လောန်တိုၚ်မ်
Photo – CJ