ပလဝ်၊ ဂျာန်နဝါရဳ ၂၉
ရးတနၚ်သဳ ပွိုၚ်ဍုၚ်ပလဝ် ပ္ဍဲကဵုဍုၚ်ပလ အရာပ် ၄ သ္ၚိဌာန်နွံမံၚ်ကြပ် ၈၀ မတံဂှ် ဒပ်ကဝ်မယှေန်ပၞာန် ကၠုၚ်စံၚ်ပလီုထောံလဝ် ညးဒေသကဵု ဂကောံဇြဟတ်ပၠန်ဂတးတံ ဟီုလဝ်ကဵု ဌာန်ပရိုၚ်သြၚ်လောန်တိုၚ်မ်ရ။
တုဲကၠုၚ်ဂျာန်နဝါရဳ ၂၇ အခိၚ်နူဂယးၜိုတ် ၁၁ နာဍဳကဝက် ပ္ဍဲဍုၚ်ပလ သ္ၚိဌာန်ညးဍုၚ်ကွာန် အရာပ် ၄ ညးကော်စအရာပ်သၞေဟ်ဖဴၜဵုတံဂှ် ပေါဲဗတိုက်ဟၟဲမွဲသာ် နူကဵုဒပ်ကဝ်မယှေန်ပၞာန် ကၠုၚ်စံၚ်ပလီုထောံ ဖအိုတ်ရ။
ညးကဵုပရိုၚ် လေံထံက်သၞဇၞော်အိုတ် ကိုတာကျဳ အယုက်ၜိုတ် ၄၀ သၞာံ နွံမံၚ်ဂတမုက်ရုၚ်ဗၠာဲသၟိၚ်ဍုၚ်ပလဂှ် ဂကောံဇြဟတ်ပၠန်ဂတးတံ ကၠုၚ်ရပ်ဏာပ္ဍဲတ္ၚဲဂှ်တုဲ ဒပ်ကဝ်မယှေန်ပၞာန် စံၚ်ပလီုထောံသ္ၚိ အတိုၚ်ဏံမဒှ်ရ။
ဟိုတ်နူဒပ်ကဝ်မယှေန်ပၞာန် စံၚ်ပလီုသ္ၚိဗီုဏံဂှ် သ္ၚိတိုက်မွဲထပ်၊ သ္ၚိတိုက်ၜါထပ်ကဵု သ္ၚိခိုဟ်ဟ်ဗွဲမဂၠိုၚ် ၇၈ မ ပၟတ်တူအာလဝ် ညးတြုံရဲဒေသမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
သ္ၚိတူအာဒးဒုၚ်စံၚ်လဝ်တံဂှ် ဂကောံဇြဟတ်ပၠန်ဂတးတံ ကၠုၚ်ဘိုၚ်သြိုဟ်လဝ်ကဵုပၟတ်တံတုဲ စိုပ်အခိၚ်သဝ်တ္ၚဲဂှ် ပၟတ်ပၠိုတ်ဇြစှ်ေအာ ကောန်သ္ဂံၚ်ပၠန်ဂတးမွဲတၠ သ္ဂးရ။
ဂကောံဇြဟတ်ပၠန်ဂတးတံ ရပ်ဏာလဝ် ကိုတာကျဳဂှ် ယဝ်ရ ဟွံဗလးကဵုမ္ဂး သီုအလုံဍုၚ်ပလမွဲဖအိုတ်ဂှ် ထပ်စံၚ်ပလီုထောံရောၚ် ဒပ်ကဝ်မယှေန်ပၞာန် ဘပဠလဝ် သ္ဂးရ။
စနူကဵုသၞာံအာတေံတုဲ အကြာဒပ်ကဝ်မယှေန်ပၞာန်ကဵု ဂကောံပၠန်ဂတးတံဂှ် ပေါဲသီဍုၚ်ပလဟွံက ဟိုတ်နူ ပရေၚ်ပၞာန် ကြံၚ်မ္ၚိုဟ်မံၚ်ညးသ္ကံတုဲ ညးလ္တူဍုၚ်ဗွဲမဂၠိုၚ်တံဂှ် ဒၞာဲဗၠးဘဲမာန်ဒဴပါဲအာ ကီု ပြဟ်ဟ်ဏံ ညးလ္ၚဵုဆက်မံၚ်အာမံၚ် အကြာအရာပ်မ္ၚးမ္ၚးဍုၚ်တံ မဒှ်ရ။
လောန်ကၠုၚ် သၞာံ ၂၀၂၅ ဂှ် ပ္ဍဲရးတနၚ်သဳ ဟိုတ်နူ ဒပ်ကဝ်မယှေန်ပၞာန် စံၚ်ပလီုလဝ်ဂှ် သ္ၚိဌာန်ကောန်အရာပ် ညးဍုၚ်ကွာန် ဟွံအောန်နူ ၇၀၀ တူအာလီုလာ်ဆောံလေၚ်လဝ်နွံ ပ္ဍဲလိက်ဒုၚ်စဳရေၚ် ဂကောံသုတေသန FE5 Thanintharyi ချုထ္မံက်လဝ်ဂှ် ရ။
ပရိုၚ်-သြၚ်လောန်တိုၚ်မ်
Photo – CJ