မတ်မလီု ၊ ဂျာန်နဝါရဳ ၂၉
တွဵုရးမန် ဒၞာဲဒယှ်တှ်ဍုၚ်မတ်မလီု ပွမၜံက်ခါဲသရိုဟ်ဓမံၚ်ဒဵုဗိုၚ်ဂှ် ပရေၚ်ပါ်ပါဲအကြာညးဍုၚ်ကွာန်တံ သၠုၚ်မံၚ်ကီုလေဝ် ရဲလပါ် ကဝ်မယှေန်ပၞာန် ဆက်သရိုဟ်မံၚ်ဒဵုဖိုအ်ဂှ် ညးလ္တူဍုၚ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဟိုတ်နူ ထပက်သရိုဟ်မံၚ်ဒဵုဗိုင်ဂှ် ဒဵုလာ်စှ်ေမာန်၊ ဘဲအန္တရာဲ ဒှ်ကၠုၚ်မာန်တံကီု ပရေၚ်ပွဳပွူသဘာဝ ဖေက်လီုလာအာဂှ် ညးဒေသ တံဂွိၚ်တုဲ ပါ်ပါဲဟီုဂးမံၚ်ကီုလေဝ် လပါ်ကဝ်မယှေန်ပၞာန်ဂှ် ဆက်ကဵုလဝ်အခေါၚ် ထပက်သရိုဟ်ဒဵုဖိုအ်ရ။
တိကဵုတၟအ် ဂွံနၚ်လဝ်နူကဵုသရိုဟ်လဝ်ဒဵုဏံဂှ် အာဗဝ်စုတ်လဝ်တိ ဒၞာဲဂအာၚ်သ္ၚိ စကာလဝ်သွက်ကိုန်အစဳဇန် သၠဲပတိတ်ဍုၚ်တၟိလှိုၚ် မဒှ်ရ။
သ္ကိုပ်ဝန်ဇၞော်တွဵုရးမန်ဥူအံၚ်ကျဳတိၚ် ဟိုတ်နူကဵုလဝ်အမိၚ်တုဲ ကၠာဗြဲဟွံစှ်ေဏံ သွက်ကိုန်အစဳဇန် သၠဲပတိတ်ဍုၚ်တၟိလှိုၚ် ဂွံတုဲဒှ်အာ ဗွဲမပြဟ်ဂှ် ဆက်ကၠောန်မံၚ်ပရေၚ်သရိုဟ်ဒဵုဏံ ညးကြပ်ကဵု ကဝ်မယှေန်ပၞာန်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ညးကဵုဟီုဟီု ကမၠောန်ၜံက်ခါဲဒဵုဗိုၚ်ဂှ် ဍေံတံဆက်ကၠောန်မံၚ်ဟဂှ်ရ။ လၟုဟ်တှ်ေ ပဵုတုဲနွံကၠုၚ်ပၟိက်ကဵု တိတံတၟအ်တံအိုတ်စောန်။ မုဒှ်ရောတှ်ေ ကိုန်အစဳဇန်ဍုၚ်တၟိဂှ် ထပ်သၠဲပတိတ်လဝ်နူကဵုကၠာတေံဏီတုဲ နွံမံၚ်ပၟိက်ဂၠိုၚ်တိုန်။ ညံၚ်ဂွံတုဲအာပြဟ်ဟ် သ္ကိုပ်ဝန်ဇၞော် ကဵုဂစာန်ကၠောန်မံၚ်ဂှ် ဒစကာစက်ဂၠိၚ်ၚ်။ ကၠာဟွံစိုပ်အခိၚ်ဗြဲ ညံၚ်ဂွံတုဲဒှ်အာ။ ကၠာကိုန်အစဳဇန်ဏံဟွံတုဲမ္ဂး အတိုၚ်နွံပၟိက်ဂှ် ဒးဆက်ခါဲဗတိတ်မံၚ်တိဏံ ဂွံတီလဝ်” သာ်ဝွံ သ္ဂးရ။
ပြဟ်ဟ်ဏံ ပ္ဍဲကဵုပရေၚ်ၜံက်ခါဲသရိုဟ်မံၚ်ဒဵုဗိုၚ်ဂှ် ထပ်ထပေၚ် စကာသုၚ်စောဲလဝ် ဇြဟတ်စက်ယန္တရာ ဟလိုၚ်လဝ် နူကဵုကၠာတေံဏီတုဲ စက်ခါဲဂှ်ခါဲ ကွဳစက်ဖ္ဍိုက်တိဂှ် ဖ္ဍိုက်ကေတ်ဏာ မံၚ် မွဲမွဲတ္ၚဲလၟိဟ်အလန်ဂၠိုၚ်ကဵုအတန် နကဵုကၠမ်ပြၚ်ၚ် ကေတ်ဏာမံၚ် တိတံ ညးဆက်ဟီုရ။
ဟိုတ်နူကဝ်မယှေန်ပၞာန် တွဵုရးမန် ကဵုလဝ်အခေါၚ် ၜံက်ခါဲသရိုဟ်မံၚ် ဒဵုဗိုၚ်ဂှ် ညးဍုၚ်ကွာန်နွံမံၚ်ကရပ်ဗ္ဒာဲတံ ပြဿနာကျာတ်ဝါတ်ဍာ် ဒးဇီုကပိုက်တုဲ အခိၚ်ဗြဲမ္ဂး အန္တရာဲဒဵုသရိုဟ်လာ်စှ်ေမာန်ဂှ်လေဝ် ဒးဆဵုဂဗအာမာန်ရောၚ်။
ပြဟ်ဟ်ဏံ ဟိုတ်နူကွဳစက်ဖ္ဍိုက်တိတံ လုပ်တိတ်အာကၠုၚ်မံၚ်ဂှ် ဂၠံၚ်ဍာန်လီုအာကီု၊ ကွဳစက်ဖ္ဍိုက်တိတံ ဒဳမံၚ်ကြာန်န်တုဲ အန္တရာဲယာန် ကွဳစက်လေဝ်နွံ၊ ဟိုတ်နူထဗိုက်တိတံဂှ် ယီုဝါတ်လေဝ်နွံ ဒှ်ကၠုၚ်မံၚ် ဇဳသာ် ညးဍုၚ်ကွာန်တံ သ္ဂးရ။
စပ်ကဵုပရေၚ်ၜံက်ခါဲမံၚ်ဒဵုဗိုၚ်တုဲ ပ္ဍဲဂိတုနဝ်ဝမ်ပါ သၞာံအာတေံ ဂကောံဌာနစုၚ် ကဝ်မယှေန်ပၞာန်တွဵုရးမန်တံ လ္ပကလော်စၟဳစၟတ် ဆအယာံမာတ် ထ္ၜးစကမၠောန်ကီုလေဝ် မုလေဝ်တၟေၚ်ကၠုၚ် ဟွံသေၚ်ပုဟ်။
ဟိုတ်နူ ပရေၚ်ၜံက်ခါဲသရိုဟ်မံၚ်ဒဵုဗိုၚ်တုဲ ကျာ်ဇၞော်အစာ စန္ဒာဇောတိ နူကဵုဖံၚ်ဒေယှေန် ဇုက်သာသာနာ ဟိုတ်နူချူပါ်ပါဲလဝ် ပ္ဍဲကဵုဇာဖိုၚ်ပရေၚ်မၞိဟ်ဂှ် ကဝ်မယှေန်ပၞာန် ရပ်ချုက်ဏာ ကယျိုၚ်သာသနာၜးသၠောတ်တုဲ ကဵုတိတ်အာကယျိုၚ်မၞိဟ် ပံက်အမှုကေတ်လဝ်အရေဝ်ရ။
ပရိုၚ်-သြၚ်လောန်တိုၚ်မ်
Photo – CJ