နေပျဳတဝ် ၊ ဖေဖဝ်ဝါရဳ ၆
ပရေၚ်စဵုဒၞာကေုာံ သ္ဂောံဂီုကၠီု သွက်ကၟိန်ဍုၚ် ယဝ်ရပၟိက်ဇၞော်ကၠုၚ်မ္ဂး “ဥပဒေနိုင်လောတ်လုၚ်”လ္ၚဵု ညံၚ်ဟွံဒးကေတ်သက်သဳဂှ် ကလေၚ်ပလေဝ်လဝ်ရဂှ် ပ္ဍဲဖေဖဝ်ဝါရဳ (၃) နူကဵုကံၚ်သဳစဵုဒၞာကောန်ဂကူကေုာံ ပရေၚ်ဂီုကၠီု လလောၚ်တြးလဝ်ရ။
ဥပဒေဆေင်စပ်ကဵု ပရေၚ်သၠးပွးကေုာံ စဵုဒၞာပရေၚ်ဂီုကၠီုပူဂဵု ကောန်ဍုၚ်တံဂှ် သမ္မတယာယဳ ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ထပက်စၟတ်တဲတုဲ ထပက်အဇာပလေဝ်လဝ် ၝောံပိုဒ် ၅ ၝောံပိုဒ်ပါ် (ခ) ကဵုၝောံပိုဒ် ၈ လ္ၚဵုတံရ။
အတိုၚ်ၝောံပိုဒ် ၅ ၝောံပိုဒ်ပါ် (ခ) မ္ဂး အပ္ဍဲကဵုသ္ၚိပူဂဵုမွဲမွဲ ကေုာံ သ္ၚိပူဂဵုမွဲမွဲစကာသုၚ်စောဲလဝ် နကဵုဥပဒေ ယဝ်ရမိက်ဂွံလုပ်ဂၠိုက်ဂၠာဲ၊ လုပ်သီကေတ်၊ လုပ်ရပ်စပ်မ္ဂး နကဵုညးတာလျိုၚ်သက်သဳ အောန်အိုတ် ၂ တၠပါမှ ရေၚ်တၠုၚ်မာန်ရောၚ် သ္ဂးရ။
သွက်ပရေၚ်ဂီုကၠီု ပါဲနူပရေၚ်ကိစ္စဇၞော်တုဲ သ္ကိုပ်အုပ်ဓုပ်ကွာန်/အရာပ် ညးတာလျိုၚ်ကွာန် ဟွံသေၚ်မ္ဂး သ္ကိုပ်အရာပ်မွဲမွဲတၠ အောန်အိုတ် သက်သဳ ၂ တၠတံ ဒးပါရောၚ်။
ထ္ၜးဟိုတ် ပရေၚ်စဵုဒၞာ ပရေၚ်ဂီုကၠီုကဵု သွက်ညးဂမၠိုၚ် ဂွံၜိုဟ်သြိုဟ်သာယာဂးတုဲ သက်သဳဟၟဲကီုလေဝ် လုပ်စိုပ်ဒၞာဲစမြိုၚ် သ္ၚိမွဲမွဲဒၞာဲတုဲ ရပ်စပ်အာမာန်ရောၚ် ဒးကၠိုဟ်ခၠၚ်ကေတ်ရ။
ပ္ဍဲကဵုၝောံပိုဒ် ၈ ဂှ် အတိုၚ်ဥပဒေကၠာတေံမ္ဂး အမိၚ်၊ အခေါၚ်၊ ဝရာန် ဟၟဲဒှ်ဒှ် အမိၚ်သမ္မတကၟိန်ဍုၚ်၊ အလဵုအသဳကၟိန်ဍုၚ်ဒှ်ဒှ် ပလေဝ်လဝ် မအရေဝ် အမိၚ်ဟၟဲမွဲသာ်ရ။
သွက်ပရေၚ်စဵုဒၞာ ပရေၚ်ဂီုကၠီုကဵု သွက်ညးဂမၠိုၚ် ဂွံၜိုဟ်သြိုဟ်သာယာ ပါဲနူကဵုဥပဒေ နကဵုတာလျိုၚ် အခေါၚ်တာလျိုၚ် ကေုာံ အခေါၚ်ကၠောန်မ္ဂး ထပက်လဝ်အဇာ မအရေဝ် ပလေဝ်ပလေတ် မဒှ်ရ။
“ဥပဒေနိုင်လောတ်လုၚ်” စပ်ကဵု ဥပဒေဆေင်စပ်ကဵု ပရေၚ်သၠးပွး ကေုာံ စဵုဒၞာပရေၚ်ဂီုကၠီုပူဂဵုကောန်ဍုၚ်ဂှ် စနူအခိၚ်သီလဝ်အဝဵု ၂၀၂၁ တေံ ဒေါအ်ထောံလဝ်ၝောံပိုဒ် ၃ နွံရ။
နူကဵုဒပ်ပၞာန် ဒက်ပတန်လဝ် ကံၚ်သဳပၞာန် ကော်ခဴစ ကံၚ်သဳစဳမာန်အုပ်ဓုပ် ကၟိန်ဍုၚ်ဂှ် နူကဵု “ဥပဒေနိုင်လောတ်လုၚ်” နုက်ပတိတ်ထောံ ၝောံပိုဒ် ၅၊ ၝောံပိုဒ် ၇ ကဵု ၝောံပိုဒ် ၈ တုဲ ပ္ဍဲကဵု ၂၀၂၁ ဖေဖဝ်ဝါရဳ ၁၃ ဂှ် နကဵုဥပဒေချူခၞံလဝ်ရ။
ဗွဲကြဴသီအဝဵုကြပ်ပေၚ် ၅ သၞာံဂှ် နူကဵုကဝ်မယှေန်ပၞာန် ပြံၚ်သၠာဲလဝ် ကဝ်မယှေန်ပၞာန်တုဲ က္ဍိုပ်သ္ကိုပ်ပၞာန် ကေတ်တာလျိုၚ် သမ္မတယာယဳ၊ ပ္ဍဲကဵုပရေၚ်ဂီုကၠီုစဵုဒၞာ ဒေါအ်လဝ်ၝောံပိုဒ် သၞာံ ၂၀၂၅ အဝ်ဂတ် ၁ တုဲ ထပ်ချူခၞံလဝ် ဥပဒေပၠန်ရ။
ဟိုတ်ဂှ်ရ အပ္ဍဲကဵုပွိုၚ်ပၞာန် အုပ်ဓုပ်လဝ် ၅ သၞာံဏံ ဟွံဒးကေတ် သက်သဳဝရာန်မွဲသာ် ဥပဒေဟၟဲ ရပ်ချုက်မံၚ်မွဲဒမြိပ်တုဲ ဟွံဒးကေတ်အခေါၚ် ရုၚ်သၞောဝ်မွဲသာ် ၜက်ပွိုၚ် ၂၄ နာဍဳတုဲ ရပ်ချုက်လဝ်မၞိဟ်တံရ။
တုဲပၠန် ဗက်မၚ်ရံၚ် လက်ကရဴ၊ ဗက်ထံၚ်ပရိုၚ်၊ အကြာမွဲကဵုမွဲ တက်ကျာဆက်စၠောံမံၚ်ဂှ် ကၠတ်ကလၚ်၊ အာတ်ကေတ်တၚ်နၚ် နူကဵုအဝ်ပရေတာ ဌာနဆက်စၠောံတံ၊ သီကေတ်ကပေါတ်ကဵု ပလီုပလာ်ထောံ ဒပ်ပၞာန်ကၠောန်လဝ်မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media