မတ်မလီု ၊ ဖေဖဝ်ဝါရဳ ၆
ပ္ဍဲပရေၚ်ဗတိုက်သရိုဟ်အဂတိတံဂှ် ညံၚ်ဂွံပံၚ်တောဲပါလုပ်အိုတ်ညိ သ္ကိုပ်ဝန်ဇၞော်မန် ဥူအံၚ်ကျဳတိၚ် ဟီုလဝ်ဂှ် ဒှ်မံၚ်အရေဝ်ဟရိုၚ်ရောၚ် ညးဒေသတံ ပါ်ပါဲမံၚ်ရ။
ပ္ဍဲကဵုအရာ ပရေၚ်ဗတိုက်သရိုဟ်အဂတိဂှ် ဌာနဆောင်စပ်တံကီု ညးဍုၚ်ကွာန်ကဵု ဂကောံမှဇန်တံလေဝ် ညံၚ်ဂွံပံၚ်တောဲပါလုပ်အာကီု ဥူအံၚ်ကျဳတိၚ် ဟီုလဝ် ပ္ဍဲဖေဖဝ်ဝါရဳ ၂ ပေါဲသောၚ်ကလးကဵုပညာ ဗတိုက်သရိုဟ်အဂတိ ပ္ဍဲဍုၚ်မတ်မလီုရ။
ပရေၚ်ဗက်စအဂတိ ပ္ဍဲဍုၚ်ညံၚ်ဂွံသ္အးဂှ် နကဵုတာလျိုၚ်ကောန်ဂကူမွဲ ကောန်ဍုၚ်ကွာန်အလုံသီုဖအိုတ်တံ တဲညဳကသုညဳ ညံၚ်ဂွံ ဘိုၚ်ဗတိုက်သရိုဟ်အာ ဥူအံၚ်ကျဳတိၚ် ဗတိုက်ဖအောဝ်လဝ်ရ။
ညံၚ်ဂွံဘိုၚ်ဗတိုက်သရိုဟ်အာ ဟီုမံၚ်ကီုလေဝ် နကဵု ဥူအံၚ်ကျဳတိၚ် ဂှ်ပၠန် ဒှ်မံၚ်မၞိဟ်ဗက်စအဂတိမွဲတၠကီု ပ္ဍဲဗလးတိမ္ဂး ဇၟာပ်ဌာန အလဵုအသဳတံဂှ် အဂတိနွံမံၚ်သၟးရတုဲ ဟီုမံၚ်ပရေၚ် ဗတိုက်သရိုဟ်အဂတိတံဂှ် ဒှ်မံၚ်အရေဝ်ဟရိုၚ်ရောၚ် ညးဒေသမွဲတၠ ပါ်ပါဲရ။
“ဗတိုက်သရိုဟ်အဂတိညိဟီုမံၚ်ဂှ် ညးလဵုဒးကၠောန်အာရော။ မၞိဟ်ကၠောန်မံၚ်ဂှ် ဗက်စမံၚ်အဂတိ။ အလဵုဍေံတံဂှ် အဂတိနွံမံၚ်။ ဇကုဍေံဂှ် ကၠောန်မံၚ်အဂတိဇၞော်အိုတ်ဏောၚ်။ မၞိဟ်သၟဝ်ဍေံ ပိုဲပရေအ်”
ပ္ဍဲဗလးတိ ဗၠးတိတ်မံၚ်နူကဵုအဂတိဂှ် ဟၟဲပုဟ်။ ဇၟာပ်ပ်ဌာနဂှ် အဂတိဖအိုတ်ရ။ ဍေံတံဟီု ဍေံတံဗတိုက်သရိုဟ်အဂတိဂှ် ဒးဂြိၚ်ကွေံကွေံ” သာ်ဝွံ သ္ဂးရ။
သ္ကိုပ်ဝန်ဇၞော်ဟီုမံၚ် ပရေၚ်ဗတိုက်သရိုဟ်အဂတိကီုလေဝ် ပ္ဍဲဗလးတိမ္ဂး ဌာနဆေင်စပ်တံကီု စနူကဵုသ္ကိုပ်ပရေၚ်အုပ်ဓုပ်တံ ဗက်စမံၚ်အဂတိနွံတုဲ ယဝ်ရဒးကေတ်အရေဝ်တှ်ေ မၞိဟ်မွဲမှသှ်ေ ဟွံမာန်ပုဟ် ညးဆက်ဟီုရ။
စပ်ကဵုဗက်စအဂတိ နူအဆံၚ်လ္တူ ဗီုလဵုဟီုဟီုမံၚ် အတိုၚ်ဗီုဏံရ ဆက်နွံမံၚ်တုဲ သွက်ဂွံတေၚ် ကဵုလဝ်မဂၞန်ဖုၚ်ကီုလေဝ် ယဝ်ရ ဆက်အာမ္ဂး ဆက်ဟွံဂွံပုဟ် ညးဒေသမွဲတၠပၠန်ဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ညးအဆံၚ်လ္တူတံ ဗီုလဵုဟီုဟီုမံၚ် သၟဝ်ဏံဂှ် အာမံၚ်အတိုၚ်ဂှ်ရဏောၚ်။ လၟုဟ် ပရေအ်အိုတ်ဂှ် လဝက။ ကၠောန်ကာတ်ကောန်ဍုၚ် အာလဝကဏောင်။ ယဝ်ရဟွံကဵုသြန်တှ်ေ လိက်ထံက်ဂလာန်တေံ မုတေံ ဒးကေတ်။ ပြဟ်ဟ်ဏံ ပ္ဍဲသၞေဟ်ကၚ် အာတ်သြန်တှ်ေ ဆက်ဖုၚ်ကဵုလဝ်မဂၞန် ဆက်အာတှ်ေ မုလေဝ်ဟွံဂွံပုဟ်” သာ်ဝွံ သ္ဂးရ။
ပရေၚ်ဗတိုက်သရိုဟ်အဂတိ ပံၚ်တောဲပါလုပ်အာညိ သ္ကိုပ်ဝန်ဇၞော် ဟီုမံၚ်ဂှ် နကဵုညး စမံၚ်လာဘ်ဗဇဴတုဲ ကဵုအခေါၚ်ပံက်လဝ်ဝိုၚ်ဝေၚ်၊ ထမံက်ကိုန်အစဳဇန် စလာဘ်ဗဇဴ ကဵုလဝ်အခေါၚ်ကၠောန်အိုတ်ရ။
တုဲပၠန် သၟဝ်ဌာနကဝ်မယှေန်ပၞာန် လဝကတံ ကညန တံသၟးဟွံက ဌာနတၞဟ်ဟ်ဂှ်လေဝ် ကဵုသြန်လာဘ်ဗဇဴမာန်မှ ကၠောန်ကဵုတုဲ ဟွံကဵုလှုဲမ္ဂး အခိၚ်ညံၚ်ဂွံအိုတ် ဗဂေတ်ဏာဗဂေတ်နၚ် ဟွံဖန်ကဵု ပုဟ် ညးဒေသတံ ဟီုရ။
စနူကဵုသ္ကိုပ်အုပ်ဓုပ်ကွာန်/အရာပ် ညးဇၞော်အရာပ်တံ စသြန်မ္ဂး တေၚ်မာန်ဟီုလေဝ် ဗီုအခိၚ်ကၠာတေံ မုလေဝ်ကၠောန်ကဵုဟွံသေၚ်တုဲ ညးတေၚ်လဝ်တံ ဒးဒုၚ်ပၞောတ်လဝ်စိုတ်ရဒှ်အာ ဂွံတီရ။
ပ္ဍဲကဵုတွဵုရးမန် အခိၚ်ပၞာန်သီအဝဵုဏံ စနူကဵုသ္ကိုပ်ဝန်ဇၞော်၊ ညးတာလျိုၚ် သ္ကိုပ်ဌာနနာနာ အဆံၚ်ကောန်ရုၚ်သၟဝ်တံ စသြန် ကေတ်လာဘ်ဗဇဴ နွံကီုလေဝ် မုလေဝ် ပရေၚ်ကေတ်အရေဝ် ဟၟဲကၠုၚ်ဏီရ။
ပရိုၚ်-သြၚ်လောန်တိုၚ်မ်
Photo – MOI