နယူဒေလဳ၊ ဖေဖဝ်ဝါရဳ ၆
ပ္ဍဲအေန္ဒိယ ကောန်ၚာ်သၟဝ်အယုက် ၁၆ တံ စကာမံၚ်မဳဒဳယာပရေၚ်မၞိဟ်ဂှ် ညံၚ်ဂွံဗဒေါအ်ကဵု ပရေၚ်အာတ်မိက်ဂၠိုၚ်တိုန်မံၚ်တုဲ ဝန်ဇၞော်တွဵုရးဂမၠိုၚ်တံ ဆက်လ္ၚတ်မံၚ်ဥပဒေ အဝ်သတေလျချူခၞံလဝ် ပရေၚ်မဳဒဳယာမဟာဇန်တံရ။
ယဝ်ရဒၞာတာထောံ ကောန်ၚာ်တံစကာသုၚ်စောဲ မဳဒဳယာမဟာဇန်မ္ဂး စိုပ်တရဴဍာံဍာံဟာ ဝန်ဇၞော်နူကဵုဒေသသၠုၚ်ကျာ တွဵုရးၜါဒၞာဲဂှ် ဟီုလဝ်ရ။
ဒုၚ်သ္ဇိုၚ်ကဵုအယုက်ကောန်ၚာ်တံတုဲ သွက်ဂွံကၠောန်အာ ပရေၚ်ဒၞာတာဂှ် ဂကောံ သ္ကိုပ်ကဵုကသပ်ပရေၚ်ပိုန်ဒြပ်အေန္ဒိယ ဟီုလဝ်ရ။
ဆဂး စပ်ကဵုပရေၚ်တာဒၞာဗီုတံဏံ ပ္ဍဲအေန္ဒိယလောဲသွာဟွံသေၚ်တုဲ ဒးဇီုကပိုက်ကဵု ပရေၚ်ဥပဒေတံမာန်ရောၚ် တၠပညာတံ ကဵုလဝ်သတိရ။
ပ္ဍဲအဝ်သတဝ်လျ ကၟာတ်ဒၞာလဝ် သၟဝ်အဝဲအယုက် ၁၆ သၞာံတံ အခေါၚ်စကာမဳဒဳယာမဟာဇန်ဂှ် ပ္ဍဲကဵုဂၠးကဝ်မ္ဂး ဒှ်ဍုၚ်မာတ်ဒၞာ ပထမကိုပ်ကၠာအိုတ်မွဲရ။
အတိုၚ်ဥပဒေ အဝ်သတေလျတၟိမ္ဂး ဒးစၟဳစၟတ်သ္ပအာဒတန် ရဲစကာမဳဒဳယာမဟာဇန်တံတုဲ အကံက်အဝဲ ၁၆ သၞာံတံဂှ် ဒးဗက်မာတ်အာ မဒှ်ရ။
ဟိုတ်နူပရေၚ်ဒၞာတာ အဝ်သတဝ်လျ ဗီုဏံဂှ် ကာန်ပနဳမဳဒဳယာမဟာဇန်တံ ပတိုန်ဒုဟ်ဟီုဂးပါ်ပါဲမံၚ်အိုတ်ရ။
လောန်ကၠုၚ်သတ္တဟတုဲကၠုၚ်ဏံ ပ္ဍဲပြၚ်သေတ် အဝဲအယုက်သၟဝ် ၁၅ သၞာံတံ ညံၚ်ဂွံဗဒေါအ် ပရေၚ်စကာသုၚ်စောဲ မဳဒဳယာမဟာဇန်ဂှ် နူကဵုစၠတ်ဓဝ်သၟဝ် သ္ပလဝ်ဒတန် ဥပဒေအပြောံ ဒၞာဲတာမဳဒဳယာမဟာဇန်တံရ။
ဆဂး ပရေၚ်တာဒၞာပ္ဍဲကဵုပြၚ်သေတ် လမျီုညံၚ်ဂွံလုပ်မာန် နူကဵုစၠတ်ဓဝ်အဆံၚ်လ္တူ ဒးဆက်သ္ပအာဒတန်နွံမံၚ်ဏီ။
သွက်ဂွံဗဒေါအ်အာ ကောန်ၚာ်တံ စကာမဳဒဳယာမဟာဇန်ဂှ် နူကဵုဍုၚ်အဂႅလိက် ချပ်မံၚ်တုဲ လ္ၚတ်မံၚ်ဥပဒေ အဝ်သတေလျတံ ချူလဝ်ဂှ်ရ။
ပ္ဍဲအေန္ဒိယ တွဵုရးအာန်ဒရာပရာဒက်ဆ် ညံၚ်ဂွံမာတ်ထောံမဳဒဳယာမဟာဇန် ကောန်ၚာ်သၟဝ်အယုက် ၁၆ သၞာံတံဂှ် နူကဵုဗော်ဂွံအဝဵု ပၠုပ်လဝ်ဂလာန်တုဲ မဒှ်ရ။
ပရေၚ်ဏံ ၜိုန်ရဟွံသ္ပစၞး မူဝါဒအလဵုအသဳကီုလေဝ် ပ္ဍဲကဵုစၠတ်ထဝ် ကိစ္စဒးသဳကၠဳဇၞော်ဇၞော်မွဲ ဒှ်မာန်ရောၚ်။
မဳဒဳယာမဟာဇန်တံဂှ် ဗွဲတၟေၚ် သွက်ညးဗြဴတံကဵု ကောန်ၚာ်တံ ထေက်ကဵုဒးဒှ်ဒၞာဲ ပဵုအန္တရာဲဗၠးၜးမွဲရောၚ် ဝန်ဇၞော်တွဵုရး ပရိုၚ်ကေုာံနဲကဲပညာ နာရာ လိုကက် ဟီုရ။
ပ္ဍဲကဵုတွဵုရးတၞဟ်ဟ်တံလေဝ် အစဳဇန်တုပ်ကဵုဗီုတံဏံ သွက်ဂွံကၠောန်အာ စိုတ်လုပ်စမံၚ်ရောၚ် ဟီုဂးမံၚ်အိုတ်ရ။
Ref:BBC