ကျာ်ထဝ်၊ ဖေဖဝ်ဝါရဳ ၁၆
တွဵုရးမန် ပ္ဍဲပွိုၚ်ဍုၚ်ကျာ်ထဝ် ကရောၚ်ပၞာန်ဒပ်ပၞာန်ဗမာထပက်မံၚ်ဂှ်တုဲ အကြာၜါလပါ် ပေါဲဗတိုက်ဆက်ဒှ်မံၚ်ရောၚ် ဒပ်ပၠန်ဂတးတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူကဵုဖေဖဝ်ဝါရဳ ၉ ဂှ် ဒပ်ပၞာန်ဗမာဇြဟတ်ၜိုတ် ၂၅၀ ထပက်ကၠုၚ်ကရောၚ်ပၞာန်ဂှ် ပ္ဍဲကဵုဂအုံကွာန်ခရုဲကဵု ဂအုံကွာန်ဝေၚ်ကာန် ပွိုၚ်ဍုၚ်ကျာ်ထဝ် အကြာဒပ်ၜါလပါ်ပေါဲဗတိုက်သ္ကာတ်မြဟ် ဒှ်လဝ်ရောၚ်။
ပ္ဍဲဖေဖဝ်ဝါရဳ အခိၚ်နူဂယးဂှ်လေဝ် ပ္ဍဲကဵုကွာန်ပလိုၚ်တၟအ် ပွိုၚ်ဍုၚ်ကျာ်ထဝ် ပေါဲဗတိုက်ဆက်ဒှ်မံၚ်တုဲ နူကဵုကဝ်မယှေန်ပၞာန် ပန်မံၚ်လွဟ်ဇၞော် အဆက်က်ရောၚ် သ္ဂးရ။
ဒပ်ပၞာန်ဗမာ ဖျေံလဝ်ဒပ် ပ္ဍဲကွာန်ပလိုၚ်တၟအ်ဂှ်လေဝ် ရပ်လဝ်ညးဒေသ ၆၀ ပြင်တုဲ သ္ပလဝ်ဂဒံၚ်မၞိဟ်တံဂှ် ညးဒေသတံ ဟီုရ။
ဟိုတ်နူကရောၚ်ပၞာန်ဗမာ ဟွံကလေၚ်ဆုတ်အာဂှ် အကြာၜါလပါ်ပေါဲဗတိုက်သ္ကာတ်တ်မြဟ်ဟ် ဆက်ဒှ်အာမာန်ပၠန်ရောၚ် ဒပ်ပၠန်ဂတးတံ သ္ဂးရ။
ဟိုတ်နူဒပ်ပၞာန်ဗမာပန်လဝ် အကြာပေါဲဗတိုက် ပွိုၚ်ဍုၚ်ကျာ်ထဝ်ဏံဂှ် ညးဒေသ ၄ တၠ ချိုတ်လဝ်တုဲ ၄ တၠ ဒးလဝ်ဝပ်နွံရ။
ဟိုတ်နူဒပ်ကဝ်မယှေန်ပၞာန် ထပက်ကရောၚ်ပၞာန်ကီု ပေါဲဗတိုက် ဒှ်လဝ်ကီုတုဲ ညးဒေသနူကဵု ဂအုံကွာန်အလူလေဝ်၊ ဂအုံကွာန် ဂြိုပ်သၠဗြာတ်၊ ဂအုံကွာန်ခရုဲကဵု ဂအုံကွာန်ဝေၚ်ကာန်တံ ၁၉ ကွာန်ဂှ် ညးဒေသ ၁၂၀၀၀ ပြၚ် ဒးဂြိပ်ပါဲမံၚ်ဘဲပၞာန်ရ။
သွက်ရဲဒဴပၞာန်တံ နွံမံၚ်ပၟိက်ကဵု ပရေၚ်အထံက်ပၚ်ကာမံက်တိုန် ပရေၚ်ဗ္ဒာရဏာမၞိဟ် မပ္တံကဵု ဒၞာဲဒၟံၚ်၊ စၞစသုၚ်ဇွောံမ၊ ဂဥုဲဇဗနာနာ တံရောၚ် KNU ဗဟဵု လလောၚ်တြးလဝ်ရ။
ပရိုၚ်-သြၚ်လောန်တိုၚ်မ်
Photo – CJ