သာန်ဖရာန်သေတ်သကို၊ ဖေဖဝ်ဝါရဳ ၂၀
အေန်တာနိတ် Starlink သွက်ဒပ်ရတ်ယှာတံ စကာမံၚ်ဂှ် အဳလောန်မာတ်သာ် ထပိုတ်ထောံဂှ် အကြာကောန်ပၞာန်ရတ်ယှာတံ ယှုက်ထုဲအာတုဲ ပ္ဍဲကဵုမုက်ပၞာန်ဂှ် သွက်ဒပ်ယူခရုၚ်တံ ဒှ်အာတင် ဂွံဇြဟတ်ရ။
ဆဂး ထပိုတ်လဝ်လိုၚ်အေန်တာနိတ် သွက်ဒပ်ပၞာန်ရတ်ယှာတံ ၜိုတ်အခိၚ်လဵု လအ်မံၚ်ဏီဂှ် ဟွံဂွံတီဏီပုဟ်။
အခိၚ်ကာလ ဒပ်ရတ်ယှာတံ စကာအေန်တာနိတ်ဟွံဂွံဏံ ဒပ်ယူခရုၚ်တံ မုထ္ၜးအစောန်မာန်ရောၚ် ဒးမၚ်ရံၚ်အာပၠန် မဒှ်ရ။
ဟိုတ်နူဒပ်ပၞာန်ရတ်ယှာတံ စကာလိုၚ်အေန်တာနိတ်ဟွံဂွံတုဲ ပရေၚ်ထပက်ပၞာန် ၜိုတ် ၆၀% ယအ်အာရောၚ် နူဒပ်ပၞာန်ယူခရုၚ် သ္ကိုပ်ထိၚ်ချုက်ဒရုၚ်မွဲတၠ ဟီုရ။
လိုၚ်အေန်တာနိတ် အဳလောန်မာတ်သ်ဂှ် ဟိုတ်နူဒပ်ပၞာန်ရတ်ယှာတံ စကာဟွံဂွံတုဲ ပရေၚ်ဒရုၚ်ဍေံတံပဝ်ဗတိုက်မံၚ်တံ ယအ်စှ်ေအာနွံ ဂွံတီရ။
ညံၚ်ဂွံကၟာတ်ကဵု လိုၚ်အေန်တာနိတ် ဒပ်ရတ်ယှာတံ စကာမံၚ် Starlink ဂှ် ဝန်ဇၞော်ပရေၚ်စဵုဒၞာယူခရုၚ် မဳခေဝ်လို ဖိဒိုရအ်ဗက် အာတ်မိက် ကာန်ပနဳ SpaceX တုဲ ဒပ်ရတ်ယှာတံ သုၚ်စောဲလိုၚ်အေန်တာနိတ်ဟွံဂွံ မဒှ်ရ။
ဆဂး သွက်ဂွံခါတ်အကာဲ သၞောတ်ထ္ၜတ်ပရေၚ်ဇီုကပိုက်မာန်ဂှ် အခိၚ်ပြဟ်မံၚ်ဏီရောၚ် ညးတာလျိုၚ်ပၞာန် ယူခရုၚ်တံ ဟီုရ။
ပ္ဍဲမွဲဒမြိပ်မုက်ပၞာန်ဇမၠိၚ်ဂှ် နူဒေသလ္ၚဵု ဒပ်ရတ်ယှာတံ ကလေၚ်ဆုတ်မံၚ် ဂွံတီရ။
အကြာပေါဲဗတိုက် ပွိုၚ်ပန်သၞာံဏံ လိုၚ်အေန်တာနိတ် SpaceX ဂှ် သွက်ဒပ်ပၞာန်အကြာၜါဍုၚ် ပရေၚ်ဆက်စၠောံ စိုပ်မံၚ်တရဴကွေံကွေံရောၚ်။
ဆဂး စနူဖေဖဝ်ဝါရဳ ၁ တုဲ ပါဲနူဒၞာဲ ဌာနဝန်ဇၞော်ပရေၚ်စဵုဒၞာယူခရုၚ် စၟတ်ကဵုလဝ်တုဲ ပရေၚ်ပလံၚ်ကဵုလိုၚ်အေန်တာနိတ်တံဂှ် နူကာန်ပနဳဏံ ကၟာတ်ထောံရ။
အလုံဍုၚ် ပူဂဵုပုဂ္ဂလိက ညးမိက်ဂွံစကာအာတံ နကဵုယၟုညးတံ ဒးကလေၚ်ပတိုန်ယၟုစၟတ်သမ္တီတၟိရောၚ်။
ညးတာလျိုၚ်ရတ်ယှာတံ ညံၚ်ဂွံစကာအာလိုၚ်အေန်တာနိတ်မာန်ဂှ် စၞးညးတံ သွက်ဂွံပတိုန်အာစၟတ်သမ္တီမာန် ထပက်လာဘ်တုဲ စကာမံၚ်နွံရောၚ် ပရိုၚ်တိတ်မံၚ်ရ။
ဒပ်ပၞာန်ရတ်ယှာတံ အခိၚ်လၟုဟ် စကာမံၚ် လိုၚ်အေန်တာနိတ်ဇုက်တံရောၚ် ဂွံတီရ။
ပြဟ်ဟ်ဏံ ဒပ်ရတ်ယှာတံ ဗီုကၠာတေံ စကာဒရုၚ် နကဵုဇြဟတ်ပေၚ်ၚ်တုဲ ဗတိုက်ဟွံမာန်ပုဟ် ရိုဟ်ကၞက်ပရိုၚ် လပါ်ပၞာန်ယူခရုၚ်တံ ဟီုဂးမံၚ်ရောၚ်။
Ref:BBC