မတ်မလီု၊ အေဗရာ ၈
အပ္ဍဲကဵုကဝ်မယှေန်ပၞာန်သီအဝဵု ဂကောံအလဵုအသဳတွဵုရးမန်တၟိ ဒၞာဲသ္ကိုပ်ဝန်ဇၞော်ကေုာံ ဝန်ဇၞော်ဗွဲမဂၠိုၚ်ဂှ် ညးစၞးဒပ်ပၞာန်ကေုာံ ဗော်ပျဳခိုင်ဖျိုဝ်တံ ကေတ်လဝ်ရ။
အပ္ဍဲဂိတုအေဗရာ ၆- ၇ ကၠောန်ဗဒှ်လဝ် ကောံဓရီုစၠတ်ဓဝ်တွဵုရးမန်ဂှ် ညးဒစဵုဒစးဟၟဲ သ္ပဒတန်ခါန်ကၞက်ကဵုလဝ် သ္ကိုပ်ဝန်ဇၞော်ကေုာံ ဝန်ဇၞော် ဂကောံအလဵုအသဳ တွဵုရးမန်တံဂှ်ရောၚ်။
အပ္ဍဲကဵုဝန်ဇၞော် ၁၁ တၠ သ္ပဒတန်ခါန်ကၞက်ကဵုလဝ်ဂှ် ညးစၞး နူဗော်ညဳသၟဟ်မန် ၂ တၠ၊ ညးစၞးနူဗော်တောတက် ကောန်ဂကူပအိုဝ် ၁ တၠဟေၚ် ပါလုပ်တုဲ ဒၞာဲဝန်ဇၞော် ၈ တၠသှ်ေမံၚ်တံဂှ် ရဲဒပ်ပၞာန်ကေုာံ ဗော်ပျဳခိုင်ဖျိုဝ်တံ ကေတ်လဝ်ဒၞာဲ သီုဖအိုတ်ရ။
ညးစၞးဒပ်ပၞာန် ဒုသ္ကိုပ်ပၞာန် အံၚ်ဝေန်တာန်ဂှ် ဒှ်သ္ကိုပ်ဝန်ဇၞော် တွဵုရးမန် ကေုာံ သ္ကိုပ်ဗိုလ်ဇၞော် ကျဝ်သွာမျေတ်တံဂှ် ကေတ်လဝ်ဒၞာဲ ဝန်ဇၞော် ပရေၚ်ဂီုကၠီုကေုာံ ပရေၚ်ဒေသပယျဵု ရ။
ညးစၞးဗော်ပျဳခိုင်ဖျိုဝ် ဥူတေန်ဇြဝ်ထောန် ဂှ် ဝန်ဇၞော်ပရေၚ်မၞိဟ်၊ ဥူမေန်ဇေယျာဥူဂှ် ဝန်ဇၞော်ဓာတ်လလဳ၊ အစောမ်သၟူဓါတ်၊ ကွတ်စက်ကေုာံ ပရေၚ်ဆက်စၠောံအာကၠုၚ်၊ ဥူမေန်မျေတ်မိုၚ်လေဝ် ဂှ် ဝန်ဇၞော်တဵုလွဳ၊ လွဳလွတ်ကေုာံကၟာၚ်ဍာ်၊ ညးဒုၚ်သြဇာဒပ်ပၞာန် ဒံက်တာ အံၚ်မျာတ်ကျဝ်သိၚ်ဂှ် ဒှ်ဝန်ဇၞော်ပရေၚ်ဂဵုလဟဵုသာယာ တံ ကေတ်လဝ်ဒၞာဲအိုတ်ရ။
တုဲပၠန် ညးစၞးဗော်ပျဳခိုင်ဖျိုဝ် ဥူမျဵုမေန်လှိုင်ဂှ် ဒှ်ဝန်ဇၞော် ကောန်ဂကူဗၟာ၊ ဥူသဝ်အံၚ်ကျဝ်တိၚ် ဂှ် ဒှ်ဝန်ဇၞော် ကောန်ဂကူကရေၚ် ဂွံလဝ်ဒၞာဲကီုရ။
ညးစၞးဗော်ညီသၟဟ်မန် ၂ တၠ နာဲလျးတၟး ဂှ် ဝန်ဇၞော်ပရေၚ်ကိုန် အစဳဇန်ကေုာံ ပရေၚ်ဘဏ္ဍာ၊ မိလွဳဟာန် ဂှ် ဝန်ဇၞော်သယံဇာတ ကေုာံ ပရေၚ်မၚ်မွဲထိၚ်ဒဝ်ပွဳပွူသဘာဝ၊ ညးစၞးဗော်တောတက် ကောန်ဂကူပအိုဝ် ဥူချေတ်တိၚ် ဂှ် ဒးဒုၚ်ခါန်ကၞက် ဝန်ဇၞော် ကောန်ဂကူပအိုဝ် မဒှ်ရ။
အပ္ဍဲကောံဓရီုစၠတ်ဓဝ် တွဵုရးမန်ဂတဏံမ္ဂး ညးဒးဒုၚ်ခါန်ကၞက်လဝ် သ္ကိုပ်ဝန်ဇၞော်ကေုာံဝန်ဇၞော် အပ္ဍဲဂကောံအလဵုအသဳ တွဵုရးမန်တံဂှ် သွက်ဂွံဒုၚ်ဂတိ ယဵုသစ္စာနွံရောၚ် ဂွံတီကေတ်ရ။
ပရိုၚ် – သြၚ်လောန်တိုင်မ်
Photo – MOI