လံၚ်လုၚ်၊ အေဗရာ ၂၃
ပ္ဍဲရးတနၚ်သဳ ပွိုၚ်ဍုၚ်လံၚ်လုၚ် ကွာန်ညှေန်မဝ်ဂှ် ဟိုတ်နူ ဒပ်ကဝ်မယှေန်ပၞာန် ထပက်လုပ်ကၠုၚ်ကရောၚ်ပၞာန်တုဲ ညးဍုၚ်ကွာန်တံ ဒးဂြိပ်ပါဲမံၚ် ဘဲပၞာန်အလုံမွဲကွာန်ရောၚ် ညးဒေသတံ ကေုာံ ဂကောံဇြဟတ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
ပ္ဍဲဂိတုအေဗရာ ၂၂ အခိၚ်နူဂယး ၃ နာဍဳပြၚ်ၚ်ဂှ် နူလ္တူဍုၚ်လံၚ်လုၚ် မွဲကဆံၚ် နူကဵုဒပ်ကဝ်မယှေန်ပၞာန် ထပက်လုပ်ကၠုၚ်ကရောၚ်ပၞာန် အပ္ဍဲကွာန်ညှေန်မဝ်ရ။
စနူကၠာဟွံစိုပ်အခိၚ်အတးတေံရ ဒပ်ကဝ်မယှေန်ပၞာန် ပကောံလဝ်ဇြဟတ် ပ္ဍဲလ္တူဍုၚ်လံၚ်လုၚ်တုဲ ပြဟ်ဟ်ဏံ ပရေၚ်ချဳဒရာၚ်ပၞာန် ညိၚ်မံၚ် ပ္ဍဲပွိုၚ်ဍုၚ်လံၚ်လုၚ်ဂှ် ကလေၚ်ထပက်ကၠုၚ်ကရောၚ်ပၞာန်မွဲဝါပၠန် မဒှ်ရ။
ဟိုတ်နူကဵု ဒပ်ကဝ်မယှေန်ပၞာန် ထပက်ကရောၚ်ပၞာန်တုဲ သ္ၚိဌာန်ကွာန်ညှေန်မဝ် မၞုံပွဳပွူ ၇၀၀ မဂှ် ညးဒေသတံ စနူကဵု နူဂယးပြဟ်တေံ ဒးဂြိပ်ပါဲဒဴဘဲပၞာန် သီုအလုံမွဲကွာန်ရောၚ် ကောန်သ္ဂံၚ်ဒပ်စဵုဒၞာညးဍုၚ်ကွာန် ပွိုၚ်ဍုၚ်လံၚ်လုၚ်မွဲတၠ ဟီုရ။
ပြဟ်ဟ်ဏံ ပ္ဍဲဘာဗတောန်လိက် ကွာန်ညှေန်မဝ် ကေုာံ သ္ၚိဌာန်ညးဍုၚ်ကွာန်တံဂှ် ဒပ်ကဝ်မယှေန်ပၞာန်တံ ဖျေံလဝ်ဒၞာဲကီုလေဝ် ပရေၚ်ရပ်စပ်ညးဍုၚ်ကွာန်တံ ဟၟဲဏီပုဟ် သ္ဂးရ။
ပ္ဍဲဂိတုဂျာန်နဝါရဳ ၂၉ တုဲကၠုၚ်ဏံလေဝ် အခိၚ်ဒပ်ကဝ်မယှေန်ပၞာန် ထပက်လုပ်ကၠုၚ်ကရောၚ်ပၞာန် ပ္ဍဲကွာန်ညှေန်မဝ်ဂှ် ဒးဒုၚ်ကြတ်ဗတိုက်အကြာဂၠံၚ်တုဲ သီုကောန်ၚာ်အာယုက် ၆ သၞာံ၊ ညးဍုၚ်ကွာန် ၁၀ တၠဟွံအောန်တံဂှ် ဒးရပ်ဏာလဝ်နွံ ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – CJ