မတ်မလီု၊ အေဗရာ ၂၄
အပ္ဍဲတွဵုရးမန် အပ္ဍဲဂိတုဏံ ဟိုတ်နူ အသိၚ်ကတဴကာတ်သၠုၚ်တိုန်တုဲ တိရစ္ဆာန်လွဳလဝ် အပ္ဍဲကမၠောန်လွဳလွတ်တံ ချိုတ်ကၠုၚ်မံၚ်ရောၚ် ညးကၠောန်ကမၠောန်လွဳလွတ်တံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
တိရစ္ဆာန်လွဳလွတ်လဝ် စာၚ်၊ ကၠိက် ကေုာံ အဒါတံ ဟိုတ်နူအသိၚ်ကတဴ သ္ကာတ်မြဟ်လောန်တုဲ အတၚ်ကၠေၚ်က္ဍဟ်ပိုတ် ချိုတ်အာလေဝ်နွံ တုပ်သာ်ဂှ်ကီု ပ္ဍဲကၟာဝဳကလ္ၚဵုတံလေဝ် ဟိုတ်နူ အသိၚ်ကတဴသၠုၚ်တိုန်ဂှ်ရ ဍာ်ကၟာလေဝ်ကတဴတုဲ က လ္ၚဵုတံဂှ် ချိုတ်မံၚ်နွံရ။
တုဲပၠန် အပ္ဍဲဥတုအခိၚ်ကတဴလၟုဟ်ဏံ ဂဥုဲသွက်တိရစ္ဆာန် နွံပၟိက်တံ င္ၚုဟ်သၠုၚ်မံၚ်ဂှ်ရ ဗီုအခိၚ်ကၠာတေံ ဖျုၚ်ကဵုဟွံမာန်တုဲ ချိုတ်အာသၟး ဟွံက၊ ဟိုတ်နူအခက်အခုဲကၠေၚ်စက် ပၠုပ်ဍာ်ရုံရုံဂပ်ပ်ဟွံမာန်တုဲ ချိုတ်အာတံလေဝ် နွံမံၚ်ရ။
ဟိုတ်နူ အသိၚ်ကတဴကတာန်သ္ကာတ်ထတ်လောန်တုဲ ပ္ဍဲခြိုၚ်စာၚ်လ္ၚဵုတံ အတၚ်ကၠေၚ်က္ဍဟ်ပိုတ်အာ စဵုကဵု ၄၀ က္ဍိုပ်ကၠမ် ချိုတ်အာလဝ် ဂွံဆဵုမံၚ် ညံၚ်ရဴသာ်ဂှ်ကီု၊ ပ္ဍဲခြိုၚ်ကၠိက်လ္ၚဵုတံလေဝ် ဟိုတ်နူအသိၚ်ကတဴ ယဲဇွဟ်တိုန်သ္ကာတ်တုဲ ချိုတ်အာမွဲလစုတ်ဓဝ် တံလေဝ် ဂွံဆဵုမံၚ်ရောၚ် ညးကၠောန်ကမၠောန်လွဳလွတ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
“ဒှ်အခိၚ် ဒးလွဳလွတ် ထိၚ်ဒဝ်ဝါတ်ကွေံကွေံရ။ ဍာ်လေဝ်ကှ်၊ ဍာ်လေဝ်အောန်။ မွဲပၠန်ဂှ် အတၚ်ကၠေၚ်က္ဍဟ်ပိုတ်ဂှ် ဒးဖေက်ကွေံကွေံရ။ ခြိုၚ်လ္ၚဵုတှ်ေ စဵုကဵု ၃၀ က္ဍိုပ်ကၠမ်၊ ၄၀ က္ဍိုပ်ကၠမ် ချိုတ်အာလေဝ်နွံ၊ ကၠိက်တံလေဝ် ပ္ဍဲအခိၚ်အသိၚ်ကတဴသ္ကာတ်မြဟ်ဗီုဏံမ္ဂး ယဲဇွဟ်ကၠိက်သ္ကာတ်တိုန် ဗီုတံဏံတုဲ ချိုတ်အာမွဲလစုတ်ဓဝ်တံလေဝ် ဂွံဆဵုမံၚ်ရ” သာ်ဝွံ သ္ဂးရ။
ဟိုတ်နူအသိၚ်ကတဴ ဆက်သ္ကာတ်မြဟ်မံၚ်တုဲ သွက်ညးကၠောန် ကမၠောန် လွဳလွတ်တံ ဒှ်အခိၚ် ဒးစွံဂရု လွဳလွတ် တိရစ္ဆာန်တံတုဲ ယဝ်ရ ဟွံစွံဂရုမ္ဂး လၟိဟ်ချိုတ်တံသၠုၚ်တိုန်ဂှ်ရ ပရေၚ်ဒးဆောံလေၚ်တံ ဂၠိုၚ်တိုန်မာန်ရောၚ် ညးဆက်ဟီုရ။
ကမၠောန်လွဳလွတ် အပ္ဍဲဒေသတံဏံမ္ဂး ဟိုတ်နူစရိတ် ဒးပတိတ်လဝ်တမ်ရိုဟ်သၠုၚ်၊ စရိတ်ဂဥုဲက္ဍၚ်၊ စရိတ်ပလံၚ်ဗစိုပ်တံဂၠိုၚ် သီုစရိတ် ပတိတ်ကပေါတ်တံသၠုၚ်တိုန်မံၚ်တုဲ ဗီုအခိၚ်ကၠာတေံ လွဳလွတ်လဝ် ဂၠိုၚ်ၚ်ဟွံမာန်တုဲ ၜိုတ်သ္ပမာန်ဟေၚ် လွဳလွတ်မံၚ်အိုတ်ရောၚ်။
ကမၠောန်လွဳလွတ် အပ္ဍဲတွဵုရးမန်မ္ဂး ကမၠောန်လွဳစာၚ်၊ ကၠိက်၊ အဒါ ၊ က တံဂှ် ကၠောန်မံၚ်အဓိကတုဲ ကမၠောန်ဝဳ ဗၜေအ်၊ ဂၠဴ ကဵု ဂစေမ်ဟဂိတ်တံ ဂှ်တှ်ေ ၜိုတ်သ္ပမာန် လွဳလွတ်မံၚ် မဒှ်ရ။
ပရိုၚ် – သြၚ်လောန်တိုၚ်မ်
Photo – CJ