ရေဝ်၊ အေဗရာ ၂၃
ပ္ဍဲတွဵုရးမန် ပွိုၚ်ဍုၚ်ရေဝ် ကရပ်ကွာန်ကမ်လှ ပ္ဍဲဂိတုအေဗရာ ၂၂ အခိၚ်နူဂယး ၈ နာဍဳပြၚ်ၚ်ဂှ် ပေါဲဗတိုက်ဒှ်မံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ် ရ၊
ဟိုတ်နူကောန်ပၞာန် နူတမ်ဒပ် ခမရ ၅၈၃ ဖျေံလဝ်သ္ဇိုၚ်ပ္ဍဲရေဝ် ကၠုၚ်ဖျေံဒၞာဲမၚ်အောပ် ကၚ်ဒမၠုက်ဂှ် ဂကောံ “လကိုဟ်ရေဝ်” တံ ကြတ်ဗတိုက်ဂွံတုဲ ပေါဲဗတိုက်ကတဵုဒှ်လဝ်ရောၚ်။
ဟိုတ်နူပေါဲဗတိုက်အကြာၜါလ္ပာ်ဒှ်အာတုဲ ညးအာကၠုၚ်ဂၠံၚ်တံကဵု ညးဒေသတံ ဒးဂြိပ်ပါဲအာ ဒၞာဲဗၠးဘဲတံ မွဲခဏကီုရောၚ် ညးဒေသမွဲတၠ ဟီုရ။
အပ္ဍဲပေါဲဗတိုက်ဏံမ္ဂး အကာဲအရာဒးဝပ်ချိုတ်တံ ဟွံဂွံတီဏီကီုလေဝ် ကြဴနူပေါဲဗတိုက်ဒှ်အာတုဲ လပါ်ဒပ်ပၞာန်တံ ကၟာတ်ထောံဂၠံၚ်ဂှ် လံကြပ်ၜိုတ်ပွိုၚ်မွဲနာဍဳတုဲမှ ကလေၚ်ပံက်ကဵုဂၠံၚ်ပၠန်ရောၚ် သ္ဂးရ။
ပရေၚ်ပေါဲဗတိုက်ဏံဂှ် ဗီုလဵုကောန်ပၞာန် ဒပ်ကဝ်မယှေန်ပၞာန်တံ ဒးဝပ်ချိုတ်လဝ်ဂှ် ဂၠိုက်ဂၠာဲစၟဳစၟတ်မံၚ်ဖိုဟ်ရောၚ် က္ဍိုပ်သ္ကိုပ်ဂကောံ “လကိုဟ်ရေဝ်” ချူလဝ်ပ္ဍဲဇာဖိုၚ်မှာဇန်ညးတေံရ။
ပ္ဍဲပွိုၚ်ဍုၚ်ရေဝ် အကြာဒပ်ကဝ်မယှေန်ပၞာန်ကဵု ဂကောံဒပ်ပၠန်ဂတးတံ ပေါဲဗတိုက်တံ မွဲဏှမွဲဏှ ဇီုကပိုက် ကတဵုဒှ်မံၚ်တုဲ ပရေၚ်ဒးဝပ်ချိုတ်လဝ် သီုၜါလ္ပာ်လေဝ် နွံမံၚ်ကီုရ။
ပရိုၚ် – သြၚ်လောန်တိုၚ်မ်
Photo – Social Media