မတ်မလီု၊ အေဗရာ ၂၃
ပ္ဍဲတွဵုရးမန် စနူဂိတုအေဗရာ ၂၂ ဏံ သုၚ်စောဲသၞောတ် QR Code တုဲ စသွံကဵုမံၚ်ကၠေၚ်စက်တံယျရောၚ် ညးတာလျိုၚ် ဆေၚ်သွံကၠေၚ်တံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
သွက်အခေါၚ်ဂွံရာန်အာ ကၠေၚ်စက်မ္ဂး နူကဵုဆေၚ်သွံကၠေၚ်တံ ဖန်ဇန်ကဵုမံၚ် QR Code တုဲ တန်တဴကဵု ဂကူစက်ယာန်ကဵု ဇြဟတ်စက်တံတုဲ သွက်ပွိုၚ်မွဲသတ္တဟမ္ဂး လၟိဟ်ပမာဏကၠေၚ်စက် ၜိုတ်ကဵု သွက်ဂွံရာန်ဂွံမာန်ဂှ် စၟတ်သမ္တီကဵုလဝ်နွံရ။
အတိုၚ်သၞောတ်ဗ္ၜတ် စၟတ်သမ္တီလဝ်မ္ဂး သွက်ကွဳလိုန်ဓါတ် (ဆိုင်ကယ်) မွဲမမ္ဂး ပ္ဍဲမွဲသတ္တဟ ၈ လေတ် ၜါဝါ ရာန်ဂွံတုဲ၊ သွက်ကွဳလိုန်ဓါတ်သၠာပိ ၂၅ လေတ်၊ သွက်ထဝ်လာဂျဳ ၃၀ လေတ်တံ ရာန်ဂွံ ပိပိဝါ မဒှ်ရ။
တုဲပၠန် သွက်ကွဳစက်သ္ၚိ ကေုာံ ကွဳစက်ဌာနနာနာတံဂှ်တှ်ေ စဵုကဵု ၂၀၀၀ သဳသဳမ္ဂး ၃၅ လေတ်၊ ၂၀၀၀ သဳသဳလ္တူ စဵုကဵု ၃၀၀၀ သဳသဳမ္ဂး ၄၀ လေတ် ကေုာံ ၃၀၀၀ သဳသဳလ္တူမ္ဂး ၄၅ လေတ်ဂှ် ပ္ဍဲမွဲသတ္တဟ ၜါဝါ ရာန်ဂွံမာန်ရောၚ်။
သွက်ကွဳစက် Taxi ဂၞန်ဗကေတ်တံဂှ်တှ်ေ စဵုကဵု ၂၀၀၀ သဳသဳမ္ဂး ၉၀ လေတ်၊ ၂၀၀၀ သဳသဳလ္တူ စဵုကဵု ၃၀၀၀ သဳသဳမ္ဂး ၁၀၀ လေတ် ကေုာံ ၃၀၀၀ သဳသဳလ္တူမ္ဂး ၁၁၀ လေတ်တံဂှ် ပ္ဍဲမွဲသတ္တဟ ပိဝါ ရာန်ဂွံမာန် မဒှ်ရ။
တုဲပၠန် သွက်ကွဳစက်တၞဟ်တံလေဝ် အတိုၚ်ဇြဟတ်စက်ဂှ် ပမာဏသွက်ဂွံရာန်အာ ပ္ဍဲပွိုၚ်မွဲသတ္တဟမာန်ဂှ် စၟတ်သမ္တီကဵုလဝ်တုဲ သွက်ကွဳစက်ပရေၚ်ရီုဗၚ်ဟံၚ်ပြာ်မှာဇန်၊ ကွဳစက်ဖ္ဍိုက်မၞိဟ်ယဲ၊ ကွဳစက်နိဗ္ဗာန် ကေုာံ ကွဳစက်သီဟမှိက် ဌာနဗဂဵုလဟဵုဍုၚ်ကွာန်တံဂှ်တှ်ေ တင်စၟတ်ပိုၚ်ခြာခုတ်လဝ်ဟၟဲ အတိုၚ်ညးတံနွံပၟိက်ဂှ် စၟဳစၟတ်တုဲ သွံကဵုအာရောၚ် သ္ဂးရ။
သွက်စက်ယာန်ကွဳလိုန်ဓါတ် ကွဳစက်တံမ္ဂး ပမာဏကၠေၚ်စက် ၜိုတ်လဵုဂွံအခေါၚ်ရာန်ဂွံ ပ္ဍဲပွိုၚ်မွဲသတ္တဟဂှ် စၟတ်သမ္တီကဵုလဝ်ကီုလေဝ်၊ သွက်ကမၠောန်တဵုလွဳတံကဵု ကမၠောန်တၞဟ်ဟ် ဒးသုၚ်စောဲကၠေၚ်စက်တံဂှ်တှ်ေ တင်စၟတ်ပိုၚ်ခြာလဝ် တၞဟ်ခြာ ဟၟဲဏီပုဟ်။
နကဵုသမ္မတသီအဝဵု ခါန်ကၞက်ကဵုလဝ် ဥူအံၚ်ဝေန်တာန် သ္ကိုပ်ဝန်ဇၞော်တွဵုရးမန် ဟိုတ်နူအခိၚ်အာစိုပ်လဝ် Puma Power Internation Port Terminal ပ္ဍဲကွာန်ကတုၚ်ပဝ် ပွိုၚ်ဍုၚ်မုဟ်ဍုၚ် ပ္ဍဲဂိတုအေဗရာ ၁၈ တေံတုဲ စၞောန်ပ္ညုၚ်လဝ်ဂှ်ရ သွက်ဂွံသွံကၠေၚ်စက် နကဵုသၞောတ် QR Code ဒှ်ကၠုၚ်ရောၚ် ဂွံတီကေတ်ရ။
ပြဟ်ဟ်ဏံ ပ္ဍဲဆေၚ်သွံကၠေၚ်တံ သုၚ်စောဲသၞောတ် QR Code တုဲ စသွံကဵုမံၚ်ကီုလေဝ် အလုံမွဲဍုၚ်ဗၟာမ္ဂး င္ၚုဟ်ကၠေၚ်စက်တွဵုရးမန်ဂှ် ဆက်နွံမံၚ်ၚုဟ်သၠုၚ်အိုတ်ရောၚ်။
ပ္ဍဲတွဵုရးမန်ဂှ်တှ်ေ စနူအစဂိတုမာတ်တုဲကၠုၚ်တေံရ အတိုၚ်နွံပၟိက်ရာန်ကၠေၚ်စက်ဟွံဂွံတုဲ ဒးရာန်မံၚ်နကဵုသၞောတ်ဗ္ၜတ်အပိုင်အခြာကီု၊ ဒးရာန်နကဵုသၞောတ် စောံ/မ၊ မၞိဟ်တံဒးမၚ်ရေၚ်မံၚ်လံလံကီု ပါဲနူဂှ်လေဝ် မွဲဏှမွဲဏှ ဒးဂဗဆဵုမံၚ်ကဵုအကာဲအရာ ကၠေၚ်အိုတ်အာမံၚ်တံရ။
ပရိုၚ် – သြၚ်လောန်တိုၚ်မ်
Photo – CJ