လွိုၚ်ကဝ်၊ အံက်တဝ်ဗာ (၂၆)
ပ္ဍဲဗ္ဒိုပ်ပါဲဒဴဘဲပၞာန် (ကုန်းသာ) လ္ပာ်ပလိုတ်ဍုၚ်လွိုၚ်ကဝ်၊ တွဵုရးကရေၚ်ဍာဲဂှ် ဟိုတ်နူမကမ်လွဟ်လက်နက်ဇၞော် နူဒပ်ကံၚ်ဇြဳပၞာန်တံ မပန်ပှော်လဝ် ဒတုံဗ္တိုဟ်ထ္ကးအာဂှ်ရ ညးပါဲဒဴဘဲပၞာန် (၂) တၠ ချိုတ်အာလဝ်ဂှ် ညးမရီုဗၚ်ကဵုဒၟံၚ် ပရေၚ်ညးပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုအံက်တဝ်ဗာ (၂၃) ဗ္တံ ၜိုတ် (၉) နာဍဳဂှ် လ္တူသ္ၚိဒၟံၚ်ဂြောဝ်ဂတာ (၄) တၠ မသ္ပဒတဴဒၟံၚ် မၞုံပ္ဍဲဗ္ဒိုပ်ပါဲဒဴဘဲပၞာန်ဂှ် ကမ်လွဟ်လက်နက်ဇၞော် ဒတုံဗ္တိုဟ်ထ္ကးအာတုဲ ညးမဒှ်တၠသ္ၚိဂှ် ချိုတ်အာလဝ် ပ္ဍဲဒၞါဲဒှ်ပရူ လွာဲဂှ်ရ။
ကြဴနူဂှ်တုဲ သမ္ဘာညး မကလိဂွံလဝ်ဝပ် ပ္ဍဲက္ဍိုပ်သ္ကာတ်မြဟ်ဂှ် ဇဖန်မပလံၚ်ဗစိုပ်ဏာ ပ္ဍဲရုၚ်ဂဥုဲလွိုၚ်ကဝ် သ္ဂောံလွဳလွတ်ဂှ် ထပ်ဒးချိုတ်အာလဝ် ပ္ဍဲကဵုဂိတုအံက်တဝ်ဗာ (၂၄) ဇိုၚ်သဝ်တ္ၚဲ (၅) နာဍဳရ။
ပ္ဍဲကဵုကောန်သ္ၚိကၟိန်ပန်တၠ မဒးလဝ် ကမ်လွဟ်လက်နက်ဇၞော်ဂှ် ကောန်ၚာ်တြုံ အာယုက် (၈) သၞာံဝွံလေဝ် ကလိဂွံလဝ်ဝပ် ဇီုကပိုက်ဒးလဝ်တုဲ ကောန်ၚာ်သၟတ် အာယုက် (၆) ဂိတုဂှ်တှ်ေ ဂွံဝပ်ဇီုကပိုက် ဟွံမွဲပုဟ်ဂှ် ဂွံတီကေတ်ရ။
ပရေၚ်ပန်ပှော်ဏံဂှ် နူကဵု ခမရ (၄၂၂) ကံၚ်ဇြဳပၞာန် မဖျေံသ္ဇိုၚ်မိုဝ်ဗျေဝ်ဂှ် ကၠောန်သ္ပလဝ်တုဲ အရိုဟ်ဟ်ဗ္တံ ဟိုတ်ဟွံမွဲမွဲသာ် ပွမပန်ပှော်ဒၟံၚ်ကြာန်န်တံဂှ် ဆက်ကၠောန်သ္ပဒၟံၚ်ရောၚ် ညးဒေသတံ သ္ဂးအိုတ်ရ။
ပ္ဍဲဗ္ဒိုပ်ပါဲဒဴဘဲပၞာန် (ကုန်းသာ) ဂှ် ညးပါဲဒဴဘဲပၞာန် ပွဳပွူ (၄) လ္ၚီ နွံဒၟံၚ်တုဲ ခြာဒၟံၚ်ကဵု ဒပ်ကံၚ်ဇြဳပၞာန် တမ်ဒပ် (၄၂၂) မဖျေံသ္ဇိုၚ်မိုဝ်ဗျေဝ် ပွဳပွူ (၁၀) မိုၚ်ရောၚ် ဂွံတီကေတ်ရ။
ပ္ဍဲတွဵုရးကရေၚ်ဍာဲဂှ် အပ္ဍဲဂိတုအံက်တဝ်ဗာဂှ် ဟိုတ်နူဒးအာလွဟ်လက်နက်ဇၞော် နူဒပ်ကံၚ်ဇြဳပၞာန်တံ မပန်ပှော်ဂှ်တုဲ ညးဍုၚ်ကွာန် မဒးချိုတ်အာလဝ်ဂှ် ဟွံအောန်နူကဵု (၃) တၠ နွံတဴရ။
ပရိုၚ်−သြၚ်လောန်တိုၚ်(မ်)