မတ်မလီု၊ အံက်တဝ်ဗာ (၂၆)
ကမၠောန်ၜံက်တဝ် မၞုံအပ္ဍဲကွာန်ဝါဍောတ်၊ ပွိုၚ်ဍုၚ်ၜါသွာၚ်၊ တွဵုရးဍုၚ်မန်တံကီု ကမၠောန်ကွတ်တဲ တၞဟ်ဟ်တံကီုဂှ်ဝွံ ဟိုတ်နူရာန်ကေတ် ဆုအပြောံတံ ဟွံဂွံတုဲ ဒးဒေါအ်ဇူလဝ်ကမၠောန်ရောၚ်ဂှ် တၠကမၠောန်ကွတ်တဲတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကွာန်ဝါဍောတ် ပွိုၚ်ဍုၚ်ၜါသွာၚ်ဂှ် ဒုၚ်သ္ဇိုၚ်ကဵုဆုတုဲ ၜံက်တဝ်တံ မပါလုပ် သီုကဵု ကပေါတ်ကွတ်တဲ တၞဟ်ဟ်တံဂှ် နူကဵုသ္ၚိကၟိန်တံ ၜိုတ်မာန်ကဵုမာန် ကၠောန်ပ္တိတ်ဒၟံၚ် နဒဒှ်ပရေၚ်ပိုန်ဒြပ်အိုတ်ရ။
ဆ္ဂး ကမၠောန်ကွတ်တဲတံဝွံ အပ္ဍဲကာလဒပ်ပၞာန်သီအဝဵုဂှ် ဒၟါနူဟွံဂွံ ဗၞိက်အပြောံ ဆုတံတုဲ သွက်ဂွံဆက်ကၠောန်ကမၠောန်ဂှ် ဒးဂဗဒၟံၚ် အခက်အခုဲရ။
သွက်တၚ်ဝါတ်ဂါတ် ဗၞိက်အပြောံဆုတံဂှ် တုဲကၠုၚ်ဂိတုအံက်တဝ်ဗာ (၁၈) တေံ ပ္ဍဲကဵုပေါဲဆဵုဂဗ တၠကမၠောန် ပရေၚ်ပိုန်ဒြပ် အဇာဍောတ်၊ အဇာဒေါဝ် (MSME) တံကဵု က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် ၜိုန်ရပ္တိုန်ထ္ၜးလဝ်ကီုလေဝ် ဟွံအံၚ်ဇၞးလဝ်ပုဟ်ဂှ် တၠကမၠောန်ကွတ်တဲမွဲတၠ ဟီုရ။
“ကမၠောန်ဂှ် ပြဟ်ဟ်ဏံ ဆုအပြောံဟွံမွဲဂှ်ရ ဒးဒေါအ်ဇူဒၟံၚ် ကမၠောန်မွဲဏှမွဲဏှရ၊ တၠကမၠောန်အဏံတံ မဒးဗ္ဒဗ္ဒါဲဒၟံၚ်ဆုတံ သီုဖအိုတ်ဝွံ ဗၞိက်အပြောံဂှ် အဓိကရ၊ ဗၞိက်အပြောံဟွံမွဲမ္ဂး လှုဲနွံလေဝ် မုတၟေၚ်ရော အလဵုဂွံအာကေတ်ရော၊ ညးတၞဟ်ကၠုၚ်ဗ္ကန်လေဝ် ဗၞိက်အပြောံဟွံမွဲတုဲ သာ်လဵုမှ ဟွံဒှ်ကလောန်ပုဟ်” ဂှ် ညးဟီုရ။
ပ္ဍဲကဵုကမၠောန်ကွတ်တဲတံဂှ် ဟိုတ်နူဆုအပြောံ မဒးသုၚ်စောဲအဓိကတံ အောန်ကြဳဒၟံၚ်ဂှ်ရ ဒေါအ်ဒေၚ်ထောံကမၠောန်ကီု၊ ဒၟါနူယဲကပ်ကဵု အကာဲအရာပရေၚ်ဍုၚ်ကွာန် ဟွံညိၚ်ဝတ်တံတုဲ ကၟုဲအာတရဴ လုပ်စိုပ်ဟွံမွဲဂှ်ရ ကမၠောန်သွက်ဂွံဆက်ဂေတ်ဂြိပ်ဂှ် အခက်အခုဲနွံဒၟံၚ်ရ။
အခိၚ်လၟုဟ် ဟိုတ်နူဒးဒေါအ်ဇူလဝ် ကမၠောန်ကွတ်တဲတံဂှ်ရ သၟာကမၠောန်တံဝွံ ဒးပြံၚ်ကၠုၚ် ကမၠောန်မပြေပြံၚ် မဂဗမကၠောန်တံဂှ်တုဲ မၞိဟ်ကၠောန်ကမၠောန်ကွတ်တဲတံ ၜိုတ်ညိညဓဝ်ရ နွံဂှ် သ္ဂးရ။
ကမၠောန်ကွတ်တဲ ဒုၚ်သ္ဇိုၚ်ကဵု ဆုအပြောံတုဲ ကၠောန်ပ္တိတ်ဒၟံၚ် ၜံက်တဝ်တံ မပါလုပ် ကပေါတ်ကွတ်တဲ အရပ်စပ်သ္ၚိ တၞဟ်ဟ်တံ၊ ကပေါတ်စၟတ်သမ္တီ နာနာတံ ဒးဒေါအ်ဇူလဝ်ဂှ်ဝွံ နူကဵုအခိၚ်ယဲကပ်ကဝ်ဝေဒ်စ စဵုကဵု ဒပ်ပၞာန်သီအဝဵု ဒဵုအခိၚ်လၟုဟ်ရ။
ပ္ဍဲကဵုကဏ္ဍ ကမၠောန်အဇာဍောတ်၊ အဇာဒေါဝ် SME မၞုံအပ္ဍဲတွဵုရးဍုၚ်မန်ဂှ် ကမၠောန်ကွတ်တဲတံ မပါလုပ် ကမၠောန်အပံၚ် (၂၀၀၀၀) ပြၚ် နွံဒၟံၚ်တုဲ သၟာကမၠောန် ဗ္ဒဗ္ဒါဲဒတူလိုၚ်ဒၟံၚ် လ္တူကမၠောန်တံဏံဂှ် ဂၠိုၚ်ကဵုကိုဋ် နွံဒၟံၚ်ရ။
အပ္ဍဲကာလ ယဲကပ်ကဝ်ဝေဒ် ကဵု ဒပ်ပၞာန်သီအဝဵု ပွိုၚ်မွဲသၞာံဘာ်ပြၚ်ဂှ် ကမၠောန်အဇာဍောတ်၊ အဇာလဒေါဝ် SME တံဝွံ သွက်ဂွံဆက်ဒတူလိုၚ်အာဂှ် ဒးဆေၚ်ဒၟံၚ်မုက် အခက်အခုဲနာနာသာ်ရ။
ပရိုၚ်−သြၚ်လောန်တိုၚ်(မ်)