အပ္ဍဲရေဝ်ကဵုမုဟ်ဍုၚ် ဒပ်ပၞာန်သီအဝဵု ဒးဒုၚ်ဗတိုက်တုဲ ချိုတ်အာ ၁၀ တၠ

မတ်မလီု၊ မေ ၄

အပ္ဍဲတွဵုရးမန် ပွိုၚ်ဍုၚ်မုဟ်ဍုၚ်ကဵု ပွိုၚ်ဍုၚ်ရေဝ်တံဂှ် ဒပ်ပၞာန်သီအဝဵု ဒးဒုၚ်ဗတိုက်တုဲ ချိုတ်အာလဝ် ၁၀ တၠဂှ် နူကဵုဒပ်ပၞာန်မန်ရာမည RMA လလောၚ်တြးလဝ်ပရိုၚ် ပ္ဍဲဂိတုမေ ၁ ရ။။

ဂိတုအေဗရာ ၂၈ တုဲကၠုၚ်ဏံဂှ်လေဝ် ဒပ်ပၞာန်ဗမာ နူတမ်ဒပ် ခလရ ၁၀၆ မၞုံဇြဟတ်ၜိုတ် ၁၀၀ ပြၚ် ထပက်ကၠုၚ်ကရောၚ်ပၞာန် အခိၚ်စိုပ်မံၚ်ကရပ်ကွာန်ကၞေၚ်တၟအ်ဂှ် ဒးဒုၚ်ဗတိုက်အကြာဂၠံၚ်တုဲ ဒးဝပ်ချိုတ်အာကြပ် ၁၀ တၠနွံမံၚ်ဂှ် ပ္ဍဲလိက်လလောၚ်တြး ချုဗၟံက်ထ္ၜးလဝ်ရ။

တုပ်ညံၚ်ရဴဂှ်ကီု ပ္ဍဲဂိတုအေဗရာ ၂၉ ဂှ်လေဝ် ပ္ဍဲပွိုၚ်ဍုၚ်မုဟ်ဍုၚ် အကြာကွာန်ယေန်ဒံၚ် ကဵု ကွာန်နှေဟ်ဗ္ဒဝ်ဂှ် သုၚ်စောဲဒရုၚ် ကြဳဗုမ်ဗတိုက်လဝ် ဒပ်ပၞာန်ဗမာဂေတ်မံၚ်ကၚ်တံဂှ် ဟိုတ်နူဒးဗုမ်တုဲ ချိုတ်အာ ၁ တၠတုဲ ၃ တၠဂှ် ဒးအာဝပ်ရောၚ် သ္ဂးရ။

ပရေၚ်ဗတိုက်တံဏံဂှ် နူကဵုတမ်ဒပ် (၉၀၁) ဒပ်ပၞာန်မန်ရာမည RMA၊ ဒပ်ပၠန်ဂတးဍုၚ်မန် (MSRF)၊ ဒပ်စဵုဒၞာညးဍုၚ်ကွာန်ရေဝ် (YPDF)၊ တမ်ဒပ် (၂၇) KNLA ကေုာံ ဒပ်ဒမၠုက်ရေဝ် (YGF) စၟတ် (၈၀၀၁) တံ ပံၚ်တောဲပါလုပ်လဝ်ရောၚ် ဂွံတီကေတ်ရ။

အပ္ဍဲဂိတုအေဗရာ ၂၇ တေံလေဝ် လ္ပာ်ဍုၚ်ရေဝ် သၠုၚ်ကျာ ကွာန်အံၚ်သာယာ အပ္ဍဲကၠအ်ရာဘာဂှ် ဒပ်ပၞာန်ဗမာ ထပက်ကၠုၚ်ကရောၚ်ပၞာန်တံ ဒးမာၚ်တုဲ ချိုတ်အာ ၄ တၠနွံရ။

ပရိုၚ် – သြၚ်လောန်တိုၚ်မ်

Photo – RMA