ကျံက်ကျဳ၊ ဂိတုမေ ၄
အပ္ဍဲရးဒေသဗဂေါ ပွိုၚ်ဍုၚ်ကျံက်ကျဳ ကွာန်လေဝ်မူတဝ်ဂှ် ဟိုတ်နူကဵုဒပ်ကဝ်မယှေန်ပၞာန် ဗတိုက်ကဵုပၞာန်ကျာတုဲ ကောန်ၚာ်မွဲတၠ ချိုတ်တုဲ ၅ တၠ ဒးအာဝပ်နွံမံၚ် နူကဵု ဗဟဵုဗော်သွးကောန်ဂကူကရေၚ် KNU ပတိတ်လဝ် လိက်လလောၚ်တြးရ။
ဂိတုအေဗရာ ၂၄ တုဲကၠုၚ်ဏံဂှ်လေဝ် နူကဵုဒပ်ကဝ်မယှေန်ပၞာန် သုၚ်စောဲ က္ၜၚ်ကျာဂျက်ဖိုက်တာတုဲ ကြဳဖျေံလဝ်ဗုမ် ပ္ဍဲကွာန် လေဝ်မူတဝ် ၅ ဝါ မဒှ်ရ။
ဟိုတ်နူဗတိုက်ကဵုပၞာန်ကျာဂှ် နဝ်အေလ်တူလိုမူ အာယုက် ၁၅ သၞာံ ဒးဗုမ်ချိုတ်အာတုဲ သီုကောန်ၚာ်မွဲတၠပါလုပ် ညးဍုၚ်ကွာန် ကောန်အရာပ် ၅ တၠ ဒးအာဘဲဝပ်တံနွံရ။
အပ္ဍဲအရာ ဒပ်ပၞာန်ဗမာကြဳလဝ်ဗုမ်ဂှ် သ္ၚိကောန်ညးဍုၚ်ကွာန် ၄ မ၊ ကွဳစက်မွဲမ ကေုာံ စမြိုၚ်ဒၞာဲ ရုၚ်ကဵုဂဥုဲညးဍုၚ်ကွာန်ၜါမ ဒးအာဗုမ်တုဲ လီုလာ်အာလဝ်ဂှ် နူကဵုဗဟဵု KNU ပတိတ်လဝ်ပရိုၚ် နကဵုရုပ်သက်သဳ တံရ။
အပ္ဍဲတိဍာ်ပရေၚ်အုပ်ဓုပ် KNU တံဂှ် နူကဵုဒပ်ကဝ်မယှေန်ပၞာန် အကြာတ္ၚဲတံဏံဂှ် သၠုၚ်ပတိုန်အသိၚ် ဗတိုက်မံၚ်ကဵုပၞာန်ကျာဂှ်ရ ညးဍုၚ်ကွာန် ဒးဝပ်ချိုတ်ဂၠိုၚ်တိုန်ကၠုၚ်မံၚ် မဒှ်ရောၚ်။
ဒပ်ပၞာန်ကျာဗမာ ကြဲဗုၚ်ဗတိုက်မံၚ်ဗီုတံဏံ ညံၚ်ဂွံဒေါအ်အာမာန်ဂှ် နူကဵုဂကောံ ပွဳဗွိုၚ်ဂၠးကဝ်တံ ညံၚ်ဂွံရပ်စပ်အလဵုအသဳပၞာန် ဗွဲမပြဟ်တုဲ ပရေၚ်ဗတိုက်မံၚ်ကဵုပၞာန်ကျာ ညံၚ်ဂွံအိုတ်အာ ရေၚ်တၠုၚ်ကဵုအိုတ်ညိဂှ် နူဗဟဵု KNU ဗ္တိုက်ဖ္အောဝ်အာတ်မိက်လဝ်ရ။
ပရိုၚ် – သြၚ်လောန်တိုၚ်မ်
Photo – KNU