မတ်မလီု၊ အံက်တဝ်ဗာ (၂၆)
ပ္ဍဲတွဵုရးဍုၚ်မန် ကံၚ်ဇြဳပၞာန်သီအဝဵုဝွံ သွက်ဂွံပြံၚ်ကၠေံအာရီု ပရေၚ်ပၠန်ဂတး ညးသၟတ် ကေုာံ ညးဍုၚ်ကွာန်အပ္ဍဲဒေသတံဂှ်တုဲ ဖန်ဗဒှ်ကၠုၚ် ပေါဲဝေၚ်ဇြဟတ်တံ၊ ပေါဲသ္ဘၚ်တံတုဲ ကၠောန်ကၠုၚ်ဒၟံၚ် ပရေၚ်စန်ဒက်တံ အဆက်က်ရဂှ် ညးဒေသတံ ကေုာံ ဂကောံဇြဟတ်ပၠန်ဂတးတံ ဟီုရ။
ကံၚ်ဇြဳပၞာန်ဝွံ ညံၚ်သၟတ်တံ စိုတ်ဟွံဂွံလုပ်စ ပ္ဍဲပရေၚ်ပၠန်ဂတးဂှ် ပ္ဍဲကဵုပွိုၚ်ဍုၚ် မၞုံအပ္ဍဲတွဵုရးတံဂှ် မပ္တံကဵု ပေါဲပြိုၚ်မခ္ဍံကျာ ဗွဲပလးတံကီု၊ ပေါဲပြိုၚ်ဝှူဇြေဝ်တံကီု၊ ပေါဲပြိုၚ်ချိတ် တံကီုဂှ် ဗွဲမဗဗွဲကဵု ဂကူအဇာ နဲဝေၚ်ဇြဟတ်တံဂှ် ကၠောန်ဗဒှ်ဒၟံၚ် ပေါဲပြိုၚ်ပ္ကာန်တံအိုတ်ရ။
ကံၚ်ဇြဳပၞာန် ကၠောန်ဗဒှ်ကဵုဒၟံၚ် ပေါဲပြိုၚ်ဝေၚ်ဓတ်တံဂှ်ဝွံ ဟိုတ်နူသီအဝဵုတုဲ မ္ၚးနူပေါဲဗ္တိုက်ပၠန်ဂတးတံ၊ ပရေၚ်ဒစဵုဒစး ထ္ၜးဆန္ဒ မက္တဵုဒှ်ဒၟံၚ် အပ္ဍဲဍုၚ်တံဂှ် သီုကဵုအကာဲအရာပရေၚ်ဍုၚ်ကွာန်၊ ပရေၚ်ပိုန်ဒြပ် မဆုတ်ယုတ်စှ်ေဒၟံၚ် ဇၟာပ်ပ်ဒိုဟ်တံဂှ်တုဲ ညံၚ်ညးသၟတ်တံ စိုတ်ဟွံဂွံလုပ်စ ပ္ဍဲပရေၚ်တံဏံဂှ် စန်ဒက်ဒၟံၚ်ရောၚ် သ္ဂးရ။
ကံၚ်ဇြဳပၞာန်ဂှ် ဟိုတ်နူကၠောန်သ္ပဒၟံၚ် ညံၚ်ညးသၟတ်တံ ဟဂွံစွံအာရီု ပ္ဍဲပရေၚ်ပၠန်ဂတးတံဂှ်ရ နကဵုသၟတ်တံ ဆီလ္ပဂံက်မွဲသာ် လ္ပမံၚ် ညံၚ်ကဵုဟွံဆေၚ်ကဵုဇကုဂှ်ကီု၊ သွက်ဂွံပါလုပ် ပ္ဍဲပရေၚ်ပၠန်ဂတးဂှ် နွံဒၟံၚ်ပၟိက်ရောၚ် လျိုၚ်ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်သဓီုမွဲတၠ ဟီုရ။
“ညံၚ်ညးသၟတ်တံ ဟွံဂွံသ္ပအာရီုဂှ် ဍေံတံ ကၠောန်တွဵုဏောၚ်လေဝ်၊ လၟုဟ် ပၠန်ဂတးဏံဂှ်လေဝ် ဒးဟီုတပ်ပ်မ္ဂး သၟတ်တံရ က္ဍိုက်ဒၟံၚ်က္ဍိုပ် အဓိကရ၊ ညံၚ်ညးသၟတ်တံ ဟွံဂွံစွံအာရီု၊ ဟွံဂွံပါလုပ် ပ္ဍဲပရေၚ်ဍုၚ်ကွာန်မာန်ဂှ်ရ၊ မုမိက်ဂွံဟီုကဵု သၟတ်တံဂှ်တှ်ေ အကာဲအရာလၟုဟ်ဂှ် ညံၚ်ကဵုဟွံဆေၚ်ကဵုဇကုဂှ် မံၚ်ဟွံဂွံပုဟ်၊ မံၚ်သာတှ်ေ စဇြိုၚ်ဏောၚ်၊ အခိၚ်သၞဇကု ဓဇန်ကြမ်ကြဒၟံၚ်ဂှ် ပိုယ်တံ သ္ပထောံ ဥပက္ခာ ဟွံဂွံပုဟ်၊ ဟွံမိက်ကဵု သၟတ်တံ ဆီဂံက်အာပုဟ်၊ ဟွံမိက်ကဵု ကၠောန်ပေါဲသ္ဘၚ်တံပုဟ်၊ ရပ်လွဟ်မှ ဒှ်သၟာပၠန်ဂတးဟွံသေၚ်၊ မပ္တံကဵု ကဵုပရိုၚ်တံဂှ်လေဝ် မိက်ဂွံကဵု သၟတ်တံ ပါလုပ်ကီုရ” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲပေါဲပြိုၚ်ဝေၚ်ဇြဟတ် ကံၚ်ဇြဳပၞာန်တံ ဗဂေတ်တုဲ မကၠောန်ဗဒှ်ဒၟံၚ်ဂှ် လ္ပပါလုပ် ပြိုၚ်ပ္ကာန်အိုတ်မ္ဂး တုပ်တဴညံၚ်ရဴပၠန်ဂတး ဒစဵုဒစးကဵု ကံၚ်ဇြဳပၞာန် မွဲနဲမွဲဗီုကီုဂှ်ရ နကဵုသၟတ်တံ ညံၚ်ဂွိုအ်ပါလုပ်ဂှ် နွံပၟိက်အဓိကရောၚ် ဖ္တိုက်ဖ္အောဝ်လဝ်ရ။
အခိၚ်လၟုဟ် ကံၚ်ဇြဳပၞာန်ဝွံ ညံၚ်ညးဍုၚ်ကွာန်တံ ဟွံဂွံပါလုပ် ပ္ဍဲပရေၚ်ပၠန်ဂတးဂှ် နဒဒှ်ပြံၚ်ကၠေံအာရီု ကၠောန်ဗဒှ်ကဵု ပေါဲသ္ဘၚ်တံဂှ်ဝွံ သွက်ဂွံထ္ၜးပျး ကုညးဂၠးတံ ဒဒှ်ရအပ္ဍဲကၟိန်ဍုၚ် ၜိုဟ်သြိုဟ်သာယာဒၟံၚ်ရောၚ် ညးချဳဒရာၚ်ကတိုၚ်ကၟဟ် ပရေၚ်ဒဳမဝ်ကရေဇြဳမွဲတၠ ဟီုရ။
“ ဒပ်ပၞာန်ဂှ်တှ်ေ ညံၚ်ဂွိုအ်ဒစဵုဒစး ကုဍေံတံဂှ် ဍဵုဍိုက်ညးဍုၚ်ကွာန်တံ နကဵုဗီုပြၚ် နာနာရဏောၚ်၊ ဗ္ဂေတ်ကၠေံ အာရီုဏောၚ်၊ အေဂှ်တှ်ေ ပ္ဍဲဍုၚ်ဇၞော်ဇၞော်တံကဵု ဒေသကောန်ဍုၚ်အရၚ် ပ္ဍဲဒၞါဲတံဏံဂှ် ပေါဲသ္ဘၚ်လေဝ် နွံဏောၚ်၊ အရာမဍဵုဍိုက်တံလေဝ် နွံဏောၚ်၊ ပ္ဍဲဒေသကောန်ဍုၚ်အရၚ်တံလေဝ် ၜိုတ်ဒေသကောန်ဍုၚ်အရၚ်တံဂှ် တ္ၚဲအသေအဟာန်တံ၊ ပေါဲသ္ဘၚ်တံဂှ် ဖန်ဗဒှ်ဏောၚ်၊ ပ္ဍဲဍုၚ်ဇၞော်တံမ္ဂး Bar တံ၊ Club တံ၊ ကလေၚ်ပံက် night club တံတုဲမှ သၟတ်တံ အာကၠုၚ်ဒၟံၚ် မိပ်ပ်ဇြိပ်ပ်ဗီုဏံဂှ် ဍေံတံ ဖန်ဗဒှ်လဝ် နကဵုတၚ်ရန်တၟံနွံနွံရ၊ ကာလဂှ်မှ ဍေံတံ ထ္ၜးစကဵုဍုၚ်သ္အာၚ်တံ ခိုဟ်ဏောၚ်၊ ပရေၚ်ဍုၚ်ကွာန်ဂှ် ဘာသာဍေံကုဍေံ ၜိုတ်သြိုဟ်ညိၚ်ဝတ်ဒၟံၚ်ယျ မပ္တံသာ်ဏံ ထ္ၜးပျးစတုဲ ဍေံတံ မိက်ဂွံပါဲဒလေတ် အရာမရီုဗၚ်ပ္ဍဵုပ္ဍိုက် နူဍုၚ်သ္အာၚ်တံလေဝ် ပါကီုရ” ဂှ် သ္ဂးရ။
သ္အာၚ်နူဂှ်ပၠန် ကံၚ်ဇြဳပၞာန်ဝွံ ဟိုတ်နူကျဗြံဒၟံၚ် ဇၟာပ်ပ်ဒိုဟ်ဂှ်ရ ရပ်စပ်စကာသၟတ်တံတုဲ သွက်ဂွံလီဠာန် ညးဂၠးတံဂှ် ဖန်ဒၟံၚ်ဂှ်ရ နကဵုညးသၟတ်တံ သ္ၚဳရံၚ် အရာမဓဇန်ကြမ်ကြ ကံၚ်ဇြဳပၞာန်တံတုဲ ညံၚ်ဂွိုအ်ပံၚ်တောဲပူဗိုၚ်ထောံအိုတ်ဂှ် နွံပၟိက်ရောၚ် သ္ဂးရ။
ပ္ဍဲကဵုပရေၚ်စန်ဒက်ကံၚ်ဇြဳပၞာန်တံဂှ် နကဵုညးသၟတ်တံ ဟွံပူဗိုၚ်ကဵုအာမ္ဂး ဒှ်အထံက်အရီု သွက်ပၠန်ဂတးမာန်တုဲ သွက်သၞောတ်တၠအဝဵုပၞာန် ဂွံသရိုဟ်စှ်ဂှ်လေဝ် ဒှ်အရီုအဗၚ်ရောၚ် ဂကောံဇြဟတ်ပၠန်ဂတးတံ ဟီုရ။
ပ္ဍဲတွဵုရးဍုၚ်မန်ဂှ် ကံၚ်ဇြဳပၞာန်ဝွံ ညံၚ်ညးသၟတ်တံ စိုတ်ဂွိုအ်လုပ်စ ပ္ဍဲပရေၚ်ပၠန်ဂတးတံဂှ် မ္ၚးနူကၠောန်ကဵုပေါဲပြိုၚ်ဝေၚ်ဇြဟတ်ဂှ် သုၚ်စောဲနဲကဲနာနာတုဲ သီုကဵုဖန်ဗဒှ် ကဵုကၠုၚ်တန်ဗ္တောန် ဝေၚ်ဇြဟတ်တံ အဆက်က်ရ။
ပရိုၚ်−သြၚ်လောန်တိုၚ်(မ်)