မနဳလာ၊ ဂျူလာၚ် ၂၁
စိုပ်ဂျူလာၚ် ၂၁ မ္ဂး ပ္ဍဲဍုၚ်မနဳလာ ဍုၚ်နိဂီုဖိလေတ်ပိုၚ် ကၠောန်ဗ္ဒျ်အာ ကောံဓရီုဝန်ဇၞော်အာသဳယာန်ဂှ် စပ်ကဵု ပရေၚ်ပေါဲပၞာန်အဳရာန် အသိၚ်ထတ်တိုန်မံၚ်၊ သွက်ဂွံသောၚ်ကလးအာပြသၞာဗၟာ ကေုာံ ပရေၚ်ကယျာန်ဓဝါတ် ၜဳကြုက်သၠုၚ်ကျာတံဂှ် စွံအဓိကတုဲ သဳကၠဳအာရောၚ် ဂွံတီကေတ်ရ။
ပ္ဍဲကောံဓရီုတေံ ညးစၞးကြုက်၊ ရတ်ယှာ၊ အမေရိကာန် ကေုာံ သမဂ္ဂယူရောပ်တံလေဝ် တိုန်စိုပ်အာရောၚ်။
ပ္ဍဲကောံဓရီုကၠောန်အာပွိုၚ် ၃ တ္ၚဲဂှ် ဥက္ကဌအာသဳယာန် လၟေၚ်အလန်သၞာံဏံ ဍုၚ်ဖိလေတ်ပိုၚ် သ္ကိုပ်သ္ကတုဲ သဳကၠဳအာ ပရူပရာတံဏံရောၚ်။
ဝန်ဇၞော်ပရေၚ်ဍုၚ်သအာၚ်အမေရိကာန် မာကဝ် ရူဗဳယဝ်၊ ဝန်ဇၞော်ပရေၚ်ဍုၚ်သအာၚ်ကြုက် ဝမ်ယိ ကေုာံ ဝန်ဇၞော်ပရေၚ်ဍုၚ်သအာၚ်ရတ်ယှာ သာဂျဳ လာပ်ဗရတ်တံလေဝ် တိုန်စိုပ်ကောံဓရီုအာရောၚ်။
နကဵုစၟတ်သမ္တီ တၚ်တုပ်စိုတ်ပရေၚ်ဟွံဂၠာဲသၞ သၞာံ ၁၉၇၆ အာသဳယာန် ကောံဓရီု ကၠောန်ဗဒှ်အာ ပ္ဍဲဂျူလာၚ် ၂၄ ဂှ် ၜိုန်ရကော်ဘိက်လဝ် တၠကွတ်ပရေၚ်အမာတ်ကလုတ် အဆံၚ်သၠုၚ်ယူခရုၚ် အေန်ဒရဳ သာၚ်ဗဳဟာကီုလေဝ်၊ ပ္ဍဲကောံဓရီုအာသဳယာန် သာဂျဳ လာပ်ဗရတ် ကေုာံ ရူဗဳယဝ်တံ တိုန်စိုပ်မ္ဂး ပါလုပ်အာဟွံသေၚ်ပုဟ် ဂွံတီကေတ်ရ။
ရူဗဳယဝ် ကဵု လာပ်ဗရတ်တံလေဝ် အစဳအဇန် သွက်ဂွံဆဵုဂဗ အကြာညးတံကဵုညးတံ ဟွံသေၚ်မ္ဂး သွက်ဂွံဆဵုကဵု သာၚ်ဗဳဟာဂှ် လလောၚ်တြးလဝ် မုလေဝ် ဟၟဲပုဟ်။
စပ်ကဵုပေါဲပၞာန်အမေရိကာန်-အဳရာန် ပြးဇးစိုပ်အာ ဇရေၚ်ဍုၚ်တၞဟ် ပ္ဍဲဒေသဗမံက်အဒေါဝ်တံဂှ် ဝန်ဇၞော်ပရေၚ်ဍုၚ်သအာၚ် အာသဳယာန်တံဂှ် သဳကၠဳအာရောၚ်။
ပ္ဍဲဍုၚ်အာသဳယာန်တံမ္ဂး ဍုၚ်ပတဝ် စွံမံၚ်အာရီုအဓိက လတူပေါဲပၞာန်အဳရာန်ဂှ် ဒှ်ဍုၚ်မလေယှာ ကေုာံ ဍုၚ်အေန်ဒိုနဳယှာတံရ။
စပ်ကဵုပရေၚ်အကာဲအရာအဳရာန် ကဵု အမေရိကာန် ဗတိုက်မံၚ်ညးသ္ကံဂှ် ဒှ်ဂဝိၚ်ရောၚ် အကြာၜါလပါ်တံ သွက်ဂွံကလေၚ်စပေါဲသဳကၠဳဂှ် လိက်လလောၚ်တြးပံၚ်တောဲမွဲတၞးလေဝ် ပတိတ်အာရောၚ် အမာတ်ကလုတ်အာသဳယာန် ၜါတၠ ဟီုရ။
ရဲဒေသအာယှအဂၞဲ မၞိဟ် ၆၈၀ ပြကောဋိကိုတ်ပြၚ်နွံမံၚ်ဏံဂှ် ဒးဗ္ဒဗ္ဒာဲဗဓာန်စဒၟံၚ်ကဵုကၠေၚ်ဍေၚ် တိတ်နူကဵု ဒေသဗမံက်အဒေါဝ်တံရောၚ်။
ပ္ဍဲအခိၚ်ဏံ ဟိုတ်နူအမေရိကာန် ကဵု အေဿရေတံ စဗတိုက်အဳရာန်တုဲ ပေါဲပၞာန်တံ စက္တဵုကၠုၚ်ဂှ် နူကဵုအဳရာန် ကၟာတ်ထောံ ဂၠံၚ်ဍာ်ကိစ္စဇၞော် သွက်ဂွံအရာထံက်ပၚ် ကၠေၚ်ဍေၚ်ဂၠးတိရောၚ်။
ဟိုတ်နူပွ အဳရာန်တံကၠောန်လဝ်တုဲ ပ္ဍဲဍုၚ်ဖိလေတ်ပိုၚ် ညံၚ်ၚုဟ်မးစရိတ် စၞစဇွောံမ၊ ကၠေၚ်စက် ကေုာံ ကပေါတ်ညးဍုၚ်ကွာန်သုၚ်စောဲနာနာသာ်တံ ဟွံဂွံသၠုၚ်တိုန်အာဂှ် လလောၚ်တြးလဝ် အကာဲအရာကာမံက်တိုန် ကၠေၚ်ဍေၚ်တံရ။
ပါဲနူပဋိပက္ခမ္ၚးဂၠးကဝ်တံတုဲ အပ္ဍဲဒေသဇကုတံမ္ဂး သွက်ဂွံဗဒေါအ်ထောံပေါဲပၞာန်အပ္ဍဲဍုၚ်ဗၟာ သွက်ဂွံသောၚ်ကလး ပရေၚ်ကယျာန်ဓဝါတ် ၜဳကြုက်သၠုၚ်ကျာတံဂှ်လေဝ် ဝန်ဇၞော်အာသဳယာန်တံ ဒးဇီုကပိုက်မံၚ်ကဵု ဇြဟတ်ဟရိုဟ်တံ ဂၠိုၚ်တိုန်မံၚ်ရောၚ်။
Ref:KoreanTimes