မတ်မလီု၊ မေ (၂၄)
ပ္ဍဲအခိၚ်ရာန်ကၠေၚ်စက် ၜိုတ်နွံပၟိက် ဟွံဂွံဂှ် ကံၚ်ဇြဳပၞာန်သီအဝဵု ထိၚ်ဒက်ခုတ်ကၠုၚ် ၚုဟ်နှေန်ကၠေၚ်စက်တုဲ စကာကဵုသွံတြးကၠုၚ်ရဂှ် တၠကမၠောန် ပရေၚ်ကူသာန်သွံရာန်ကၠေၚ်စက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တၠကမၠောန်ပရေၚ်သွံရာန်ကၠေၚ်စက်တံဝွံ ကၠာတေံဂှ် တန်တဴကဵု လ္တူခရိတ်အိုတ် ကေုာံ ပွမပၠောပ်တံတုဲ ဇၟာပ်ပ်ဒၞါဲ ခုတ်ၚုဟ်တုဲ သွံကၠုၚ်လဝ်ရ။
ဆ္ဂး ပပ္တံနူဂိတုမေ သတ္တာဟဒုတိယဂှ်တုဲ ကံၚ်ဇြဳပၞာန် လလောၚ်ခုတ်ကၠုၚ် ၚုဟ်နှေန်ကၠေၚ်စက် မဒးသွံဒၟံၚ် လၟေၚ်တ္ၚဲတံဂှ်ရ၊ အတိုၚ်ၚုဟ်နှေန် ကံၚ်ဇြဳပၞာန် မခုတ်လဝ်ဂှ် ယဝ်ရဟွံသွံမ္ဂး ကၟာတ်လဒဵုအာ ဆေၚ်ကၠေၚ်စက်တံရောၚ်ဂှ် ဘပဠလဝ်ရ။
စပ်ကဵုအကာဲအရာဏံတုဲ တၠကမၠောန်ပရေၚ်ကူသာန်သွံရာန် ကၠေၚ်စက်မွဲတၠ ဟီုကၠုၚ် သာ်ဏံရ။
“အတိုၚ်ၚုဟ်အလဵုအသဳ မပံက်ကဵုဂှ် ပိုယ်တံဒးသွံရ၊ လၟုဟ်ဂှ် ဒှ်အာဗီုကဵုသၞောတ်အလဵုအသဳ ထိၚ်လဝ်ယျရောၚ်၊ အလဵုအသဳဂှ် ပ္ဍဲဍုၚ်လဵု သွံၚုဟ်ၜိုတ်လဵု ဂးတုဲ ၚုဟ်စၞောန်တံ ပ္တိတ်ကၠုၚ်အရိုဟ်တ္ၚဲရ၊ ဒးဟီုမ္ဂး ကၠေၚ်တံဂှ် ဟွံစိုပ်အဏံဏီပုဟ်၊ ၚုဟ်စှ်ေအာတှ်ေ ပိုယ်တံဂှ် ကျဟောံရ၊ လ္တူနူၚုဟ်မခုတ်လဝ်ဂှ် ယဝ်သွံမ္ဂးလေဝ် ကၟာတ်လဒဵုအာ ဆေၚ်တံဏောၚ်၊ ဍေံတံဂှ် ကၠေၚ်ဂှ်လေဝ် ရုမ်မ်ဂပ်ပ် ဟွံသွံကဵုပုဟ်၊ ပ္တိုန်ၚုဟ်တုဲ သွံမ္ဂးလေဝ် ကၟာတ်အာဆေၚ်တံဂှ် ကၠောန်ရောၚ်” သာ်ဝွံ တၠကမၠောန် ပရေၚ်သွံရာန် ကၠေၚ်စက်မွဲတၠ ဟီုရ။
ကံၚ်ဇြဳပၞာန် ၜိုန်ရခုတ်ထောံ ၚုဟ်ကၠေၚ်စက်တံကီုလေဝ် ဟိုတ်နူၜိုတ်နွံပၟိက်ရာန်ဟွံဂွံဂှ်ရ ဆေၚ်ကၠေၚ်စက်လ္ၚဵုတံ တန်တဴကဵု ဂကူအဇာကၠေၚ်စက်တံတုဲ ဒးဆေၚ်ဒၟံၚ်မုက်ကဵု ပွမပိုတ်အိုတ်တံဂှ်ကီု ဆေၚ်ကၠေၚ်စက်လ္ၚဵုတံဂှ် ဟိုတ်နူကၠေၚ်စက်သၟေဟ် ဟွံမွဲတုဲ ဒးကၟာတ်ကၠုၚ် ဆေၚ်ယာယဳတံ နွံကၠုၚ်ရဂှ် တၠကမၠောန် ပရေၚ်သွံရာန်ကၠေၚ်စက်မွဲတၠ ဟီုရ။
ၚုဟ်ကၠေၚ်စက်ဝွံ ပ္ဍဲဂိတုမေ (၂၃) ဂှ် (၉၅) မွဲလဳတာ (၂၃၈၀) ဒ္ကေဝ်၊ (၉၂) မွဲလဳတာ (၂၂၆၀) ဒ္ကေဝ်၊ ပရဳမဳယာမ်ဒဳဇြာ မွဲလဳတာ (၂၂၂၅) ဒ္ကေဝ် ကေုာံ ဒဳဇြာ မွဲလဳတာ စဵုကဵု (၂၁၉၅) ဒ္ကေဝ် ၚုဟ်နွံဒၟံၚ်ရ။
ၚုဟ်ကၠေၚ်စက် ကၠာဒပ်ပၞာန်ဟွံဂွံသီအဝဵုဂှ် မွဲလဳတာ ပွဳပွူ (၆၀၀) ဒ္ကေဝ်ဟေၚ် နွံကၠုၚ်တုဲဂှ် ဗွဲကြပ်ပၞာန်သီအဝဵုတုဲ မွဲလဳတာ စဵုကဵု (၂၃၀၀) ဒ္ကေဝ် ၚုဟ်သၠုၚ်တိုန်ကၠုၚ် ဗ္ဒါဲ (၃) ဆတုဲ ဒးဂဗကၠုၚ်ကဵု ပွပိုတ်အိုတ်တံလေဝ် မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)