မြဝတဳ၊ မေ (၂၄)
ဗွဲကြဴဗြဲရိုပ်ဂူတုဲ ဟိုတ်နူဍာ်ဇၞော် ပြၚ်လာ်ကၠုၚ်ဂှ်ရ ညးဍုၚ်ကွာန်ပါဲဒဴဘဲပၞာန် ဗ္ဒါဲၜဳ (သောၚ်းရၚ်း) တံ ဒးဂဗဒၟံၚ် ဒဒိုက်အိုတ်ရဂှ် ဂကောံအခေါၚ်အရာမၞိဟ် မရီုဗၚ်ကဵုဒၟံၚ် ပရေၚ်ပါဲဒဴဘဲပၞာန် (KHRG) ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
နူကဵုဂိတုမေ (၂၀) စဵုကဵု (၂၂) ဂှ် ဟိုတ်နူကျာသ္ကာတ်ပိုက်၊ ဍာ်ဇၞော်၊ ဍာ်ကြုၚ် နူဒဵုဆၚ်စှ်ေကၠုၚ်တုဲ ဍာ်ၜဳ(သောၚ်းရၚ်း) မၞုံပ္ဍဲပယျဵု သေံ−ဗၟာ သၠုၚ်တိုန်ကၠုၚ်ဂှ်ရ ညးဍုၚ်ကွာန်ပါဲဒဴဘဲပၞာန် ဒးစ္ၜုဲစ္ၜော်မံၚ်စံၚ်ဒၟံၚ် မွဲဒမြိပ်ပြၚ်ၜဳတံ ဒးဂဗကၠုၚ်ဒၟံၚ် အခက်အခုဲတံရ။
ညးဍုၚ်ကွာန်ပါဲဒဴဘဲပၞာန် (၁၀,၀၀၀) ပြၚ် မမံၚ်စံၚ်တန်တဴဒၟံၚ် ဗ္ဒါဲၜဳ (သောၚ်းရၚ်း)တံဝွံ ဟိုတ်နူဒၞါဲဇွောံမံၚ် ဟွံရုမ်ဂပ်ကီု၊ ဘဲဒဏ်ဗြဲကျာတံကီုတုဲ ဂိယဲကၠုၚ်နွံဒၟံၚ်တုဲ ဟိုတ်နူပြၚ်ၜဳလာ်ကၠုၚ်ဂှ်ရ ဒးဂဗဒၟံၚ် အကာဲအရာ ထပ်ဒးဆုဲပြံၚ်တံရဂှ် ညးမၞုံအခေါၚ်ဟီုဂး ဂကောံအခေါၚ်အရာမၞိဟ် (KHRG) သဝ်နန္ဒသူ ဟီုရ။
“ဍာ်ဇၞော်တုဲ သ္ၚိတံ ဟဳအာအိုတ်ရ၊ ဗ္ဒိုပ် IDPs ဂှ် နွံဒၟံၚ်ၜိုတ် (၈) ဒၞါဲရ၊ ဒၞါဲလ္ၚဵု ဒၞါဲဇွောံမံၚ်စံၚ် ခိုဟ်ဟ်ဟွံမွဲတံဂှ် ဒးဒုၚ်ဘဲဒဏ်ဗြဲကျာရ၊ သီုကဵု ဒးဂဗ ဘဲဂိယဲတံရ၊ ပရေၚ်မံၚ်စံၚ်တံဂှ်လေဝ် ဝါတ်ဂါတ်အိုတ်ရ” သာ်ဝွံ ညးမၞုံအခေါၚ်ဟီုဂး ဂကောံအခေါၚ်အရာမၞိဟ်ကရေၚ် ( KHRG) ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူဘဲဒဏ်ဗြဲကျာ ကေုာံ ဍာ်ၜဳ(သောၚ်းရၚ်း) ဇၞော်ကၠုၚ်ဂှ်ရ သွက်ညးပါဲဒဴဘဲပၞာန် ဒးဂဗဒၟံၚ်အခက်တံဂှ် သာတုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ် မပ္တံ ကၟဳပ္ဍာန်၊ ဇွောံမစၞစ၊ ဂဥုဲဇဗတံရဂှ် သ္ဂးရ။
ဟိုတ်နူပေါဲဗ္တိုက်လေဝ်ကေဝ်ကဝ် မစက္တဵုဒှ်လဝ် နူကၞောတ်သၞာံ တုဲကၠုၚ်တေံဂှ်တုဲ ညးဒေသတံ ဒးဂြိပ်ဒဴပါဲဒလေတ်ဒၟံၚ် စဵုကဵု (၅) ဂိတုပြၚ် နွံကၠုၚ်တုဲ ညးပါဲဒဴဘဲပၞာန်တံဝွံ ပ္ဍဲဗ္ဒိုပ်ပါဲဒဴဘဲပၞာန် မွဲဒမြိပ် ပြၚ်ၜဳ(သောၚ်းရၚ်း)တံဂှ် ဒဵုကဵုအခိၚ်လၟုဟ် ဒးစ္ၜုဲစ္ၜော်မံၚ်စံၚ်ဒၟံၚ်ဖိုဟ်ရ။
အခိၚ်လၟုဟ်ဂှ် ၜိုန်ရဍာ်ၜဳ(သောၚ်းရၚ်း) ကလေၚ်စှ်ေကီုလေဝ် ဗြဲဂၠိုၚ်ဒၟံၚ်ဏီတုဲ ပ္ဍဲဗလးၜဳကပ္ပလဳ၊ သ္ကုတ်သၠုၚ်ကျာ ကေုာံ သ္ကုတ်ဗၟံက်လဒေါဝ် ဗလးၜဳဗၚ်္ဂလာတံဂှ် ဟိုတ်နူဇြဟတ်ကျာမုဟ်သုန် ခိုဟ်ဒၟံၚ်တုဲ အပ္ဍဲၜါတ္ၚဲပၠန်ဝွံလေဝ် သီုတွဵုရးကရေၚ်မပါလုပ် တွဵုရး ကေုာံ ရး ၜိုတ် (၁၁) ရး/တွဵုရးတံဂှ် ဗြဲသာဂၠိုၚ်ကၠုၚ်မာန်ရောၚ် ဌာန်စမ်ၜတ်အကာဲအရာဗြဲကျာ ခယျချိၚ်လဝ်ရ။
ပရိုၚ်−သြၚ်လောန်တိုၚ်(မ်)