ၜဳကလေၚ်၊ မေ (၂၆)
ပ္ဍဲပွိုၚ်ဍုၚ်ၜဳကလေၚ် တိဍာ်ထိၚ်ဒဝ် ဒပ်မဟာ (၁) ဗော်သွးကောန်ဂကူကရေၚ် KNU ဂှ် ညးဍုၚ်ကွာန်ပါဲဒဴဘဲပၞာန် ကလေၚ်စဴကၠုၚ်ဌာန်ဒၟံၚ်တံဝွံ သွက်စၞစ ကေုာံ ဒၞါဲမံၚ်တံဂှ် ဒးဂဗဒၟံၚ် အခက်အိုတ်ရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲပွိုၚ်ဍုၚ်ၜဳကလေၚ်ဂှ် မ္ၚးနူပေါဲဗ္တိုက်ၜါလ္ပာ် ဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံတုဲ လ္ပာ်ကံၚ်ဇြဳပၞာန် ဟိုတ်နူဗ္တိုက်ဂြာတ်ကၠုၚ်ဗုမ် အပ္ဍဲကွာန်ဂမၠိုၚ် နကဵုက္ၜၚ်ကျာဂှ်ရ ညးဒေသ (၁၀,၀၀၀) ပြၚ်ဝွံ ဒးဂြိပ်ဒဴပါဲဒလေတ်လဝ် ပ္ဍဲဒဵုဂြိုပ် ကေုာံ ဒၞါဲဗၠးဘဲတံရ။
အခါလၟုဟ်ဂှ် ပေါဲဗ္တိုက်ဇီုမုက်ၜါလ္ပာ် ကလေၚ်ညိၚ်ကၠုၚ်ဂှ်ရ ညးဍုၚ်ကွာန်ဒေသ ဗ္ဒါဲ (၅၀၀၀) ကလေၚ်စဴကၠုၚ် ဌာန်ဒၟံၚ်အိုတ်ရ။
ဆ္ဂး ညးဍုၚ်ကွာန်ပါဲဒဴဘဲပၞာန် ကလေၚ်စဴကၠုၚ်ဌာန်ဒၟံၚ်တံဝွံ လ္ပာ်ကံၚ်ဇြဳပၞာန် ပ္ဍဲအရာဗ္တိုက်ဂြာတ်ဗုမ် နကဵုက္ၜၚ်ကျာတံဂှ် ဟိုတ်နူသ္ၚိဒၟံၚ်တံ ဇီုကပိုက်လီုလာ်လဝ်တုဲ အရီုဗၚ် ဇွောံမံၚ် ကေုာံ စၞစသုၚ်တံ နွံပၟိက်ဒၟံၚ်ရောၚ် သ္ဂးရ။
“လၟုဟ် ညးပါဲဒဴဘဲပၞာန် ဗွဲမဂၠိုၚ် ကလေၚ်စဴကၠုၚ်အိုတ်ယျ၊ အကာဲအရာလၟုဟ် ညိၚ်အာညိညတုဲ ကလေၚ်စဴကၠုၚ်ရ၊ စိုပ်ကသီုယျဟီုတှ်ေ အခိၚ်သွက်ဂွံထဲဇိက်တဵုလွဳ နွံမံၚ်ဏီရ၊ ဆ္ဂး ပန်ကဵုက္ၜၚ်ကျာတုဲ ညးသ္ၚိမတူလေၚ်အာတံ ဒှ်ဒၟံၚ်အခက်အခုဲ ကဵုဒၞါဲမံၚ်ရ၊ ဒးမံၚ်ဒၟံၚ် ပ္ဍဲသ္ၚိမသကလောကောဒေံ ကြပ်တံဂှ်ရ၊ ဒဵုကဵုအခိၚ်လၟုဟ် ဂကောံရီုဗၚ်တံ ဟွံကၠုၚ်ဏီတုဲ သွက်ဂွံကလေၚ်ဒှ်သ္ၚိမွဲမဂှ် ဟွံလောဲသွာပုဟ်၊ သွက်ညးပါဲဒဴဘဲပၞာန် မကလေၚ်စဴကၠုၚ်တံဂှ် ပြဟ်ဟ်ဏံ အခက်အခုဲ စသုၚ်မံၚ်စံၚ် ဗွိုၚ်လတက်တံ နွံဒၟံၚ်ဏီရ” သာ်ဝွံ ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးဍုၚ်ကွာန်ပါဲဒဴဘဲပၞာန် ကလေၚ်စဴကၠုၚ် ဌာန်ဒၟံၚ်တံဝွံ ပေါဲဗ္တိုက်ကလေၚ်သ္ကာတ်မြဟ်ကၠုၚ်ဂှ် ကဵု ဒပ်ကံၚ်ဇြဳပၞာန် ပန်ပှော်စုတ် လွဟ်လက်နက်ဇၞော် အပ္ဍဲကွာန်တံဂှ်လေဝ် ဂွိၚ်ဒၟံၚ်အိုတ်ရ။
တုဲကၠုၚ် ဂိတုဨပရဴ (၂၀) တေံ ဗ္ဒိုပ်ဒပ်ကံၚ်ဇြဳပၞာန် မၞုံပ္ဍဲကွာန်လေဝ်ကေ ကဵု ကွာန်ဝေန်တာပါန် ပွိုၚ်ဍုၚ်ၜဳကလေၚ်တံ သွက်ဂွံတိတ်စ္ဍးကဵုဂှ် ဒပ်စဵုဒၞါကောန်ဂကူကရေၚ် KNDO ဗွဲကြဴပ္တိတ်လိက်ကဵုသတိတုဲ ပေါဲဗ္တိုက်ၜါလ္ပာ် က္တဵုဒှ်လဝ်တုဲ ဟိုတ်နူပေါဲဗ္တိုက်ဂှ်ရ ညးဒေသတံဝွံ ဒးဂြိပ်ဒဴပါဲဒလေတ်လဝ်ရ။
အခိၚ်လၟုဟ် ပ္ဍဲပွိုၚ်ဍုၚ်ၜဳကလေၚ် တိဍာ်ထိၚ်ဒဝ် KNU ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ ပေါဲဗ္တိုက်ၜါလ္ပာ်တံ ကလေၚ်ညိၚ်ဝတ်ဒၟံၚ်ရ။
ပရိုၚ်−သြၚ်လောန်တိုၚ်(မ်)