ၜၚ်ကံက်၊ မေ (၂၄)
ပ္ဍဲကောံဓရီု ဝန်ဇၞော်ပရေၚ်ကူသာန်သွံရာန် အာယှ−ပသိဖေတ်(ခ်) မကၠောန်ဗဒှ်လဝ် ပ္ဍဲၜၚ်ကံက်ဂှ် နဒဒှ်ဒစဵုဒစး ပွၜက်ၜေတ်လုပ်ရုယှာ ကုယူကရုၚ်ဂှ်တုဲ ညးစၞးအမေရိကာန် မပါလုပ် ကၟိန်ဍုၚ်(၇) ဍုၚ်တံဝွံ ၜိုန်ရတိတ်အာ နူကောံဓရီုဝွံကီုလေဝ် ဂကောံဖန်ဇန် ကောံဓရီုဂှ်ကဵု ဍုၚ်သေံ မဒှ်ဍုၚ်တၠသ္ၚိတံ ဒဒှ်ရထံက်ဂလာန် ဟီုဂးလဝ် ပ္ဍဲတ္ၚဲအဒိုတ်ဂှ်ရ။
မွဲကရောံ ညးစၞးပရေၚ်ကူသာန်သွံရာန် အမေရိကာန် ကာတ်တရေန်တိုၚ်ဂှ် ညးစၞးဂမၠိုၚ် နူဍုၚ်ဂျပါန်၊ အဝ်သတြေလျ၊ နျူဇြဳလာန် ကေုာံ ကနေဒါတံ အဃောမကၠောန်သ္ပဒၟံၚ် ကောံဓရီု Apec ပ္ဍဲတ္ၚဲသ္ၚိသဝ်ဂှ် အခိၚ်ဝန်ဇၞော်ပရေၚ်ပိုန်ဒြပ်ရုယှာ ဟီုဂလာန်လပံက်တုဲဂှ် တိတ်စ္ဍးအာလဝ် နူကောံဓရီုဂှ်ရ။
ဝန်ဇၞော်ပရေၚ်ပိုန်ဒြပ်ရုယှာ အခိၚ်မဟီုဒၟံၚ်ဂလာန်လပံက် ပ္ဍဲကောံဓရီု Apec ကောန်ဂကောံ (၂၁) ဂကောံ မပါလုပ် ကၠောန်ဗဒှ်လဝ် လလအ်ပွိုၚ် (၂) တ္ၚဲဂှ် ထ္ၜးလဝ်ဆန္ဒ ဗီုလၟုဟ်တုဲ ညးစၞးထ္ၜးဆန္ဒ နူမသုန်ဍုန်တံ က္တဵုစဴအာဂှ် သၞာဲဒဴသေံ မွဲတၠ ဟီုရ။
ညးစၞးနူအမေရိကာန် ၊ အဝ်သတြေလျ၊ ကနေဒါ၊ ချဳလဳ၊ ဂျပါန်၊ ကိုဝ်ရဳယျာသၠုၚ်ကျာ ကေုာံ နျူဇြဳလာန်တံဝွံ ဒဒှ်ရဂွိၚ်ဂွါဲစံၚ်တူ သွက်အကြေပ်ဂြတ် စပ်ကဵုပရေၚ်ဗ္စာရဏာမၞိဟ် ယူကရုၚ် ဗွဲမလောန်ရဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ပံၚ်ကောံဂှ်ရ။
“ဒေသ အာယှ−ပသိဖေတ်(ခ်) ၜိုဟ်လလမ်တုဲ မၞုံကဵုအစောံစရာဲ ဒုၚ်အဍေဝ်အဍာ ဗွဲမစိုပ်တရဴ သီုကဵုယျဵုလ္ဂူတပ်တးတံဂှ် ထပ်သ္ပဒတန် ကုတၚ်ပၟိက်ဇၞော် စေဝ်ပၞောန်သ္ဇိုၚ် ဍုၚ်သ္အာၚ်တံတုဲ ရုယှာဝွံ ပွမဗ္တိုက် စကာဇြဟတ်တံဂှ် ဒေါအ်ဒေၚ်ကဵု လွာဲဂှ်တုဲ ဇြဟတ်ပၞာန် နူယူကရုၚ်အိုဿီု သွက်ဂွံရုပ်သီကဵုဂှ် ဖ္တိုက်ဖ္အောဝ်လဝ် ဗွဲမဇြိုဟ်နက်ရ” သာ်ဝွံ ကၟိန်ဍုၚ်မတိတ်အာ နူကောံဓရီုတံ ဟီုရ။
ညးစၞး နူကနေဒါ၊ နျူဇြဳလာန်၊ ဂျပါန်၊ အဝ်သတြေလျ မတိတ်အာ နူကောံဓရီု ပရေၚ်ပံၚ်တောဲရေၚ်တၠုၚ် ပရေၚ်ပိုန်ဒြပ် အာယှ−ပသိဖေတ်(ခ်) Apec တံဝွံ ပံၚ်တောဲကဵု အမေရိကာန် ညးစၞးပရေၚ်ကူသာန်သွံရာန် အမေရိကာန် ကာတ်တရေန်တိုၚ် မက္ဍိုက်လဝ်က္ဍိုပ်ဂှ်ရ။
ဟိုတ်နူပရေၚ်ထ္ကးပြး စပ်ကဵုပွၜက်ၜေတ်လုပ် ရုယှာ ကုယူကရုၚ်တုဲ ဟွံလလောၚ်ပ္တိတ် တၚ်လလောၚ်တြးပံၚ်ကောံမွဲသာ် ကောံဓရီု Apec ဝွံ တုဲဒှ်အာ ပ္ဍဲတ္ၚဲအဒိုတ်ဂှ်ရ။
ဝန်ဇၞော်ပရေၚ်ပိုန်ဒြပ်ရုယှာဝွံ ပ္ဍဲအခိၚ်ကောံဓရီုတုဲဂှ် ဟီုဂးလဝ် ကုအ္စာပရိုၚ်ဂမၠိုၚ် ပၞောဝ်ကဵုတၚ် (၂၄) တၚ်ဂှ် ဒဒှ်ရတုပ်လဝ်စိုတ် (၂၃) တၚ်ဝွံတုဲ သၠုၚ်ပ္တိုန်အေဂျေန်ဒါပရေၚ်ပိုန်ဒြပ် ဂကောံ Apec ဂှ် မာန်ဒၟံၚ်ဖိုဟ်တုဲ ဟိုတ်နူတၚ်လောၚ်တြး ပံၚ်ကောံဟွံမွဲဂှ်ရ ပ္တိန်ဒုဟ် ကုညးမတိတ်အာလဝ်တံရဂှ် ထပ်ဟီုဂးလဝ်ရ။
“ဟိုတ်ပိုယ် ဟွံဂွံလဝ်တၚ်တုပ်စိုတ်မွဲဂှ်တှ်ေ ဍုၚ်လ္ၚဵုတံဂှ် ဂ္စါန်ကၠုၚ် သွက်ဂွံရပ်စပ်စကာ Forum ဂှ် နကဵုပရေၚ်ဍုၚ်ကွာန်ရ၊ အာဂတဏံ ပရေၚ်လစွံစိုတ် ထ္ကးပြး ညံၚ်ဟွံဂွံက္တဵုဒှ် ဒးဂပ်ဝ်စွံအရီု သွက်ဂွံဂၠါဲ သ္ဇိုၚ်မဆေၚ်စပ်ကဵု ညးဂမၠိုၚ်တံရောၚ်” ဒဒှ်ရညးဟီုလဝ် သာ်ဝွံဂှ် ဌာန်ပရိုၚ်ရုယှာမွဲ လလောၚ်ပ္တိတ်လဝ်ရ။
Ref: Bangkok Post & The Seattle Times