ကျာ်မြဟ်၊ အဝ်ဂတ် ၃၀
အပ္ဍဲတွဵုရးမန် ပွိုၚ်ဍုၚ်ကျာ်မြဟ် ဟိုတ်နူဗြဲဂူရိုပ်ထတ်တုဲ ဍာ်ၜဳကဍတ်ဆက်သၠုၚ်တိုန်မံၚ်ဂှ်ရ ကွာန်ၜိုတ် ၃၀ ကွာန်တံ ဍာ်ဗၠိုက်ဒၟံၚ်ရဂှ် ညးဒေသတံကဵုဂကောံရီုဗၚ်ဟံၚ်ပြာ်တံ ဟီုလဴကဵု ဌာန်ပရိုၚ် သြၚ်လောန်တိုၚ်မ်ရ။
စနူဂိတုအဝ်ဂတ် ၂၄ လောန်ကၠုၚ်တေံ ဟိုတ်နူဗြဲဂူရိုပ်ထတ်တုဲ ဍာ်ၜဳကဍတ်ဆက်သၠုၚ်တိုန်အာဂှ်ရ ပ္ဍဲအရာပ်ဒၞာဲတိသဝ်ဝ် လ္တူဍုၚ်ကျာ်မြဟ်တံကီု သီုကဵုကွာန်ဗဒါဲဇိုၚ်ၚ်ၜဳကဍတ် ပရေၚ်ဍာ်ဇၞော်တံ က္တဵဒှ်ဒၟံၚ်ရ။
ဟိုတ်နူဍာ်ဇၞော်တုဲ ကွာန်ဥုလေဝ်၊ ကွာန်ကမနာမ်၊ ကုန်ပဝ်လဝ်၊ ဖာသိမ်၊ လမုခို၊ မိကရေၚ်၊ ဗိင်ဗျာသၟဝ်၊ ကွာန်ဍာ်တဴတံသီုဖအိုတ် ကရပ် ၃၀ ကွာန်တံ ဗၠိုက်ဒၟံၚ်ဍာ်တုဲ ညးဒးဘဲဒဒိုက်ဍာ်တံ နွံမံၚ်လၟိဟ်ကဵုလက်ပြၚ် မဒှ်ရ။
ပ္ဍဲပွိုၚ်ဍုၚ်ကျာ်မြဟ် ဟိုတ်နူဘဲဍာ်ဇၞော်ဒှ်ဒၟံၚ်တုဲ ပံက်လဝ်ဗ္ဒိုပ်ရီုဗၚ်ပရေၚ်ဟံၚ်ပြာ်ယာယဳနွံ ၂ ဒၞာဲ၊ ပ္ဍဲအခိၚ်လၟုဟ် ညးကၠုၚ်စိုပ်ဗ္ဒဗ္ဒာဲနွံဒၟံၚ်ဟွံအောန်နူကဵု ၁၃၀ တၠနွံရောၚ်ဂှ် ဂကောံရီုဗၚ်ဟံၚ်ပြာ်တံ ဟီုရ။
အတိုၚ်ဂကောံရီုဗၚ်ဟံၚ်ပြာ်တံဟီုဂှ်တှ်ေ ပ္ဍဲဂိတုအဝ်ဂတ် ၂၉ ဏံလေဝ် ဟိုတ်နူဗြဲဆက်ဂူမံၚ်တုဲ ဍာ်ၜဳကဍတ် ဆက်သၠုၚ်တိုန်ဂှ်ရ လၟိဟ်ညးဒးဒဒိုက်ဘဲဍာ်တံ ထပ်ဂၠိုၚ်တိုန်မာန်ရ။
ဟိုတ်နူဍာ်ဇၞော်တုဲ ဘာဗတောန်လိက် ၜိုတ် ၃၀ ဒၞာဲ ဒးကၟာတ်လဝ်ၜိုတ်မွဲချိုတ်ခဏနွံတုဲ ဟိုတ်နူ ဍာ်ၜဳဆက်သၠုၚ်တိုန်မံၚ်ဂှ်ရ ညးဒေသလၟိဟ်လ္ၚီပြၚ်ၚ်တံ ပလေဝ်စဒၟံၚ်သွက်သ္ဂောံပြံၚ်ပဆုဲအာ ပရေၚ်အကာဲအရာ ကာမံက်တိုန်ရောၚ် သ္ဂးရ။
အတိုၚ် နူကဵုဌာနပရေၚ်ဗြဲကျာဇလဗေဒ လလောၚ်တြးမ္ဂး သီုကဵုတွဵုရးမန်ကီု ပ္ဍဲကဵုရး၊ တွဵုရး ၉ ဒၞာဲတံဂှ် အပ္ဍဲၜါတ္ၚဲဂတဏံမ္ဂး ဗြဲဇၞော်ထပ်ဂူမာန်တုဲ ညံၚ်ဂွံဒစးဒုၚ်ပလေဝ်စလဝ် သွက်ဘဲအန္တရာဲဍာ်ဇၞော်ညိဂှ် ကဵုလဝ်သတိနွံရ။
ပရိုၚ် – သြၚ်လောန်တိုၚ်မ်
Photo – CJ