ဖာပန်၊ အဝ်ဂတ် ၃၀
အပ္ဍဲမွဲဒမြိပ် အကြာၜဳသြၚ်လောန် ပယျဵု သေံ-ဗၟာတံဂှ် ပံၚ်တောဲကဵုညးတာလျိုၚ်သေံတံတုဲ ဗက်ဂၠိုက်ဂၠာဲရပ်သီဂွံလဝ် ဆုဟွံလုပ်သၞောဝ်ရောၚ်ဂှ် နူဗဟဵုဗော်သွးကောန်ဂကူကရေၚ် KNU လလောၚ်တြးလဝ် ပရိုၚ်ရ။
အပ္ဍဲဂိတုအဝ်ဂတ် ၂၃ လောန်ကၠုၚ်တေံ ပ္ဍဲဂိက်သၞေဟ်ကင် မေဝ်ရာထာ ခရိုၚ်ဖာပန် တွဵုရးကရေၚ်ဂှ် ရပ်ဂွံဆုဟွံလုပ်သၞောဝ် ၄၅ တၞုၚ်၊ ဂိတုအဝ်ဂတ် ၂၆ ဂှ် ပ္ဍဲသြၚ်ၜဳသြၚ်လောန် လပါ်တိဍာ်သေံဂှ် ထပ်ရပ်ဂွံလဝ် ဆုဟွံလုပ်သၞောဝ် ၅၉ တၞုၚ်ရောၚ်။
ဆုဟွံလုပ်သၞောဝ် ၄၅ တၞုၚ်ရပ်သီဂွံလဝ်တံဂှ် ပအပ်ကဵုလဝ်ဌာနဂြိပ်ဆု ခရိုၚ်ဖာပန် KNU တုဲ၊ ဆုဟွံလုပ်သၞောဝ် ၅၉ တၞုၚ် ရပ်ဂွံလဝ်ပ္ဍဲလပါ်တိသေံတေံဂှ်တှ်ေ ပအပ်ကဵုလဝ်ဇရေၚ်ညးတာလျိုၚ်သေံတံရဂှ် ပ္ဍဲလိက်လလောၚ်တြး ထမံက်ထ္ၜးလဝ်ရ။
ပရေၚ်ရပ်သီကေတ်ဆုတံဏံဂှ် နကဵုဗီုပြၚ် ပရေၚ်လဝေၚ်ပၞာန်မွဲ သေံကဵု KNU တံ ပံၚ်တောဲဗတိုက်ပလီုလဝ် ပရေၚ်ကုတ်ဗါ်ပတိတ် ကၠောန်ဆုဟွံလုပ်သၞောဝ် ပ္ဍဲကဵုဒေသပယျဵုတံရောၚ် သ္ဂးရ။
ပ္ဍဲကဵုခရိုၚ်ဖာပန် နူကဵု KNU ဒက်ပ္တန်လဝ် ရုၚ်ပရေၚ်ဂီုကၠီုပယျဵု ကေုာံကူသာန်ဗၞိက်နွံတုဲ သွက်သ္ဂောံတာဒၞာဆေဝ်ဒဝ်အာ ပရေၚ်ကုတ်ဆုဟွံလုပ်သၞောဝ်တံကဵု ပရေၚ်ကူသာန်ဗၞိက်ဟၟဲကဵုအခေါၚ်တံဂှ် ဆက်သၠုၚ်ပတိုန်အာပရေၚ်ပံၚ်တောဲ ကဵုညးတာလျိုၚ်သေံတံရောၚ် သ္ဂးလဝ်ရ။
တုဲပၠန် ပရေၚ်ရပ်သီဆု ဟွံလုပ်သၞောဝ်ဏံဝွံ ထ္ၜးဒၟံၚ်အကာဲအရာဆက်သၠောဲတြးရေၚ်တၠုၚ်အာမံၚ် ကမၠောန်ပရေၚ်အုပ်လဒမ်သၞောဝ်ဓဝ်ဥပဒေ မွဲဒမြိပ်ဒေသပယျဵု ညိဟွံကဵုပိုတ်ရောၚ်ဂှ် ပ္ဍဲလိက်လလောၚ်တြး ဗဟဵု KNU ထမံက်ထ္ၜးလဝ်ရ။
ပရိုၚ် – သြၚ်လောန်တိုၚ်မ်
Photo – KNU