ကိယျေဗ်၊ နဝ်ဝေမ်ဗာ (၄)
ပ္ဍဲဂိတုနဝ်ဝေမ်ဗာ (၃) ဂှ် ရုယှာပန်ပှော်ဗ္တိုက်လဝ် ဒေသယူကရုၚ် နကဵုကမ်လှောဝ်တုဲ ရုၚ်စက်နျူကလဳယျာဇၞော်အိုတ် မကဵုဒၟံၚ်ဇြဟတ်ဓာတ်လလဳ ကုဥရဝ်ပ မပါလုပ် ပ္ဍဲဒေသ ဗွဲမဂၠိုၚ်ဂၠေၚ်ဂှ် က္တဵုဒှ်လဝ် ပရေၚ်ပန်ပှော်တံရဂှ် ညးတာလျိုၚ်ယူကရုၚ်တံ ဟီုဂးလဝ်ရ။
ရုၚ်စက်ကဵုဇြဟတ်ဓာတ်နျူကလဳယျာ မၞုံသ္ကုတ်သၠုၚ်ကျာယူကရုၚ် ဇြာပဝ်ရဳဇြဳဇြဳယျာဂှ်ဝွံ ဒၟါနူရုယှာပန်ပှော်ဂှ်တုဲ လာၚ်ဇြဟတ်ဗိုအ် ဓာတ်လလဳသၠုၚ် မသှ်ေဒၟံၚ်တံ လီုလာ်အာလဝ်တုဲ ပွမထပ်ဆက်စၠောံကဵု လာၚ်ဇြဟတ်ဓာတ်မဟာတံဂှ် ဒးဒေါအ်ဒေၚ်လဝ်ရောၚ် ကမ္ပဏဳနျူကလဳယျာ ယူကရုၚ် အာန်နာဂိုဝ်တောန် ဟီုဂးလဝ်ရ။
ရုၚ်စက်ဏံဂှ်ဝွံ နွံ ပ္ဍဲတဲရုယှာတုဲ ဒးဂေတ်ဂြိပ်ဒၟံၚ် နကဵုသၟာကမၠောန် ယူကရုၚ်တံကီုလေဝ် သွက်စက်ပၟတ်တံ ဂွံဂေတ်ဂြိပ်ဂှ် ဒးသုၚ်စောဲလဝ် ကၠေၚ်စၞပၟတ် ဗၞတ် (၁၅) တ္ၚဲရောၚ် ကမ္ပဏဳဂှ် သ္ဂးရ။
ပ္ဍဲသာမ်မဳ၊ ခါကိဗ် မၞုံသ္ကုတ်လဒေါဝ် ကေုာံ သ္ကုတ်ဗၟံက်သၟဝ်ကျာ ဍုၚ်ယူကရုၚ်တံဂှ် ဒုၚ်လဝ်စဳရေၚ် ဒဒှ်ရရုယှာ ဗ္တိုက်လဝ်ဂှ်တုဲ ပ္ဍဲဒေသသ္ကုတ်ဗၟံက် ရုယှာတံ မထိၚ်ဒက်လတ်ဂှ်လေဝ် ပေါဲဗ္တိုက်တံ က္တဵုဒှ်ဒၟံၚ် ဗွဲမသ္ကာတ်မြဟ်ရ။
“သၞဂှ် သ္ပလဝ်အာရီု သွက်ဂွံတာဒၞါ ကမၠောန်ဒပ်စဵုဒၞါတံ ပ္ဍဲတိဍာ်လ္ၚဵုတံဂှ်တုဲ ဂ္စါန်ဒၟံၚ် သွက်ဂွံထိၚ်ဒက် တိဍာ်မသီဂိုၚ်ဂွံလဝ် ယာယဳတံရ” ဂှ် သ္ကိုပ်က္ဍိုက်ပ်ပၞာန် ယူကရုၚ်ဟီုလဝ် ပ္ဍဲတ္ၚဲသာ်ဂှ်ရ။
ပ္ဍဵုပကောပ် ဒပ်ပၞာန်ယူကရုၚ်တုဲ သွက်ဂွံပါဲတးထောံ အရာမဘပဠ ပရေၚ်ဂီုကၠီုရုယှာ အစောံစရာဲမၞုံဒၟံၚ်တံဂှ်တုဲ ရုယှာစွံပွန်ဗ္တိုက်ကၠုၚ်ဒၟံၚ် စမြိုၚ်သ္ဇိုၚ်တံရဂှ် ညးဟီုရ။
နဒဒှ်သွဟ်အဆက်လက္ကရဴဂှ် ကောန်အရာပ်ယူကရုၚ်တံဝွံ အပ္ဍဲသတ္တာဟ ခြာဟွံလအ်တံဂှ် ဒးဒုၚ်ဖအောန်ဖျေံလဝ် ပွမပါ်ပရအ်ဍာ်တံကဵု ဇြဟတ်ဓာတ်လလဳပိုတ်ပၠိုတ်တံတုဲ ဒၟါနူပဋိပက္ခဂှ်တုဲ မၞိဟ်ဂၠိုၚ်ကဵုလ္ၚီ ချိုတ်အာလဝ်ရ။
ၜိုန်ရဍုၚ်ဇၞော်ယူကရုၚ် ဂၠိုၚ်ကဵုပြကောဋိကိုဋ်တံ လီုလာ်ဆောံလေၚ်အာကီုလေဝ် ရုယှာဂှ် ဟွံစွံပွန် ကုကောန်အရာပ်တံပုဟ် ရဴဝွံ ဂယျာန်ပါဲဒၟံၚ်ဖိုဟ်ရ။
ဒၟါနူရုယှာဗ္တိုက်လဝ် စမြိုၚ်သ္ဇိုၚ်ဇြဟ်ဓာတ်တံ တုဲကၠုၚ်ခြာဟွံလအ်တံဂှ်တုဲ သ္ကိုပ်ဝန်ဇၞော် ကာဍုၚ်သ္အာၚ် G7 တံဝွံ အခိၚ်မဆဵုဂဗ ပ္ဍဲဂျာမဏဳမ္ဂး သဳကၠဳအာ ပရေၚ်ဂွံရေၚ်တၠုၚ်ပ္ညဳပ္ညပ် သွက်ဂွံထပ်ရီုဗၚ်ထံက်ပၚ် ယူကရုၚ်ပၠန်ဏောၚ် မဒှ်ရ။
Ref: CNA