မတ်မလီု၊ နဝ်ဝေမ်ဗာ (၄)
ဟိုတ်နူၚုဟ်ထဝ် ကေုာံ ဒဝ်ဠာ ကလေၚ်ညိၚ်ကၠုၚ်ညိညပၠန်ဂှ်ရ ပ္ဍဲဗွဝ်ဖျာ တိသ္ၚိကၠအ် တွဵုရးဍုၚ်မန်တံဂှ် ပရေၚ်သွံရာန် ကလေၚ်ညိၚ်ဒၟံၚ်ရောၚ် ညးရေၚ်တၠုၚ်ဖဵု တိသ္ၚိကၠအ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲဂိတုအဝ်ဂါတ် တုဲကၠုၚ်တေံဂှ် ကြဴနူဒဝ်ဠာအမေရိကာန် မွဲဒဝ်ဠာ တိုန်အာ (၄၀၀၀) ဒ္ကေဝ်တုဲ ထဝ်ဒကောၚ်မွဲဒ္ကေဝ်ဂှ် တိုန်အာ စဵုကဵု (၃၀) ကိုဋ်ဒ္ကေဝ်ပြၚ်တုဲဂှ် ဒဒှ်မရာန်ပကောံကၠုၚ် တိသ္ၚိကၠအ်တံ သၠုၚ်တိုန်ကၠုၚ်လဝ် တီတီဒှ်ဒှ်ရ။
ဆ္ဂး အခိၚ်လၟုဟ်ဂှ် ဒဝ်ဠာအမေရိကာန် မွဲဒဝ်ဠာ ကလေၚ်စှ်ေအာ ပွဳပွူ (၃၀၀၀) ဒ္ကေဝ်တုဲ ၚုဟ်ထဝ်ဒကောၚ်ဂှ်လေဝ် မွဲဒကေဝ် စှ်ေအာ စဵုကဵု (၂၆) ကိုဋ်ဒ္ကေဝ်တုဲ ပရေၚ်သွံရာန် ဗွဝ်ဖျာတိသ္ၚိကၠအ်တံလေဝ် ကလေၚ်ညိၚ်ကၠုၚ်ကီုရ။
ညးရေၚ်တၠုၚ်ဖဵုတိသ္ၚိကၠအ်မွဲတၠဂှ် ၚုဟ်ဒဝ်ဠာကဵု ၚုဟ်ထဝ်ကလေၚ်ညိၚ်လဝ်တုဲ မၞိဟ်သၠုဲမာန်တံ ကလေၚ်ရာန်ပကောံကၠုၚ် လ္ပာ်ထဝ်တံ သာဂၠိုၚ်ကၠုၚ်ဂှ်ရ ပွမရာန်တိသ္ၚိကၠအ်တံ ယအ်စှ်ေကၠုၚ်ရဂှ် ဟီုရ။
“ၚုဟ်ထဝ်ဂှ် ကလေၚ်ညိၚ်အာ ပ္ဍဲအကြာ (၂၅/၂၆) ကိုဋ်ဂှ်တုဲ ကၠာတေံ ကေၚ်ဒှ်လဝ် စဵုကဵု (၃၀) ကိုဋ်တှ်ေ လၟုဟ်ဒှ်အာသဘဴ ကလေၚ်ညိၚ်ဝတ်အာဂှ်ရ သၠုဲအပဵုတံဂှ် ကလေၚ်ပကောံထောံ လ္ပာ်ထဝ်ပၠန်၊ ဟိုတ်ဂှ်ရ ပရေၚ်သွံရာန် လ္ပာ်တိတံဂှ် ညိၚ်အာရ” သာ်ဝွံ ညးသ္ဂးရ။
စနူအခိၚ်ဒပ်ပၞာန်သီအဝဵု သၞာံတုဲကၠုၚ်တေံတုဲ ဟိုတ်နူသြန်ဖောဝ် ကေုာံ ၚုဟ်မးသြန်ဗၟာစှ်ေဒၟံၚ်တံ က္တဵုဒှ်လဝ် အဆက်က်တုဲ ၚုဟ်ထဝ်ကဵု ဒဝ်ဠာဂှ်လေဝ် ဟွံညိၚ်ဝတ်တုဲ က္တဵုဒှ်ဒၟံၚ် အပြံၚ်အလှာဲ မွဲဏှမွဲဏှရ။
ဟိုတ်ဂှ်ရ ညးမကၠောန်ဒၟံၚ် ကမၠောန်ဍုၚ်သ္အာၚ်တံ၊ တၠကမၠောန် ပရေၚ်ပိုန်ဒြပ် အပ္ဍဲဍုၚ်တံ ကေုာံ ညးမပကောံပကေဝ်သြန်သၠုဲတံဂှ် ရာန်ပကောံကၠုၚ်၊ ဓလိုက်ကၠုၚ်တမ်ရိုဟ် လ္တူတိသ္ၚိကၠအ်တံရ။
ညးရေၚ်တၠုၚ်ဖဵုတိသ္ၚိကၠအ်မွဲတၠဂှ်လေဝ် ကၠာတေံ ဟိုတ်နူသြန်သၠုဲဟွံညိၚ်ဝတ်တုဲ ရာန်ပကောံကၠုၚ် ဂအာၚ်တိတံကီုလေဝ် အခိၚ်လၟုဟ် မၞိဟ်ကလေၚ်သွံ ဂအာၚ်တိတံ ဂၠိုၚ်ဒၟံၚ်တုဲ မၞိဟ်ရာန် ဟွံမွဲဂှ်ရ ပရေၚ်သွံရာန်တံ အောန်ကြဳဒၟံၚ်ရောၚ် သ္ဂးရ။
“တိလၟုဟ်ဂှ်တှ်ေ ဒှ်ဒၟံၚ်ၚုဟ် အိုတ်ဍာ်ရတုဲ လ္ၚဵုဂှ်တှ်ေ ကလေၚ်သွံတိတံဂှ်တုဲ ကလေၚ်အာလ္ပာ်ထဝ်တေံ လၟုဟ်ဂှ်တှ်ေ မၞိဟ်သွံတိတံ ကလေၚ်ဂၠိုၚ်ကၠုၚ်ညိညပၠန်၊ မၞိဟ် သွံကၠုၚ်ဒၟံၚ် နူတမ်တေံဂှ်လေဝ် နွံ၊ မၞိဟ်ရာန်ဓလိုက်လဝ်တမ်ရိုဟ်တံလေဝ် ကလေၚ်သွံတုဲ ပ္ဍဲပရေၚ်သွံတြးတံဂှ်တှ်ေ ဂၠိုၚ်အာညိညရ၊ ဍေံဂၠိုၚ်အာတှ်ေ ၚုဟ်ထဝ် နူကဵုတိုန်ဒၟံၚ်ညိညဂှ် ကလေၚ်စှ်ေအာ ၚုဟ်လၟေၚ်ၚ်တုဲ ကလေၚ်ပကောံကၠုၚ် လ္ပာ်ထဝ်တံပၠန်ရ” ဂှ် ညးဟီုရ။
အခိၚ်ကာလလၟုဟ်ဂှ်ဝွံ ကရောံသြန်သၠုဲညိၚ်ကၠုၚ်ညိညဂှ် ကဵုကၠုၚ်ဒါန် အာကၠုၚ်တရဴတံဂှ်ရ ပရေၚ်သွံရာန် တိသ္ၚိကၠအ်တံ ညိၚ်ဒၟံၚ်တုဲ ၜိုတ်မၞိဟ်ဒးရပ်စပ် ဟွံဒေါအ်ဟွံဂွံတံဓဝ်ရ ရာန်ကေတ်လဝ် တိသ္ၚိကၠအ်တံရဂှ် ညးရေၚ်တၠုၚ်ဖဵုတံ သ္ဂးအိုတ်ရ။
သ္အာၚ်နူဂှ်ပၠန် ဟိုတ်နူၚုဟ်ထဝ် ကဵု ၚုဟ်ဒဝ်ဠာတံ ကလေၚ်ညိၚ်ကၠုၚ် ညိညဂှ်ရ ပ္ဍဲဗွဝ်ဖျာ တိသ္ၚိကၠအ်ဂှ်လေဝ် ဂအာၚ်တိ (၄၀/၆၀) ပေ ၚုဟ်မးမၞုံ (၆၀၀) ကိုဋ်ဒ္ကေဝ်တံဂှ် ဒးယှအ်သွံဒၟံၚ် စဵုကဵု (၅၀) ကိုဋ်ဓဝ်ဂှ်လေဝ် ညးရေၚ်တၠုၚ်ဖဵုတံ ဟီုရ။
ပ္ဍဲဗွဝ်ဖျာတိသ္ၚိကၠအ် တွဵုရးဍုၚ်မန်တံဂှ် ပ္ဍဲအရာပ် မျာၚ်သာယာ ကေုာံ အရာပ် သဳရိမျာၚ် လ္တူဍုၚ်မတ်မလီုတံဂှ် ဂအာၚ်တိ (၄၀/၆၀) ပေ မၞုံမွဲဂအာၚ်ဂှ် ၚုဟ်မၞုံဒၟံၚ် နူ (၅၀၀) ကိုဋ် စဵုကဵု (၆၀၀) ကိုဋ်တုဲ ဂအာၚ်တိ (၆၀/၈၀) ပေ မွဲဂအာၚ်ဂှ်လေဝ် ဂွံဒၟံၚ်ၚုဟ် နူ (၁၀၀၀) ကိုဋ် စဵုကဵု (၁၅၀၀) ကိုဋ် ဒ္ကေဝ်ရ။
ပရိုၚ်−သြၚ်လောန်တိုၚ်(မ်)