ဖာပန်၊ အံက်တဝ်ပါ ၃၀
အပ္ဍဲကဵု KNU မဟာဒပ် ၅ ခရိုၚ်ဖာပန်ထိၚ်ချုက်လဝ် ကွာန်နွံမံၚ်မွဲဒမြိပ်ပယျဵုသေံ-ဗမာတံဂှ် ၜၚ်ကျာဒပ်ပၞာန်ဗမာ ကြဳဗုမ်ဗတိုက်မံၚ် ကၠောန်ကၠုၚ်စေအ်အ်တုဲ ကောန်ညးဍုၚ်ကွာန် ပရေၚ်ဒးဝပ်ချိုတ်အာလဝ်နွံမံၚ်ရဂှ် တမ်ရိုက်ကၞက်ပရိုၚ်ဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
တိဍာ် KNU မဟာဒပ် ၅ ကရပ်ဇိုၚ်ၜဳသြၚ်လောန် ကွာန်မာနူထ ရဲဒဴပၞာန်တံမံၚ်ဒၟံၚ်ဂှ် ပ္ဍဲအံက်တဝ်ပါ ၂၅ ဒပ်ပၞာန်ဗမာကြဳဗုမ်တုဲ ခြာၜါတ္ၚဲ ပ္ဍဲအံက်တဝ်ပါ ၂၇ ကရပ်ဇိုၚ်ၜဳသြၚ်လောန် ကွာန်ယျာထဂှ် ဒပ်ပၞာန်ဗမာ ထပ်ကြဳဗုမ်ပၠန်ရ။
ပ္ဍဲအံက်တဝ်ပါ ၂၇ ပယျာံအခိၚ်ဗတမ် တိဍာ်မဟာဒပ် ၅ ပရေၚ်ဒပ်ပၞာန် ကြဳလဝ်ဗုမ် ကွာန်ယျာထဂှ် သ္ၚိဌာန် ညးဍုၚ်ကွာန်လ္ၚဵုတံလီုလာ်အာနွံကီုလေဝ် ညးဍုၚ်ကွာန်တံ ဒးလဝ်ဘဲဟွံမွဲပုဟ် ဂွံတီနူ ရိုဟ်ကၞက်ပရိုၚ်ကြပ်ကဵု မဟာဒပ် ၅ တံရ။
ပ္ဍဲကဵုအံက်တဝ်ပါ ၂၅ ပရေၚ်ဒပ်ပၞာန်ဗမာ ကြဳလဝ်ဗုမ် ကွာန်မာနူထဂှ်တှ်ေ ကောန်ၚာ်မွဲတၠချိုတ်၊ ၃ တၠဒးဝပ်တုဲ သ္ၚိဌာန်တံလေဝ် ဒးဗုမ်လီုလာ်အာလဝ် မဒှ်ရ။
အပ္ဍဲ KNU မဟာဒပ် ၅ ခရိုၚ်ဖာပန် လ္တူဂအုံကွာန် ခိုတွဳထာ ပ္ဍဲအံက်တဝ်ပါ တ္ၚဲ ၁၇ ဂှ် ၜၚ်ကျာဒပ်ပၞာန်ဗမာတံ ကြဳလဝ်ဗုမ်ဂှ် ကောန်ၚာ် ၉ သၞာံမွဲတၠဒးအာဝပ်တုဲ သ္ၚိဌာန် ၂၄ မ လီုလာ် အာလဝ်နွံရ။
ခရိုၚ်ဖာပန် ပ္ဍဲတိဍာ်မဟာဒပ် ၅ ထပက်ကၠုၚ်ကရောၚ်ပၞာန်ဂှ် ဒပ်ပၞာန်ဗမာတံ စိုပ်မံၚ်ကွာန်ဂြၚ်စိၚ် လ္တူဂၠံၚ် ကမမံၚ်- ဖာပန်ဂှ် ဖျေံလဝ်ဒပ်တုဲ ဆက်ထပက်အာမံၚ် ကရောၚ်ပၞာန်ဂတတေံပၠန်ရ။
ပ္ဍဲသ္ကုတ်ဂၠံၚ်ကမမံၚ်-ဖာပန်ဂှ် ပေါဲဗတိုက်တံဆက်ဒှ်မံၚ်တုဲ ဒပ် KNLA မဟာဒပ် ၅ ဗတိုက်ဂှ်ရ လပါ်ဒပ်ပၞာန်တံ ဒးဝပ်ချိုတ်လဝ်နွံရောၚ်ဂှ် ဂွံတီနူ ရိုဟ်ကၞက်ပရိုၚ်ကြပ်ကဵု မဟာဒပ် ၅ တံရ။
ဒပ် KNLA မဟာဒပ် ၅ ကဵု ဂကောံဇြဟတ်ပၠန်ဂတးတံ ဗိုင်ကၟာတ် ဆိုအ်လဝ် ပ္ဍဲကဵုရုၚ်ဗျူဟာ ဒပ်ပၞာန်ဗမာဂှ်လေဝ် ပေါဲဗတိုက် ဆက်ဒှ်မံၚ်ကီုတုဲ နူကဵုပၞာန်ကျာတံ ကၠုၚ်ဘိုၚ်ပန်ကဵုမံၚ် အရီုဗၚ်လၟိုန်ရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – CJ