ကျာ်ထဝ်၊ အံက်တဝ်ပါ ၃၀
တွဵုရးမန် ပွိုၚ်ဍုၚ်ကျာ်ထဝ် ပ္ဍဲကဵုကွာန်ချံၚ်သံက်ဂှ် ပေါဲဗတိုက်ဟၟဲမွဲသာ် ဟိုတ်နူ ဒပ်ပၞာန်ဗမာကြဳဗုမ်တုဲ အလုံကွာန်မွဲ ဒးဂြိပ်ပါဲတိတ်အာအိုတ်ရဂှ် တမ်ရိုဟ်ကၞက်ပရိုၚ်ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
အပ္ဍဲအံက်တဝ်ပါ ၂၈ ပယျာံနူဂယး ၜိုတ်မွဲနာဍဳဂှ် ပ္ဍဲကဵုကွာန်ချံၚ်သံက် ၜၚ်ကျာဂျက်ဖိုက်တာ ဒပ်ပၞာန်ဗမာ ၂ မ ကၠုၚ်ကြဳဖျေံဏာဗုမ်ပံၚ် ၅၀၀ ၜါမရ။
ပရေၚ်ဒပ်ပၞာန်ဗမာ ကၠုၚ်ကြဳဖျေံဏာဗုမ်ၜါမဂှ် ဒတုံခတိုဟ်အာ လပါ်မ္ၚးကွာန်ဂှ်ရ ညးဍုၚ်ကွာန်ကောန်အရာပ်တံ ချိုတ်လဝ်ဟွံမွဲကီုလေဝ် သ္ၚိဌာန် ၅ မ လီုလာ်အာလဝ်နွံရ။
ဟိုတ်နူဘဲအန္တရာဲပၞာန်ကျာ ဒပ်ပၞာန်ဗမာဂှ်ရ ညးဍုၚ်ကွာန် ပ္ဍဲကဵုကွာန်ချံၚ်သံက် ဒးဂြိပ်ပါဲတိတ်အာ အတိုၚ်မွဲကွာန်ရဂှ် သ္ဂးရ။
ပ္ဍဲပွိုၚ်ဍုၚ်ကျာ်ထဝ် အကြာဂိတုဏံဂှ် ၜၚ်ကျာဒပ်ပၞာန်ဗမာ ဖျေံဗုမ်ပန်ဗတိုက်လဝ် ဟွံအောန်နူကဵု ၅ ဝါကၠောန်လဝ်တုဲ ဟိုတ်နူပရေၚ်ကြဳဗုမ် ဒပ်ပၞာန်ဗမာတံဂှ် ညးဍုၚ်ကွာန်ကောန်အရာပ် ဒးဝပ်ချိုတ် ဂၠိုၚ်တိုန်ကၠုၚ်မံၚ်ရ။
ပွိုၚ်ဍုၚ်ကျာ်ထဝ်ဂှ် ပ္ဍဲအကြာဂိတုဏံ ဟိုတ်နူဒပ်ပၞာန်ဗမာ ပန်ကဵုလွဟ်ဇၞော်ကီု ကြဳဗုမ်ကဵုၜၚ်ကျာဂှ် ညးဍုၚ်ကွာန် ၈ တၠချိုတ်အာတုဲ ၁၁ တၠ ဒးလဝ်ဝပ်နွံရောၚ် ဗော်သွးကောန်ဂကူကရေၚ် KNU ဗဟဵု လလောၚ်တြးပတိတ်လဝ်ပရိုၚ်ရ။
ဟိုတ်နူဘဲသၞအန္တရာဲပၞာန်ကျာတုဲ ညးဍုၚ်ကွာန်လၟိဟ်ကဵုလ္ၚီတံ ဒးဂြိပ်ပါဲလဝ်ဘဲပၞာန်တံဂှ်တှ်ေ ပရေၚ်ဂီုကၠီုလေဝ်ဟွံမွဲ ဒးဆဵုဂဗမံၚ်ကဵု အခက်အခုဲ ပရေၚ်ရီုဗၚ်ဗစာမၞိဟ်တံ ပဵုဂၠိုၚ်တိုန်မံၚ်ဂှ် နူကဵု KNU ဗဟဵု ကဵုလဝ်သမ္တီရ။
ပရိုၚ်-သြၚ်လောန်တိုၚ်မ်
Photo – Social Media