သိုလ်-အံက်တဝ်ပါ ၃၀
ပရေၚ်ဖံက်ပကဝ်လဝ် သၞောဝ်ပရေၚ်ကေတ်အရေဝ် ကုလသမဂ္ဂတုဲ ပ္ဍဲရုၚ်စက်ရတ်ယှာတံဂှ် သၟာကမၠောန်ကိုဝ်ရဳယာသၟဝ်ကျာတံ ဒးဒုၚ်စကာကမၠောန်အဓ္ဓမကီု အလဵုအသဳကိုဝ်ရဳယာသၟဝ်ကျာ သီကေတ်ထောံစရိတ်ကၠောန်ကမၠောန်တံဂှ် နူကဵုဂကောံ အခေါၚ်အရာမၞိဟ်မွဲ ဟီုပတိတ်ဏာ ပ္ဍဲစၟတ်တ္ၚဲ ၂၉ အံက်တဝ်ပါ ၂၉ ဂှ်ရ။
အတိုၚ်ပရေၚ်ဂၠိုက်ဂၠာဲ နူကဵုဂကောံ Global Rights Compliance (GRC) ဍုၚ်နေဝ်တာလေန်မ္ဂး ရတ်ယှာကဵု ကိုဝ်ရဳယာသၟဝ်ကျာတံ စကာဇာဖိုၚ်ပလံၚ်သၟာကမၠောန်မွဲတုဲ ကောန်ဍုၚ်ကိုဝ်ရဳယာသၟဝ်ကျာတံဂှ် ပလံၚ်ကဵုမံၚ် ဇရေၚ် ရုၚ်စက်ရတ်ယှာတံ သ္ဂးရ။
တၚ်တၟေၚ်မ္ဂး သၟာကမၠောန်တံဏံ လုပ်ကၠုၚ်ဍုၚ်ရတ်ယှာ နကဵုဗဳသာကောန်ကမၠောန်ဟွံသေၚ်၊ ပတောအ်လဝ်ကောန်ကွးဘာတိုန်တက္ကသိုလ်တံတုဲ နကဵုဗဳသာကွးဘာ လုပ်ကၠုၚ်လဝ်ရောၚ်။
ဗွဲကြဴ နူကဵုညးစအကြာသၟာကမၠောန်တံမွဲအဆံၚ် စဳဇန်ကဵု သွက်ဂွံကၠောန်ကမၠောန် ပ္ဍဲကဵုရုၚ်စက်ရတ်ယှာတံတုဲ သွက်သၟာကမၠောန်မွဲမွဲ ၚုဟ်လိၚ်ညးအကြာ ကေတ်သြန်ရတ်ယှာ ရူဗေလ် မွဲကိုတ်ဘာ်၊ ဒဵုကဵုဒဝ်ဠာအမေရိကာန် ၁,၈၆၀ ရောၚ် ပ္ဍဲလိက်ဒုၚ်စဳရေၚ်ဂှ် ချူလဝ်ရ။
သၟာကမၠောန်တံဏံ ပွိုၚ်မွဲမွဲတ္ၚဲ ဒးကၠောန်ကမၠောန် ၁၂ နာဍဳတုဲ ပ္ဍဲမွဲဂိတု ဂွံအခိၚ်ဇူ ပွိုၚ် ၂ တ္ၚဲဟေၚ်နွံ သ္ဂးရ။
တုဲပၠန် ဂြိပ်တိတ်အာနူကမၠောန်မ္ဂး ဇကုဍေံကီု ရဲသ္ၚိကၟိန်သှ်ေမံၚ် ဍုၚ်ကိုဝ်ရဳယာသၟဝ်ကျာတေံကီု ဒးဒုၚ်ကေတ်အရေဝ်ရောၚ် ဘပဠတုဲ ထိၚ်ချုက်လဝ်ရောၚ် စောဲစပ်ရ။
စရိတ်ကမၠောန်သြန်လုပ်ဂွံနၚ်ဗွဲမဂၠိုၚ်တံ ဟွံစိုပ်တဲသၟာကမၠောန် စိုပ်အာတဲ အလဵုအသဳကိုဝ်ရဳယာသၟဝ်ကျာတံတုဲ သြန်တံဏံ စကာသုၚ်စောဲအာ သွက်အစဳဇန်ကၠောန်လွဟ်တံမာန်ရောၚ် ဂကောံအခေါၚ်အရာမၞိဟ်တံ ကဵုလဝ်သတိနွံရ။
စနူသၞာံ ၂၀၁၇ တေံ သၟာကမၠောန်ကိုဝ်ရဳယာသၟဝ်ကျာတံဂှ် ညံၚ်ဟွံဂွံခါန်ကၞက်ကဵုအာကမၠောန် ပ္ဍဲကဵုဍုၚ်မ္ဂးတံ ကုလသမဂ္ဂ တာဒၞာပဒေါအ်လဝ် မဒှ်ရ။
ဆဂး ရတ်ယှာကဵု ကိုဝ်ရဳယာသၟဝ်ကျာတံ ပါဲလဝ်ပရေၚ်ကေတ်အရေဝ်ကၟာတ်ဆိုအ်တံဏံတုဲ ပံၚ်တောဲကၠောန်မံၚ်ရောၚ် စောဲစပ်လဝ်ရ။
စပ်ကဵုတၚ်စောဲစပ်တံဏံတုဲ ဌာနဍုၚ်သအာၚ်ရတ်ယှာကီု ရုၚ်ကလုတ်ကိုဝ်ရဳယာသၟဝ်ကျာမဝ်သကိုဂှ်ကီု မုလေဝ်ဟွံကလေၚ်သှ်ဆာဲလဝ်ကဵု ဌာန်ပရိုၚ်တံပုဟ်။
ပရေၚ်ပံၚ်တောဲပၞာန် အကြာရတ်ယှာကဵု ကိုဝ်ရဳယာသၟဝ်ကျာတံ ဆက်ဆောံကြပ်ကၠုၚ်အခိၚ်လၟုဟ်ဏံ တၚ်စောဲစပ် ဖံက်ပကဝ်အခေါၚ်အရာသၟာကမၠောန်တံ ထပ်မံက်တိုန်ကၠုၚ် မဒှ်ရ။
Ref:Reuters