ဝန်ဇၞော်ဂီုကၠီုမန်တြေံ သ္ကိုပ်ဗိုလ်ဇၞော်ကျဝ်ဇွာမျေအ် ကေတ် ပေန်သေန်ရောၚ်ဂး

မတ်မလီု ၊ နိုဝမ်ပါ ၂

ဝန်ဇၞော်ပရေၚ်ဂီုကၠီုဒေသပယျဵုမန် သ္ကိုပ်ဗိုလ်ဇၞော်ကျဝ်ဇွာမျေအ် ဒးဒေါအ်ဇူလဝ်ဏံဂှ် နုက်တိတ်နူဇြဟတ်အရန်တုဲ သွက်ဂွံကေတ်အာ ပေန်သေန်နွံမံၚ်ရောၚ် ညးကြပ်ကဵု အလဵုအသဳပၞာန်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။

ဝန်ဇၞော်ဂီုကၠီုမန်တြေံ သ္ကိုပ်ဗိုလ်ဇၞော်ကျဝ်ဇွာမျေအ်ဝွံ ဒပ်ပၞာန်သီအဝဵုတုဲ နူကဵုလက်ထက်ကံၚ်သဳပၞာန် သၞာံ ၂၀၂၂ ပ္ဍဲဂိတု အဝ်ဂါတ် ဂှ် ခါန်ကၞက်လဝ် နဒဒှ် ဝန်ဇၞော်ပရေၚ်ဂီုကၠီု ဒေသပယျဵု မန်ရ။

အပ္ဍဲအံက်တဝ်ပါ ၃၁ အလဵုအသဳပၞာန် နုက်ပတိတ်ထောံ နူကဵုတာလျိုၚ်ကဵုဇူထောံ သ္ကိုပ်ဗိုလ်ဇၞော်ကျဝ်ဇွာမျေအ် တုဲ

ပလံၚ်လဝ် ဒၞာဲဒပ်ဇြဟတ်အရန် ပ္ဍဲကဵုဌာန်ဂအုပ်ရးပၞာန် ရးအဂၞဲရ။

သ္ကိုပ်ဗိုလ်ဇၞော်ကျဝ်ဇွာမျေအ် ဒးဒုၚ်ပလံၚ်လဝ်ဇြဟတ်အရန်ဂှ် ထ္ၜးဟိုတ် ပရေၚ်ထတ်ယုက်တုဲ သွက်ဂွံကေတ်အာ ပေန်သေန် နွံမံၚ်ရဂှ် ညးကြပ်ကဵုအလဵုအသဳပၞာန်တံ သ္ဂးရ။

အခိၚ်သ္ကိုပ်ဗိုလ်ဇၞော်ကျဝ်ဇွာမျေအ် ကေတ်လဝ်တာလျိုၚ် ဝန်ဇၞော်ဂီုကၠီုမန် ပွိုၚ်ပန်သၞာံပြၚ်ၚ်ဂှ်တှ်ေ ပံၚ်တောဲပရအ်စလဝ်ကဵု သ္ကိုပ်ဝန်ဇၞော် တွဵုရးမန်တြေံ ဥူအံၚ်ကျဳတိၚ်တုဲ ကဵုလဝ်အခေါၚ် ပံက်ဝိုၚ်ဝေၚ် ညံၚ်ကဵုလုပ်သၞောဝ်တံကီုရ။

တုဲပၠန် ထ္ၜးဟိုတ်ကပေါတ်ဗၞိက်သေံ ဟွံလုပ်သၞောဝ်တုဲ ရပ်ကၠုၚ်လဝ် သၟာဗၞိက်တံကီုလေဝ် ညးကြပ်ကဵုညးတံဂှ်တှ်ေ ကေတ်သြန်ဂၠိုၚ်ၚ်တုဲ ကဵုလဝ်အခေါၚ် ညံၚ်ရဴလုပ်သၞောဝ် မဒှ်ရ။

သ္ကိုပ်ဗိုလ်ဇၞော်ကျဝ်ဇွာမျေအ်ဝွံ ဒၞာဲပၞော်လုပ်တိတ်ဍုၚ်တံဂှ် ထ္ၜးဟိုတ် ပရေၚ်ဂီုကၠီု ပံက်လဝ်ဂိက်သၞေဟ်ကၚ် ကံက်ကေတ်လဝ်သြန်နွံတုဲ လ္တူသြန်ဂွံနၚ်ဂှ်တှ်ေ ပါ်ပရအ်ကေတ်လဝ် သွက်ညးမွဲအရၚ်ကီုရောၚ် ညးကြပ်ကဵုအလဵုအသဳပၞာန်တံ ဟီုရ။

အပ္ဍဲအံက်တဝ်ပါ ၃၁ ကၠောန်လဝ် ကောံဓရီုကာမံက်တိုန် စၠတ်ထဝ်တွဵုရးမန်ဂှ်တှ်ေ စၞးအဇာဒၞာဲတာလျိုၚ် သ္ကိုပ်ဗိုလ်ဇၞော် ကျဝ်ဇွာမျေအ်ဂှ် သ္ပဒတန်ခါန်ကၞက်လဝ် သ္ကိုပ်ဗိုလ်ဇၞော်ယေဝ်ထောဋ် ရ။

ပ္ဍဲကဵုပရေၚ်ကူသာန်ဗၞိက် ဟွံလုပ်သၞောဝ်တံ ယၟုဒယှ်မံၚ် သ္ကိုပ်ဗိုလ်ဇၞော်ကျဝ်ဇွာမျေအ် အခိၚ်ကေတ်လဝ်တာလျိုၚ် ဝန်ဇၞော်ဂီုကၠီုမန် ပွိုၚ်ကာလ ပန်သၞာံပြၚ်ဏံဂှ်တှ်ေ ဂွံအာသြန် နကဵုလၟိဟ်ကိုတ် ဗွဲမဂၠိုၚ်နွံမံၚ် ပရေၚ်ဟီုဂးစတံ နွံမံၚ်ကီုရ။

ပရိုၚ်-သြၚ်လောန်တိုၚ်မ်

Photo – MOI