ပါရဳ ၊ နိုဝင်ဘာ ၁၅
အပ္ဍဲကဵုချူဓဇက်အာမံၚ် မူဂရီု သွက်အပြံၚ်အလှာဲပရေၚ်ဍုၚ်ကွာန်တံဂှ် စုက်လုက်ပံၚ်တောဲအာကဵု ကံၚ်သဳပၠတရဴထမံက်ရုပ်ရဴ ကၟိန်ဍုၚ်ဖိတ်ဒရေဝ်ဒဳမဝ်ကရေသဳ SCEF ညိဂှ် ဗတိုက်ဖအောဝ်ဏာ ဍုၚ် G7 တံ ပ္ဍဲကဵုနိုဝမ်ပါ ၁၄ ဂှ်ရ။
ကောံဓရီုဝန်ဇၞော်ဍုၚ်သအာၚ် G7 ကၠောန်လဝ် ပ္ဍဲကဵုဍုၚ်ပါရဳ ရးနိဂီုပြၚ်သေတ်တုဲဒှ်အာတုဲ ပ္ဍဲနိုဝမ်ပါ ၁၁ လလောၚ်တြးလဝ် ဆေၚ်စပ်ကဵုပရေၚ်ဍုၚ်ဗမာဂှ် ဒုၚ်တၠုၚ်တုဲ သွက်အပြံၚ်အလှာဲပရေၚ်ဍုၚ်ကွာန် ညံၚ်ဂွံပါလုပ်အာသီုဖအိုတ်မာန် ညံၚ်ဂွံဒှ်ဂှ် ဗတိုက်ဖအောဝ်ဏာ နူကဵု SCEF လလောၚ်တြးလဝ်ရ။
ပ္ဍဲကဵုတၚ်နၚ် G7 လလောၚ်တြးဏာ ဆေင်စပ်ကဵုပရေၚ်ဍုၚ်ဗမာဂှ်တှ်ေ အပ္ဍဲဍုၚ်ဗမာ ဒှ်မံၚ်ပရေၚ်ဖံက်ပကဝ်အခေါၚ်အရာမၞိဟ်တံ ကေုာံ ပရေၚ်အခက်အခုဲ ဗစာရဏာမၞိဟ်တံ ကြေပ်ဂြတ်တိုန် အကာဲအရာပရေအ်မံၚ်တံ ဒှ်ဒွိၚ်ဗွဲမလောန်ရဂှ် ချူလဝ်မဒှ်ရ။
ဗွဲတၟေၚ် အပ္ဍဲဍုၚ်ဗမာ ညံၚ်ဂွံယှအ်ဖျေံပရေၚ်ပကီုပရာတ်တံလၟုဟ်၊ ပရေၚ်ရီုဗၚ်အထံက်ပၚ် ဗစာရဏာမၞိဟ်တံ အပိုၚ်အခြာတာဒၞာဲဟွံမွဲ ညံၚ်ဂွံလုပ်စိုပ်မာန် ကေုာံ ကောန်ဍုၚ်ဗမာတံ ဆန္ဒသဘဴလစွံစိုတ် အတိုၚ်အာတ်မိက်လဝ် ပရေၚ်ကမၠောန်ဒဳမဝ်ကရေသဳ ညးသီုဖအိုတ်တံပါလုပ်မာန် ညံၚ်ဂွံဒှ်ကၠုၚ်ဂှ် ဝန်ဇၞော်ဍုၚ်သအာၚ် G7 တံ အာတ်မိက်လဝ်ရ။
ကၠာဟွံစိုပ်အခိၚ်ဏီမ္ဂး ဍုၚ် G7 တံ လ္ပဆက်ဆောံကဵု အလဵုအသဳပၞာန်ဗမာတံကၠာဏီတုဲ အပ္ဍဲကဵုချူဓဇက်မံၚ် မူဂရီု သွက်အပြံၚ်အလှာဲပရေၚ်ဍုၚ်ကွာန်တံ ပံၚ်တောဲကၠောန်အာညိဂှ် SCEF ဗတိုက်ဖအောဝ်လဝ် မဒှ်ရ။
ပ္ဍဲကဵုမူဂရီုဂှ်တှ်ေ သွက်ဂွံစဵုဒၞာအာ ညးဍုၚ်ကွာန်ကောန်အရာပ်တံ ကေုာံ ပရေၚ်ရီုဗၚ်အထံက်ပၚ် ဗစာရဏာမၞိဟ်တံ အပိုၚ်အခြာတာဒၞာဲဟွံမွဲ ညံၚ်ဂွံလုပ်စိုပ်မာန်ဂှ် ချိက်ဆက်လဝ်ကဵု ကမၠောန်ပရေၚ်ဍုၚ်ကွာန် ကၠောန်ပတဝ်အာကဵု ကၟိန်ဍုၚ်ဖိတ်ဒရေဝ်ဒဳမဝ်ကရေသဳတေံဂှ် SCEF သ္ဂးလဝ်ရ။
အတိုၚ်တၚ်နၚ်လလောၚ်တြး စွံလဝ်ကတိဝတ်တံဏံ သွက်ဂွံထမံက်အာရုပ်ရဴမာန်ဂှ် ဍုၚ်ဂကောံ G7 တံ ပံၚ်တောဲကၠောန်အာကဵု SCEF မွဲစွံတုဲ သွက်ဂွံဖျေံအာရိုဟ်ကၞက် ပရေၚ်ၜိုဟ်လလမ် ဍုၚ်ဇမၠိၚ်မာန် ဘိုၚ်ရီုဗၚ်ထ္ၜလဘာ်အိုတ်ညိဂှ် SCEF ကော်ဘိက်လဝ် မဒှ်ရ။
ဂကောံ SCEF ပံၚ်ကောံဒက်ပတန်လဝ်နကဵုဂကောံတံဂှ် သွက်ဂွံဂွံအာ ပရေၚ်အရီုဗၚ်ဂၠးကဝ်တံ ညံၚ်ဂွံထမံက်အာ ယန္တရာ ပ္ညဳပ္ညပ်ကၠောန်ၜိုတ်အာတိုက်ရိုက်မာန်တံရောၚ် ညးနွံအခေါၚ်ဟီုဂး ဇြူပဒုမ္မာ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ညးဂၠးကဝ်တံ ခါရဆဵုဂဗကဵု ပိုဲတံမ္ဂး သွက်ဂွံထ္ၜးစအာ One Policy One Unit တံမာန် ဟိုတ်နူပိုဲတံပလေဝ်ပလေတ် ဖန်ဖက်မံၚ်တုဲ အပ္ဍဲဏံ ပရေၚ်ဗစာရဏာမၞိဟ်တံ သွက်ဂွံဂွံမာန် ပရေၚ်ကဵုလဝ်ဖျုန်တံလေဝ် ပါလုပ်မံၚ်မွဲသာ်ကီုရ။ ဂတဏံမ္ဂး နကဵု SCEF ကၠောန်အာ Coordinate (ပ္ညဳပ္ညပ်ဖန်ဖက်) တိုက်ရိုက် ဆဵုဂဗတက်ကျာတုဲမှ သွက်ဂွံဂွံပရေၚ်အရီုဗၚ် ချိက်ဆက်ဟီုဂးပ္ညဳပ္ညပ်ကၠောန်အာတံလေဝ် နွံကၠုၚ်မာန်ရောၚ်။ ယန္တရာဗီုတံဏံမွဲ ပိုဲတံ သွက်ဂွံထမံက်ရုပ်ရဴ ကၠောန်အာနွံမံၚ်” သာ်ဝွံ သ္ဂးရ။
ဂကောံဇြဟတ်ပၠန်ဂတးတမ်ကညၚ်တံ ဂကောံမဟာမိတ်ကောန်ဍုၚ်အရၚ်တံ ပံၚ်တောဲဒက်ပတန်လဝ် ကံၚ်သဳပၠတရဴဖိတ်ဒရေဝ် SCEF ဂှ်တှ်ေ တိုက်ရိုက်ဒုၚ်လဝ်တဲ ပရေၚ်အရီုဗၚ်ဍုၚ်ဂၠးကဝ်တံတိုက်ရိုက်တုဲ ထမံက်မံၚ်ပရေၚ်ကမၠောန်တံဂှ် ပြဟ်ဟ်ဏံ ဟွံမွဲဏီပုဟ်။
ဆဂး နူကဵုအခိၚ်ပၠန်ဂတးစလဝ်တေံရ ကောန်ဂကောံ SCEF တံ NUG ကီု ယူနေတ်ဖိတ်ဒရေဝ်တံ ဂကောံဇြဟတ်ကောန်ဍုၚ်အရၚ်တံ သွက်ညးဍုၚ်ကွာန် နွံမံၚ်တိဍာ် ကောန်ဍုၚ်အရၚ်တံဂှ် ကၠောန်ကဵုလဝ်ပရေၚ်အရီုဗၚ် ဗစာရဏာမၞိဟ်တံတုဲတုဲဂှ် ဇြူပဒုမ္မာ သောၚ်ကလးလဝ်ရ။
နူကဵုပရေၚ်အရီုဗၚ်ဂၠးကဝ် ကဵုလဝ်တံ စပ်ကဵုအရီုဗၚ်ပရေၚ်ဗစာရဏာမၞိဟ်တံဂှ် ပ္ဍဲဗလးတိ ကၠောန်ကဵုမံၚ်နတဲနွံတုဲ ဗွဲတၟေၚ်ဂွံလဝ်အရီုဗၚ် ကောန်ဂကောံ G7 သမဂ္ဂယူရောပ် EU တံ မဒှ်ရ။
ပ္ဍဲကဵုဂကောံ G7 ဂှ် ဍုၚ်အမေရိကာန်၊ ကနေဒါ၊ ပြၚ်သေတ်၊ ဂျာမဏီ၊ အဳတလဳ၊ ဂျပါန်ကဵု ဍုၚ်အဂႅလိက်တံ ပါလုပ်ရ။
နကဵုပရေၚ်ဍုၚ်ကွာန် သွက်ဂွံစုက်လုက် ဆက်ဆောံအာဍုၚ်ထံက်ဂလာန်တံဂှ် ပ္ဍဲကဵုပရေၚ်ကဵုဇြဟတ် ရီုဗၚ်ထံက်ပၚ် ဗစာရဏာမၞိဟ်တံ၊ ပရေၚ်အပြံၚ်အလှာဲ ဒဳမဝ်ကရေသဳတံ ကေုာံ ပရေၚ်ဍုၚ်ကွာန်တံ သွက်ဂွံကဵုအာဇြဟတ် ပံၚ်တောဲကၠောန်အာကဵုညိဂှ် SCEF အာတ်မိက်လဝ် မဒှ်ရ။
ဒုၚ်လဝ်သ္ဇိုၚ် ၃ တိုၚ်ခဳတုဲ ဒက်ပတန်ပံက်လဝ် SCEF ပ္ဍဲဂိတုမာတ်ချ်သၞာံဏံဂှ်တှ်ေ သၠောတ်တၠအဝဵုပၞာန်ကီု ယြဴသၞောတ်တၠအဝဵုလဵုဟွံဟီု ညံၚ်ဂွံပလေအ်ထောံ နူကဵုရိုဟ်ကၞက်ဍေံမာန် ရန်တၟံ မဟာဗျူဟာ သွက်တၠုၚ်လအာ ပရေၚ်ဍုၚ်ကွာန်တၟိမွဲတုဲ စလလောၚ်တြးကၠုၚ်လဝ် မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media

