မတ်မလီု ၊ နိုဝင်ဘာ ၁၅
စိုပ်လက်ထက်အလဵုအသဳပၞာန်ဏံ ၚုဟ်မးကသိုန်ဗကေတ် ဍၚ်တိုန်ၜက်အာသၞောတ် ညးဗြဴပါၚ်ဖဴတံ ကရဳကရောတ်တိုန်တုဲ စနူကဵုပရေၚ်တောမ်တပ်စတံ ဒှ်တိုန်မံၚ်အခက်အခုဲရဂှ် ညးဗြဴပါ်ဖဴတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
စနူဂိတုအံက်တဝ်ပါ သတ္တဟလက်ကရဴအိုတ်ဂှ် ၚုဟ်ကသိုန်ဗကေတ် မွဲပဿာ ၉၈၀၀ သၠုၚ်တိုန်တုဲ စိုပ်ဂိတုနဝ်ဝမ်ပါ သတ္တဟဒုတိယဂှ် စိုပ်အာ မွဲပဿာနူကဵု ၂၂၀၀၀- ၂၅၀၀၀ ဒကေဝ် ၚုဟ်က္ဍၚ်တိုန်မံၚ် ၜက်အာသၞောတ်ရ။
ခါရတောမ်သွးမ္ဂး ကသိုန်ဗကေတ်တံဂှ် ကပေါတ်သ္ဇိုၚ် ဒးပါမံၚ်တွဵုတုဲ ဟိုတ်နူၚုဟ်က္ဍၚ်အာ ၜက်တိုန်အဆဂှ် ပရေၚ်တောမ်တပ်စတံ ဒှ်အာအခက်အခုဲဗွဲမဂၠိုၚ် မဒှ်ရ။
အကြာအခိၚ်လၟုဟ်ဏံ ၚုဟ်မးကသိုန်ဗကေတ်တံ ဍၚ်တိုန်ၜက်အာမံၚ်ဆက်က်ဂှ် ကသိုန်ဗကေတ်အုဲအုဲဂှ် ဒှ်အာၚုဟ် ၂ ဠက်တုဲ တၟော်အာကဵု ၚုဟ်သၟာကမၠောန်အပြောံတံမ္ဂး စရိတ်မွဲဟဂါပ်လေဝ် ဟွံဒှ်ပုဟ် ညးဗြဴပါၚ်ဖဴမွဲတၠဂှ် ဟီုကဵုဌာန်ပရိုၚ် သြၚ်လောန်တိုၚ်မ်ရ။
“အကြာအခိၚ်တ္ၚဲတံဏံရ မွဲအလန်ဓဝ် တိုန်ၜက်အာ ၂၀၀၀၀ ပြၚ်။ ကသိုန်အုဲအုဲလေဝ် ရာန်စဟွံမာန်၊ ကသိုန်ဍောတ်တ် ဍာတ်တ် အုဲအုဲအေၚ်ၚ်နှဴရဴလဝ်ဂှ်မှ ပြၚ်အာ ၁၀၀၀၀၊ ၁၅၀၀၀၊ ၂၀၀၀၀ ယျ။ အာရာန်ကေတ်ထောံမ္ဂး သွက်အရၚ်မွဲဟဂါပ်လေဝ် ဟွံဂွံပုဟ်” သာ်ဝွံ သ္ဂးရ။
ၚုဟ်မးကသိုန်ဗကေတ် ဍၚ်တိုန်ၜက်အာမံၚ်ကဵုအဆတံဂှ်တှ်ေ ညးဍုၚ်ကွာန်တံ သွက်ဂွံတောမ်စသွမွဲမွဲသာ်ဂှ် ဒှ်အာအခက်အခုဲတုဲ ဗွဲကြဴမ္ဂး သွဒးၜိုဟ်စအာ ဒှ်မာန်ရောၚ်ဂှ် ညးဆက်ဟီုရ။
ၚုဟ်မးကသိုန်ဗကေတ် ဍၚ်တိုန်ၜက်အာသၞောတ်တုဲ ခါရတောမ်သွမ္ဂး ကပေါတ်တၞဟ်ဟ်တံလေဝ်ဟွံရာန်စုတ်၊ လ္ၚဵုတံ စုတ်ကသိုန်ညိညိတုဲ တောမ်စအာနွံကီု ညးဗြဴပါၚ်ဖဴတၞဟ်မွဲတၠပၠန်ဂှ် ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ၚုဟ်ကသိုန်ဍၚ်တိုန်တုဲ ညးလ္ၚဵုတံ ဟွံရာန်စုတ်ရပုဟ်။ နူဂယးဏံ ညးမွဲရာန်ဖျာဂှ် ဟွံရာန်ဏာ စဴအာအတိုၚ်ဏံရ။ မွဲပဿာ ၂၅၀၀၀ ဍုၚ်လောန်အာ ဟွံရာန်ရပုဟ်။ ကသိုန်ဂၠိုၚ်တှ်ေ ဂွံသွးဂၠိုၚ်။ လ္ၚဵုတံဂှ် တောမ်သွဟွံစုတ်ကသိုန်။ လ္ၚဵုမိက်ဂွံစုတ်တှ်ေ စုတ်မဍောတ်တ်မွဲမ မွဲစြေက်ဍောတ်” သာ်ဝွံ သ္ဂးရ။
မွဲလပါ်တေံပၠန် နူကဵုဂကောံ ကသိုန်ဗကေတ် ကသိုန်ဗတာၚ်ကေုာံ ကၠောန်ပတိတ်စၞစပါၚ်ဖဴတံ သွက်ၚုဟ်ကသိုန်ဂွံစှ်ေ ပ္ဍဲနိုဝမ်ပါ ၁၃ ဂှ် ကော်ကောံဓရီု တၠရုၚ်ဖျာ “ပွဲရုံ”တံလေဝ် ၚုဟ်ကသိုန်ဗကေတ်တံ ဟွံကလေၚ်စှ်ေဏီပုဟ်။
အတိုၚ်ရဲရုၚ်ဖျာတံဟီုမ္ဂး လပါ်ဒေသမဂွေတံ တဵုစကသိုန် ကၠောန်ဂၠိုၚ်တုဲ ဟိုတ်နူပဋိပက္ခပၞာန်တံဒှ် ဒးပါဲမံၚ်ဘဲပၞာန်အိုတ်တုဲ ညးတဵုစအောန်အာကီု ရဲတဵုစတံ ပ္ဍဲသၞာံအာတေံ ကျကမၠောန်ဂၠိုၚ်တုဲ တဵုစအောန်အာကီုတုဲ ၚုဟ်ကသိုန်တံ တိုန်အာဗီုလၟုဟ်ဏံ သ္ဂးရ။
အခိၚ်ကၠာတေံ ပ္ဍဲအကြာဒေသ ကသိုန်တိတ်အောန်မ္ဂး ထပၠုပ်ကေတ်နၚ်နူဍုၚ်ကြုက်တေံနွံတုဲ ပြဟ်ဟ်ဏံ ကေတ်ဟပၠုပ်နၚ်နူဍုၚ်ကြုက်တေံ အကာဲအရာဟွံကဵုတုဲ ၚုဟ်ဍၚ်တိုန်အာ ဟွံတန်ကဵုအဆ ဗီုဏံရဂှ် သ္ဂးရ။
ၚုဟ်ကသိုန်တံ တိုန်အာကီုလေဝ် ပရေၚ်ၚုဟ်မးတိုန်စှ်ေတံဂှ် နွံမံၚ်ပ္ဍဲတဲ သၟာဂူယာတဵုကသိုန်တံဟွံသေၚ်၊ နွံမံၚ်ပ္ဍဲတဲ ရဲရုၚ်ဖျာ “ပွဲရုံ”တံဒှ်တုဲ ၚုဟ်ကသိုန် သၠုၚ်ဍၚ်တိုန်အာကီုလေဝ် ပရဲပရၚ်သွက်ဂုဏ်ဖဵု သၟာဂူယာတံဟွံမွဲပုဟ်ဂှ် ညးတဵုကသိုန်တံ ဟီုရ။
ပ္ဍဲကဵုဍုၚ်ဗမာ ၚုဟ်မးစၞစသုၚ်သ္ဇိုၚ် ကသိုန်ဗကေတ် သၠုၚ်တိုန်အာဟွံတန်ကဵုဆတံကီုလေဝ် အလဵုအသဳပြံၚ်သၠာဲကၠုၚ်နူကဵုပၞာန်တံဂှ် မုလေဝ်ဘိုၚ်သောၚ်ကလးကဵုလဝ် ဟွံမွဲပုဟ်။
ပရိုၚ်-သြၚ်လောန်တိုၚ်မ်
Photo – Social Media

