တၞၚ်သဳ၊ နဝ်ဝေမ်ဗာ (၁၀)
ဟိုတ်နူဒပ်ကံၚ်ဇြဳပၞာန်တံ လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲရးတၞၚ်သဳတံ နကဵုဇြဟတ်ဒပ် လၟိဟ်ဗွဲမဂၠိုၚ်ဂၠေၚ်ဂှ်ရ ဇၟာပ်ပ်ပွိုၚ်ဍုၚ်ကြပ်ဒှ် အရိုဟ်ဒဒှ်တ္ၚဲ ပေါဲဗ္တိုက်တံ သာသ္ကာတ်မြဟ်ကၠုၚ်ရဂှ် ညးတာလျိုၚ် ဂကောံဒပ်စဵုဒၞါညးဍုၚ်ကွာန်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်သီအဝဵုဝွံ သွက်ဂွံထိၚ်ဒက်ရးတၞၚ်သဳဂှ် စနူလဒေါဝ်ဂိတုအံက်တဝ်ဗာ တုဲကၠုၚ်တေံတုဲ ပ္ဍဲကဵုပွိုၚ်ဍုၚ် ထဝါဲ၊ ဍာ်ဗု၊ တယိတ်ချံၚ်၊ ပဠဝ်၊ လံၚ်လုၚ်၊ ဗုက်ပျေန် ကေုာံ တၞၚ်သဳတံဂှ် ပလေဝ်ပလေတ်လဝ် ပရေၚ်ပၞာန် သီုဂၠံၚ်တရဴတိုက် သီုဂၠံၚ်တရဴဍာ်ရ။
ဒပ်ကံၚ်ဇြဳပၞာန် မပလေဝ်ပလေတ်လဝ် ပရေၚ်ပၞာန်ဂှ်ဝွံ အခါလၟုဟ်ဂှ် လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲရးတၞၚ်သဳ ဒၞါဲဂကောံဒပ်စဵုဒၞါညးဍုၚ်ကွာန် မၞုံမာန်တံဂှ်ရ။
ဟိုတ်နူလ္ပာ်ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ရ ပေါဲဗ္တိုက်ဆေၚ်မုက်ၜါလ္ပာ်တံ သာသ္ကာတ်မြဟ်ကၠုၚ် အရိုဟ်ဒဒှ်တ္ၚဲဂှ် ညးတာလျိုၚ် PDF (အရှေ့တော) ထဝါဲမွဲတၠ ဟီုရ။
“လ္ပာ်ဒပ်ကံၚ်ဇြဳပၞာန်တံ သွက်ဂွံထ္ပက်ပၞာန် ပ္ဍဲရးတၞၚ်သဳ ဗွဲမဇၞော်ကဵုဇြဟတ်ဂှ် နူကဵုဂိတုတုဲကၠုၚ်တေံရ ကၠောန်ဒၟံၚ်ဂှ် ပိုယ်တံ ဂွံမိၚ်ဒၟံၚ်ရ၊ အတိုၚ်ဗီုဏံရ ပ္ဍဲကဵုထဝါဲကီု၊ တယိတ်ချံၚ်ကီု ထ္ပက်ဒၟံၚ်ကရောၚ်ပၞာန် အလုံမွဲရးတၞၚ်သဳဂှ် နွံရ၊ ပေါဲဗ္တိုက်တံဂှ်တှ်ေ အရိုဟ်ဒဒှ်တ္ၚဲ သ္ကာတ်မြဟ်ဒၟံၚ်ဂှ် နွံရ” သာ်ဝွံ ဟီုရ။
အခိၚ်လၟုဟ်ဂှ် ဒပ်ကံၚ်ဇြဳပၞာန်ဝွံ ပ္ဍဲရးတၞၚ်သဳဂှ် စကာဇြဟတ်ဒပ် ဟွံအောန်နူကဵု (၁၀၀၀) တုဲ ထ္ပက်ကၠုၚ်ကရောၚ်ပၞာန်ဂှ်ကီု၊ ပ္ဍဲဒေသလ္ၚဵုတံမ္ဂး ပွမသၠဲပ္တိုန်ကၠုၚ်ဇြဟတ်ဒပ်တံဂှ် ကၠောန်ကၠုၚ်အဆက်က်ရ။
ဟိုတ်နူဒပ်ကံၚ်ဇြဳပၞာန် လုပ်စိုပ်ထ္ပက်ကၠုၚ်ကရောၚ်ပၞာန်ဂှ်ရ နကဵုညးဍုကွာန်တံ ဟွံဒေါအ်ဟွံဂွံ သွက်ဂွံဒ္ဂေတ်ဗက်ကဵု စေဝ်ပၞောန် မပ္တိတ်လဝ်တံဂှ်တုဲ နွံပၟိက်မ္ဂး သွက်ဂွံအာတ်အရီုဗၚ်အိုတ်ဂှ် ဂကောံဒပ်စဵုဒၞါညးဍုၚ်ကွာန်ဒေသတံ ဖ္တိုက်ဖ္အောဝ်လဝ်ရ။
“အတိုၚ်ပိုယ်တံ မလလောၚ်ပ္တိတ်လဝ်ဂှ်ရ၊ နကဵုညးဍုၚ်ကွာန်ဒေသတံဂှ်တှ်ေ ထ္ပက်ကၠုၚ်ကရောၚ်ပၞာန်မ္ဂး နူကဵုဒၞါဲဒှ်ပၞာန်တံဂှ် သွက်ဂွံမံၚ်ကဵု သ္ၚောဲသ္ၚောဲဂှ်ကီု ဗ္ဒိုပ်ပါဲဒဴဘဲပၞာန်တံဂှ် ပိုယ်တံ ကျောဝ်ကဵုလဝ်ဏောၚ်၊ ကေတ်အဆက်တုဲတှ်ေ အာညိ၊ သီုညးဖအိုတ် ဘိုၚ်ညးသ္ကအ်တုဲ ရီုဗၚ်ကဵုဏောၚ်၊ လ္ပာ်ပိုယ်တံဂှ်လေဝ် ပလေဝ်ပလေတ်လဝ်ရ၊ သွက်ဂွံသ္ပဂရုကဵု အာကၠုၚ်ကီု အရာရာအိုဿီုတံဂှ် ကဵုလဝ်သတိ ကုညးတံရ” သာ်ဝွံ ညးသ္ဂးရ။
အခိၚ်လၟုဟ်ဂှ် ဟိုတ်နူပေါဲဗ္တိုက်တံတုဲ ညးဒေသ နူကဵုရးတၞၚ်သဳ မဂၠိုၚ်ကဵုလ္ၚီတံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံကဵု ပ္ဍဲဒဵုဂြိုပ်မကြပ်တံတုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံရ။
မွဲလ္ပာ်ပၠန်ဂှ် ဒပ်ကံၚ်ဇြဳပၞာန်ဝွံ ကၟာတ်ဒၞါလဝ် အခေါၚ်ယိုက်ဏာနၚ် ဇွောံမစၞစ ကေုာံ ဂဥုဲဇဗ ပ္ဍဲရးတၞၚ်သဳတံတုဲ ပ္ဍဲဒေသလ္ၚဵုတံမ္ဂးလေဝ် နကဵုတၚ်ထ္ၜးဟိုတ် ပရေၚ်ဂီုကၠီုဂှ် ဂၠိုက်ဂၠါဲစၟဳစၟတ်ကၟာတ်ဆိုအ်ဗကၠုၚ်တံ တေၚ်ၚ်ဂြတ်တ်ရ။
ဂကောံဒပ်စဵုဒၞါညးဍုၚ်ကွာန်ဒေသတံဂှ် အပ္ဍဲဂိတုကၠုၚ်စိုပ်တံဏံ ပေါဲဗ္တိုက်တံ သာသ္ကာတ်မြဟ်ကၠုၚ်မာန်ဂှ်ရ နကဵုညးဍုၚ်ကွာန်တံ သွက်ဂွံရေၚ်တၠုၚ် ဒစးဒုၚ်ပလေဝ်ပလေတ်လဝ်ဂှ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)