လာန်ဒါန်၊ နဝ်ဝေမ်ဗာ (၂၄)
ဂဥုဲစဵုဒၞါ သွက်ယဲမြန်ကၞုဲ မဒှ်ယဲကပ်မွဲဂကူ သ္ဇက်ဒးဖေက်ဂှ်ဝွံ ထ္ပက်မွဲအလန်ဓဝ်ဂှ် စဵုဒၞါကဵု စဵုကဵု (၇၈) တၟံကၠံမာန်ရောၚ် သၞာဲဒဴပရေၚ်ထတ်ယုက် ညးဍုၚ်ကွာန်ဗျိတိၚ်တံ ဟီုဂးလဝ်ရ။
အတိုၚ်အေဂျေန်ဇြဳ ဂီုကၠီုပရေၚ်ထတ်ယုက်ဗျိတိၚ် သ္ပလဝ်သုတေသန လက္ကရဴအိုတ်ဂှ်မ္ဂး ထ္ပက်ဂဥုဲစဵုဒၞါကိုပ်ကၠာမွဲမတုဲ ၜါသတ္တာဟကဵု လ္ပာ်လ္တူ လအ်မှဟေၚ် ထ္ၜးကၠုၚ် အနိဿံသဂဥုဲရောၚ်တုဲ စဵုဒၞါကဵု (၇၈) တၟံကၠံမာန်ရောၚ်ဂှ်လေဝ် ထ္မံက်ထ္ၜးလဝ် ပ္ဍဲပရိုၚ်တံရ။
ဣဏံဝွံ ဒုၚ်သ္ဇိုၚ်ကဵု သုတေသန (၃၆၃) မကၠောန်သ္ပလဝ် နူဂိတုဂျူလာၚ် စဵုကဵုဂိတုနဝ်ဝေမ်ဗာတံတုဲမှ လလောၚ်ပ္တိတ်လဝ်ဂှ်လေဝ် ဂွံတီကေတ်ရ။
အရာမလ္ၚတ်ဂၠိုက်ဂၠါဲဂွံဆဵုလဝ်ဏံဂှ်ဝွံ ထ္မံက်ထ္ၜးလဝ် နဒဒှ်သက်သဳ ဗျိတိၚ် စပ်ကဵုယဲမြန်ကၞုဲ မခိုၚ်ကၠိုက်အိုတ်ရ။
ဗ္ဒမ်ပါ်ဓာတ် Bavarian Nordic မၞုံဍုၚ်ဒိန်မက်ဂှ်ဝွံ ဒှ်ဗ္ဒမ်ပါ်ဓာတ်မွဲရုၚ်ဓဝ် မဂွံလဝ်လာၚ်ဇြေန် သွက်ဂွံပ္တိတ်ဂဥုဲစဵုဒၞါယဲမြန်ကၞုဲ မကော်ဂး MVA-BN ရ။
သွက်ဂွံထံက်ပၚ်ကဵု လၟိဟ်ဂဥုဲစဵုဒၞါ ကုဍုၚ်ဥရဝ်ပတံ စဵုကဵုၜါမဳလျာန်ဂှ် တုဲကၠုၚ်သတ္တာဟတေံ ဗျိတိၚ်ထ္ပက်လဝ်စၟတ်တဲဂှ်လေဝ် ဂွံတီကေတ်ရ။
သွက်ဂွံတြး ဂဥုဲစဵုဒၞါ (၅၅၀၀၀) ပြၚ် ပ္ဍဲဍုၚ်အေန်ဂလာန်ဂှ် ဒဒှ်ရစဳဇန်ရေၚ်တၠုၚ်လဝ်ဂှ် ဒါရိုက်တာ သတိဗ်ရာပ်ဇြေဝ် နူကဵုပရေၚ်စၟဳစၟတ် ဂဥုဲစဵုဒၞါကောန်ဂကူ (NHS) ဟီုဂးလဝ်ရ။
“ဂဥုဲစဵုဒၞါဂှ် ၜိုတ်လဵုစိုပ်တရဴဟီုဂှ် လၟုဟ် ပိုယ်တံတီလဝ်တုဲ မွဲအလန်ဓဝ်ဂှ် စဵုဒၞါကဵုစၟယဲဗိုၚ်ရာသ်တံ စဵုကဵု (၇၈) တၟံကၠံမာန်ရောၚ်” သာ်ဝွံ ညးသ္ဂးရ။
ယဲမြန်ကၞုဲဝွံ ပ္ဍဲသၞာံဏံ ဂိတုမေမံက်ဂှ် စပြးထၞာန်ကၠုၚ်လဝ် အလုံဂၠးတိမွဲတုဲ ပ္ဍဲဂိတုဂျူလာၚ်ဂှ် အသိၚ်ပြးထၞာန် က္တဵုဒှ်လဝ် သၠုၚ်အိုတ်ရ။
အေဂျေန်ဇြဳ ဂီုကၠီုပရေၚ်ထတ်ယုက်ဗျိတိၚ်ဂှ် ညးတံ ဂၠိုက်ဂၠါဲလ္ၚတ်ဂွံဆဵုလဝ်ဂှ်ဝွံ ဒုၚ်လဝ်သ္ဇိုၚ်ကဵု လ္တူမပါ်ကရေက်လ္ၚတ်လဝ် ယဲမြန်ကၞုဲ (၃၆၃) မက္တဵုဒှ်လဝ် ပ္ဍဲအေန်ဂလာန် နူဂိတုဂျူလာၚ် စိုပ်အပ္ဍဲဂိတုနဝ်ဝေမ်ဗာဂှ်တုဲ ဇကုဂမ္တဴတံ၊ ကတေၚ်ဂိသ္ကေဝ်တံ၊ စၞာံဒှ်သရ ဗီုကဵုသရတူလဝ်ပၟတ် မဒှ်ယဲမြန်ကၞုဲဂှ် မၞိဟ်မက္တဵုဒှ်လဝ် စဵုကဵု (၃၅၇၅) နွံရောၚ် သ္ဂးလဝ်ရ။
Ref; CNA