မတ်မလီု၊ နဝ်ဝေမ်ဗာ (၂၉)
ပ္ဍဲတွဵုရးဍုၚ်မန် ဒပ်ဗၠာဲသၟိၚ် သၟဝ်တဲကံၚ်ဇြဳပၞာန်တံ ကေုာံ ဌာနမဆေၚ်စပ်တံ ဗက်ရပ်သီဒၟံၚ် ကၠေၚ်စပ္တိတ်နူဍုၚ်သေံ မလုပ်စိုပ်ကၠုၚ် နူကဵုပယျဵုဗြဝတဳတံမွဲကဆံၚ် အပ္ဍဲဒၞါဲတၠဒေၚ်သွံရာန်ကၠေၚ်တံ ကေုာံ အပ္ဍဲဖျာတံရဂှ် တၠဒေၚ်သွံရာန်ကၠေၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ ကၠေၚ်စတဆိပ်ၚုဲၜါ ပ္တိတ်နူဍုၚ်သေံဂှ်ဝွံ နကဵုတၚ်ထ္ၜးဟိုတ် ဟွံကဵုအကံက်မွဲသာ် လုပ်စိုပ်ကၠုၚ် ဟွံလုပ်သၞောဝ်ဂှ် စနူမွဲၜါတ္ၚဲတုဲကၠုၚ်ဏံတုဲဂှ် ဗက်ရပ်သီဒၟံၚ်ရ။
ဟိုတ်နူကံၚ်ဇြဳပၞာန် ဗက်ရပ်သီဒၟံၚ် ကၠေၚ်စပ္တိတ်နူဍုၚ်သေံတံဂှ်ရ စိုပ်ကၠုၚ်ကဆံၚ် ဒဵုကဵုကျသီုတမ်ရတုဲ အခိၚ်လၟုဟ်ဂှ်လေဝ် ပ္ဍဲဒၞါဲဒေၚ် မသွံတြးဒၟံၚ် ကပေါတ်ဗၞိက်သေံ ဗွဲမဂၠိုၚ် ဒးကၟာတ်လဝ်ကမၠောန်အိုတ်ရဂှ် တၠဒေၚ်သွံရာန်ဗၞိက်မွဲတၠ ဟီုရ။
“ပ္ဍဲမတ်မလီု ဗက်ရပ်ဒၟံၚ်ဂှ် ကြပ်အိုတ်ရဏောၚ်၊ ပ္ဍဲကဵုဒၞါဲဒတန်ဒေၚ်တံ ဖျာတံ သီုဖအိုတ် သီလဝ်တုဲအာယျ၊ ဗက်ရပ်ဒၟံၚ် ကၠေၚ်တဆိပ်ၚုဲ (၂) ပါဂှ်၊ ဟွံကဵုအကံက်ခေါန် ဗၞိက်ဟွံလုပ်သၞောဝ်ဂးတုဲ စေဝ်ၜိုတ်နွံဂှ် သီဏာအိုတ်ယျ၊ အခက်အခုဲဂှ် ဗီုလဵုဒှ်ရောဟီုတှ်ေ ၜိုတ်နွံဂှ် အိုတ်အာယျ၊ ဒၞါဲဒတန်ဒေၚ်တံ ပါတုဲ မွဲမွဲတၠ ပိုၚ်ပြဳလဝ်တံ ဟွံအောန်ပုဟ်လေဝ်၊ ဒှ်ဒၟံၚ်ဗီုပြၚ် အိုတ်ဒၟံၚ်သီုတမ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ကံၚ်ဇြဳပၞာန်ဂှ် ဟွံကဵုအကံက်မွဲသာ် လုပ်စိုပ်ကၠုၚ်ဂးတုဲ ကၠေၚ်စ မရပ်သီဏာတံဂှ်ဝွံ အဃောမယိုက်ပလံၚ်ဗစိုပ်တံဂှ် ကဵုကၠုၚ်အကံက်ခေါန် ဇၟာပ်ပ်သၞေဟ်ကၚ်ကံၚ်ဇြဳပၞာန်တုဲ ဒးပၠောပ်လဝ်ဂှ်ရ ဗက်ရပ်ကၠုၚ်သာ်ဏံဂှ် ဒးဂိဒၟံၚ်ၜါအလန်ရောၚ် တၠဒေၚ်သွံရာန်ကၠေၚ်တံ သ္ဂးအိုတ်ရ။
ကံၚ်ဇြဳပၞာန် ဗက်ရပ်သီဒၟံၚ် ကၠေၚ်တိတ်နူဍုၚ်သေံတံဂှ်ရ အပ္ဍဲဗွဝ်ဖျာ ပရေၚ်သွံတြးကၠေၚ်စတံ စဵုကဵုဟၟဲ အောန်ကၠုၚ်တုဲ ၚုဟ်ကၠေၚ်စ သၠုၚ်တိုန်ကၠုၚ်ရဂှ် ညးဗြဴတၠသ္ၚိမွဲတၠ ဟီုရ။
“ဟီုဒၟံၚ် ရပ် ၝဟွံကဵုလဝ် အကံက်ခေါန်တံဂှ်ရ၊ ဗီုလဵုဂွံဟီုရော၊ လ္ၚဵုတံဂှ်တှ်ေ ပ္တိုန်ၚုဟ်တုဲ သွံ၊ လ္ၚဵုတံဂှ်လေဝ် မရာန်လဝ်ဏံဂှ်ရ ဍေံတံသွံ၊ ဍေံတံသွံ နကဵုၚုဟ်ရာန်လဝ်ကၠာတေံရ၊ လ္ၚဵုတံဂှ်တှ်ေ မဏံအိုတ်တှ်ေ ဍေံတံ ဟွံသွံရပုဟ်၊ လ္ၚဵုတံဂှ်လေဝ် ထပ်ပ္တိုန်ၚုဟ်တုဲသွံ၊ ဍေံတံ ဟွံကလေၚ်ရာန်မွဲသာ် ကဵုမနွံဒၟံၚ်တံဂှ် ပ္တိုန်ၚုဟ်တုဲသွံကၠုၚ်အိုတ်ရ၊ ရာန်ပ္ဍဲဒေၚ်တံ ဟွံဂွံရပုဟ်ဟီုတှ်ေ ဍေံတံ ပ္တိုန်ရ” သာ်ဝွံ သ္ဂးရ။
ကၠာကံၚ်ဇြဳပၞာန် ဂွိုအ်ဗက်ရပ်သီ ကၠေၚ်စပ္တိတ်နူဍုၚ်သေံဏီဂှ် ၚုဟ်ကၠေၚ်စအပ္ဍဲဗွဝ်ဖျာ မွဲပသာ နူကဵုနွံကၠုၚ် ပွဳပွူ (၆၅၀၀) ဒ္ကေဝ်ဓဝ်ဂှ် ဒပ်ကံၚ်ဇြဳပၞာန် ဗက်ရပ်တုဲ အပ္ဍဲပွိုၚ် (၃) တ္ၚဲ ပ္ဍဲဂိတုနဝ်ဝေမ်ဗာ (၂၈) ဏံဂှ် မွဲပသာ သၠုၚ်တိုန်ကၠုၚ် စဵုကဵုပွဳပွူ (၈၀၀၀) ဒ္ကေဝ်ရ။
ကၠေၚ်စ မသုၚ်စောဲဒၟံၚ် ပ္ဍဲတွဵုရးဍုၚ်မန် အဓိကတံဂှ် ဒးဗ္ကန်သုၚ်စောဲ ပၠောပ်ပ္တိုန်ဒၟံၚ် နူကဵုဍုၚ်သေံ အဓိကတုဲ ကၠေၚ်စနူဍုၚ်အေန်ဒိုဝ်နဳယှာကဵု မလေဝ်ယှာလ္ၚဵုတံလေဝ် လုပ်စိုပ်ဒၟံၚ်နွံတုဲ ကၠေၚ်စမတိတ်ဒၟံၚ် အပ္ဍဲဍုၚ်တံဂှ် သွံတြးဒၟံၚ်ညိည နွံရောၚ် ဂွံတီကေတ်ရ။
ကၠေၚ်စတံဝွံ ကၠာကံၚ်ဇြဳပၞာန် ဂွိုအ်သီအဝဵုဂှ် မွဲပသာနွံကၠုၚ် နူကဵုပွဳပွူ (၂၄၀၀) ဒ္ကေဝ်ဂှ် ကြဴနူဒပ်ပၞာန်သီအဝဵုတုဲ သၠုၚ်တိုန်ကၠုၚ် ဗ္ဒါဲ (၄) ဆတုဲ ၚုဟ်နှေန် ဟွံညိၚ်ဝတ်တံလေဝ် က္တဵုဒှ်ဒၟံၚ် မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)