လ္ဂုၚ်၊ နဝ်ဝေမ်ဗာ (၂၉)
မၞိဟ်မဝေၚ်ဒၟံၚ်ဂိမ် PDF မထံက်ပၚ်ကဵုဒၟံၚ် ဂၠံၚ်သၠုဲလုပ် ပ္ဍဲပရေၚ်ပၠန်ဂတးရပ်လွဟ် ဒစဵုဒစးကဵု သၞောတ်တၠအဝဵုပၞာန်တံဂှ် ကေတ်အာအရေဝ် နကဵုသၞောဝ်ဗ္တိုက်ပလီု ပကီုပရာပ်တံရောၚ် ကံၚ်ဇြဳပၞာန်သီအဝဵု ဘပဠကၠုၚ်ရ။
PDF Games ဂမၠိုၚ် မပ္တံကဵု PDF Hero, PDF Hero-2, End Game- Union Multiplayer War of Heroes ကေုာံ The PDF game တံဝွံ ဟိုတ်နူဒှ်ဂိမ် မကဵုဇြဟတ်ကဵု ပွပကီုပရာပ်တံဂှ်ရ ပရေၚ်ခၞံဗဒှ်ကၠောန်ပ္တိတ်၊ စုတ်လလောၚ်၊ သုၚ်စောဲ နနဲသာ်လဵုဒှ်ဒှ် ဟွံဗၠေတ်ကဵု သၞောဝ်ဗ္တိုက်ပလီု ပကီုပရာပ်တံပုဟ်ဂှ် ကံၚ်ဇြဳပၞာန် သ္ဂးရ။
သၟတ် ဝေၚ်ဂိမ် PDF တုဲ မထံက်ပၚ်ဒၟံၚ် ပ္ဍဲပၠန်ဂတး မွဲတၠဂှ် ပြဝကံၚ်ဇြဳပၞာန် လၟုဟ်ဏံဂှ်ဝွံ ပၠောပ်ဓဝ်ဖေက်လကိုတ် ကုညးမဝေၚ်ဒၟံၚ်ဂိမ် PDF တံတုဲ ဂ္စါန်ကၠုၚ် သွက်ဂွံကၟာတ် ဂၠံၚ်သၠုဲလုပ်တံဂှ်တုဲ ပရေၚ်ဝေၚ်ဂိမ် PDF တံဏံ ဒေါအ်အာဟွံသေၚ်ပုဟ်ဂှ် ဟီုရ။
“လ္ပာ်ဍေံတံ ကၠောန်ဗီုဏံဂှ် ပ္ဍဲကဵုစိုတ်ရဲဝေၚ်ဂိမ်တံ ဝေၚ်ဂိမ်ဏံတှ်ေ ဒးဒုၚ်ကေတ်အရေဝ်ဏောၚ် ပၠောပ်ဏာဓဝ်ဖေက်သာ်ဏံတံရ၊ တုဲတှ်ေ ဂၠံၚ်ဍာန် မဂၠါဲဒၟံၚ်သၠုဲလုပ် သွက်ပရေၚ်ပၠန်ဂတး မွဲနဲမွဲဗီုတံဂှ် ကၟာတ်ထောံရ၊ ဍေံတံ ကၠောန်ထောံ သီုၜါသာ်ရောၚ် ထေၚ်ရ၊ ဆ္ဂး မၞိဟ်ဝေၚ်တံလေဝ် ဒေါအ်အာဟွံသေၚ်ပုဟ်၊ ပ္ဍဲကဵုညးသၟတ်တံဂှ် ရဲဖေက်ဒၟံၚ်ဍေံတံ ၜိုတ်ကဆံၚ်ဏံလေဝ် ဟွံမွဲပုဟ်၊ အဲဂှ်တှ်ေ ဍေံတံ ကၠောန်အာဗီုဏံကီုလေဝ် စပ်ကဵုဝေၚ်ဂိမ်တံ၊ ကဵုဒါန်တံ၊ ဍဵုကလေတ်တံ မဒှ်ဂၠံၚ်သၠုဲလုပ်တၞဟ်ဟ်တံဂှ် ဒေါအ်အာဟွံသေၚ်ပုဟ်” သာ်ဝွံ ညးသ္ဂးရ။
ကြဴနူဒပ်ပၞာန်သီအဝဵုတုဲ ညံၚ်ဂွံဒှ်အထံက်အပၚ် ကုအလဵုအသဳညဳသၟဟ်ဂကူ NUG မပါလုပ် သီုကဵုဂကောံဒပ်စဵုဒၞါညးဍုၚ်ကွာန်ဒေသတံ ကေုာံ ဂကောံဇြဟတ်ပၠန်ဂတးတံဂှ် သုၚ်စောဲပလာတ်ဝှမ် Youtube, Website တံ၊ Applications ဂိမ်တံတုဲ ဂၠါဲကၠုၚ်လဝ် ဂၠံၚ်သၠုဲလုပ်တံရ။
သုၚ်စောဲ PDF Game တုဲ သၟတ်မထံက်ပၚ်ဒၟံၚ် ပ္ဍဲပၠန်ဂတးဏံမွဲတၠဂှ်လေဝ် ကံၚ်ဇြဳပၞာန် ပ္တိတ်သၞောဝ်သာ်လဵုဒှ်ဒှ် အရာမဒးကၠောန်နွံ သွက်ပၠန်ဂတးတံဂှ် ဒးကၠောန်အာလၟေၚ်ၚ်ရဏောၚ် သ္ဂးရ။
“ညအ်ဂှ်တှ်ေ အတိုၚ်ပိုယ်တံ ချပ်လဝ်ရ၊ မုဒှ်ရောဟီုတှ်ေ ဍေံတံ ကၠောန်အာသာ်ဏံရဏောၚ်၊ ညအ်ဂှ် တပ်စုတ် ဥပဒေပကီုပရာပ်၊ ဥပဒေတၞဟ်သ္အာၚ်တံနာနာသာ်တုဲ ဂ္စါန်တွဵုရဏောၚ်၊ ပိုယ်တံဂှ်တှ်ေ သ္ဇက်ဒးကၠောန်နွံ ပ္ဍဲပၠန်ဂတးဏံ လၟေၚ်ကမၠောန်တံ၊ ထံက်ပၚ်ပလံၚ်ဗစိုပ်တံ ဒှ်တမ် မတံဏံဂှ် ဒးကၠောန်အာလၟေၚ်ၚ်ရဏောၚ်၊ စနူကဵုသီထောံအဝဵုတုဲဂှ် သၞောဝ်ဂှ်ပ္တိတ်ကဵုဒှ်၊ ဟွံပ္တိတ်ကဵုဒှ် ပန်ဂစိုတ်ကဵုသေနာတ်တံ ရပ်တံဂှ် နွံဒၟံၚ်တွဵုရ၊ လၟုဟ်မှ သွက်ပိုယ်တံဂှ် တၟေၚ်ၚ်တၟဟ်ဟ် မုမှဟွံမွဲပုဟ်၊ တီမံၚ်ကသပ်ဍေံတံ တုဲတုဲရ၊ အဓိက ပိုယ်တံ ဇကုသ္ဇက်ဒးကၠောန်နွံတံဂှ် ဒးဆက်ကၠောန်ဒၟံၚ်ရဏောၚ်” သာ်ဝွံ သ္ဂးရ။
ပွမဝေၚ် PDF Game ဂကောံသၟဝ်တဲ NUG, CRPH တံ နကဵုတၚ်ရန်တၟံ သကဵုစိုတ်ဓာတ်ပၠန်ဂတးတံ ဂွံဇၞော်ပၟဝ်တိုန်၊ သကဵုလညာတ်သၟတ် လ္တူဒပ်ပၞာန် ဂွံဗၠေတ်အာတံ၊ ထံက်ပၚ် ဂကောံပကီုပရာပ်တံ မွဲနဲမွဲဗီုတံဂှ်ဝွံ ဒးဒုၚ်ကေတ်အရေဝ် အတိုၚ်ဥပဒေမာန်ရောၚ် အပ္ဍဲအကြာတ္ၚဲတံဏံ ကံၚ်ဇြဳပၞာန် ကဵုကၠုၚ်သတိ လ္တူနူသဵုယှေဝ်မဳဒဳယျာ ပလာတ်ဝှမ်တြးဝါဒတံရ။
သ္အာၚ်နူဂှ်ပၠန် အခိၚ်ဒးဒုၚ်စၟဳစၟတ် အတိုၚ်ပရေၚ်ဂီုကၠီုတံဂှ် အပ္ဍဲဖုၚ်တဲတံ ဂွံဆဵုကေတ် ဂိမ် PDF တံနွံတှ်ေ ဒးဒုၚ်ကေတ်အရေဝ်သၟးဟွံက နကဵုတၠကမၠောန် ပါလုပ် ပ္ဍဲ PDF Game တုဲ ကဵုၚုဟ်လိၚ် စုတ်လဝ် လလောၚ်တံဂှ်လေဝ် ဒးဒုၚ်ကေတ်အရေဝ်ကီုရောၚ်ဂှ် သ္ဂးလဝ်ရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ကြဴနူသီအဝဵုတုဲဂှ် မၞိဟ်မဒစဵုဒးဍေံတံ (၁၆၀၀၀) ပြၚ်ဂှ် တပ်စုတ်ၝောံပိုဒ် နာနာသာ်တုဲ ရပ်စုတ်ထံၚ်တံဂှ် ဆက်ကၠောန်သ္ပဒၟံၚ်ရ။
ပရိုၚ်−သြၚ်လောန်တိုၚ်(မ်)