လဂုၚ်၊ နဝ်ဝေမ်ဗာ(၃၀)
ပ္ဍဲဘာလကျာ် မၞုံပ္ဍဲဍုၚ်ဂမၠိုၚ်ဂှ် ဟိုတ်နူဒုၚ်လဝ်တဲကၟုဲ တိက်ဇူဗ္တံတုဲ အမှုဂဗုတ်နာနာ က္တဵုဒှ်ကၠုၚ်ဒၟံၚ်ရဂးတုဲ ဂဂွံကဵုပရေၚ်ဂီုကၠီု ညံၚ်ဟွံဂွံကဵုအာ အခေါၚ်ကၟုဲတိက်ဇူဗ္တံဂှ် ဂကောံသံဃနာယက ရးဒေသဇၞော်လဂုၚ် ပတိတ်ကၠုၚ်အသံပၟိၚ် တာဒၞာကၠုၚ်လဝ်ရ။
ဂကောံသံဃနာယက ရးဒေသဇၞော်လဂုၚ်ဂှ် နကဵုလိက် စၟတ် (၄-၃၈၃/တနက/(သာ-ထွေ)/၂၀၂၂ ကေုာံစၟတ်တ္ၚဲ နဝ်ဝေမ်ဗာ ၂၃ လလောၚ်တြးပတိတ်လဝ် တၚ်တာဒၞာဂှ်ရ။
ပ္ဍဲဘာလကျာ်ဂမၠိုၚ်ဂှ် ဟိုတ်နူဒုၚ်လဝ်တဲ ကၟုဲဇူဒၟံၚ်ဗ္တံတုဲ ဂဗုတ်ပၠံၚ်ၜး၊ ဂဗုတ်ၜုၚ်တက်ဒှ်သၞဒှ်တံ ဂဗုတ်ဂမၠိုၚ် က္တဵုဒှ်ကၠုၚ်လဝ်ရ ဂးတုဲ နူဌာနမဆေၚ်စပ်ဂမၠိုၚ် ဟိုတ်နူတေၚ်စိုပ်ကၠုၚ်ဂှ်ရ ဒးပတိတ်ကၠုၚ်လဝ် လိက်တာဒၞာလလောၚ်တြးသာ်ဏံရဂှ်လေဝ် ဓမံက်ထ္ၜးလဝ် ပ္ဍဲတၚ်လလောၚ်တြး ဂကောံသံဃနာယက ရးဒေသဇၞော်ဂှ်ရ။
ဘာလကျာ်မဆေၚ်စပ်ဂမၠိုၚ်ဂှ် ကျာ်ဇၞော်၊ ဂအုပ်တိုက်၊ အကြာပ်တိုက် ကေုာံအာစာလိက်ဂမၠိုၚ်ဟွံတီတုဲ ညံၚ်ဟွံဂွံဒုၚ်ဒးတဲ ကၟုဲတိက်ဇူဗ္တံကီု စၟဳစၟတ်ဂၠိုက်ဂၠာဲတုဲ ညံၚ်ဂွံဒုၚ်အာတဲကီု၊ ယဝ်ရဒုၚ်လဝ်တဲ ကၟုဲနွံမ္ဂး ညံၚ်ဂွံကဵုလဝ်ပရိုၚ် ကုရုၚ်အုပ်ဓုပ်အရာပ်ကီု တၚ်မပ္တမ်သာ်ဏံ ပါလုပ်ဒၟံၚ် ပ္ဍဲလိက်လလောၚ်တြးဂှ်ရ။
ညးဒေသ ပ္ဍဲရးဒေသဂမၠိုၚ် ဂကောံသံဃနာယက ကၠောန်သ္ပကၠုၚ်သာ်ဏံဂှ် က္တဵုဒှ်ကၠုၚ်ဟိုတ်နူ ကံၚ်ဇြဳပၞာန် ကဵုကၠုၚ်ဇြဟတ်ဓရိုဟ်မာန်ဏောၚ်ဂှ် ဟီုဂးပါ်ပါဲဒၟံၚ်အိုတ်ရ။ ကံၚ်ဇြဳပၞာန်ဂှ် ပ္ဍဲအကြာဏံမွဲၜါတ္ၚဲ သုၚ်စောဲဇြဟတ်တုဲ ဟိုတ်နူကၠောန်ကၠုၚ် ပရေၚ်ဂၠိုက်ဂၠာဲရပ်စပ် ဒၞာဲဂကောံဒပ်ဒၠုက်ဍုၚ်ဇၞော်ဂမၠိုၚ် နွံတန်တဴဂှ်ရ တၚ်တာဒၞာသာ်ဏံဂှ် ကၠောန်ရေၚ်တၠုၚ်ဒၟံၚ် ညံၚ်တိဍာ်ယူဂျဳတအ် ဂွံဍန်စှ်ေရဂှ် ဟီုဂးပါ်ပါဲဒၟံၚ်အိုတ်ရ။
“နူဂယးဏံရ ပ္ဍဲဘာလကျာ် လပါ်ကၟာရတ်လ္ၚဵုဂှ် ဒပ်ပၞာန် ကဵုဗၠာဲသၟိၚ် လုပ်ဂၠိုက်ဂၠာဲစၟဳစၟတ်ဒၟံၚ် ဂွံမိၚ်လဝ်ရ။ စၟဳစၟတ်လဝ်ဂှ်တှ်ေ ညးမံၚ်ပ္ဍဲဘာဂှ်ဟွံပါ ညးကၠုၚ်ဇူဒီု မွဲခဏခေတ္တဂှ် ကဵုကလေၚ်စဴလဝ် ဂွံတီကေတ်ရ။ ဣဏံဂှ် ဂွိၚ်ဖေက် ညးဒစဵုဒစးကဵုဒပ်ပၞာန် ဇူဒီုဂးရ။ အရာဏံဂှ် ယဝ်ရဒးဟီုတှ်ေ ကၠောန်သ္ပဒၟံၚ် ညံၚ်ဒပ်ဒၠုက်ဍုၚ်ဇၞော် ပၠန်ဂတးမံၚ်ကဵု တၠအဝဵုပၞာန် ဇြဟတ်ဂွံဍိုန်စှ်ေအာရ”ဂှ် ညးနွံတန်တဴဒၟံၚ် ပ္ဍဲပွိုၚ်ဍုၚ်ကၟာရတ်မွဲတၠ ဟီုရ။
ကံၚ်ဇြဳပၞာန်ဂှ် စတမ်နူဂိတုနဝ်ဝေမ်ဗာ သတ္တာဟဒုတိယတုဲ စဵုကဵုသတ္တာဟလကြဴအိုတ်ဏံ စၟတ်စရၚ်မၞိဟ်၊ နူကဵုမၞိဟ်ရပ်ဂွံလဝ်ဂှ်မွဲကဆံၚ် ကလေၚ်ဆက်ရပ်အာ မပ္တမ်သာ်ဏံ နဲကဲစုၚ် ရပ်ကၠုၚ်ဒၟံၚ် ညးလုပ်ဂကောံဒပ်ဒၠုက်ဂမၠိုၚ် ၜိုတ် ၄၀ တၠပြၚ်တုဲ ပွမပတိတ်ဟီုလလောၚ်တြးလဝ် တၚ်ဂၞၚ်ပရိုၚ် ချိုတ်တ်ပၠိုတ်တ်ဂှ် ဟၟဲဏီရ။ ပရိုၚ် – သြၚ်လောန်တိုၚ်(မ်)