ကွာလာလာမ်ပူ – နဝ်ဝေမ်ဗာ(၃၀)
ပရေၚ်ရာန်ကပေါတ် ဌာနအလဵုအသဳဂှ် လၟေၚ်ကမၠောန်တေန်ဒါဟွံပါမ္ဂး ကဵုအာ အခေါၚ်ဟွံသေၚ်ရဂှ် သ္ကိုပ်ဝန်ဇၞော် အာန်ဝါအဳဗရာဟေန်ဂှ် ဟီုသ္ဂးလဝ်ရ။
ပ္ဍဲဂလာန်လၟိၚ် ညးဟီုကဵုသၞာဲဒဴညးဍုၚ်ကွာန် အလန်ပထမဂှ် မာဿတာအာန်ဝါ ပ္ဍဲမွဲကာလ ညးက္ဍိုက်က္ဍိုပ်အလဵုအသဳဂှ် ဆက်ကဵုအာအခေါၚ် ပၞော်ပရေၚ်ဘဏ္ဍာဇီဓဇူ ကေုာံပရေၚ်စလာဘ်ဗဇဴတအ် ဟွံသေၚ်ရောၚ်ဂှ် ဟီုသ္ဂးလဝ်ရ။
“ဇၟာပ်ညးယိုက်ဂၠေၚ်ဒၟံၚ် တာလျိုၚ်သၞာဲဒဴအလဵုအသဳဂှ် သွက်ဂွံကၠောန်အာ ကမၠောန်ညံၚ်ဂကောံမွဲဂကောံဂှ် အာတ်မိက်ဏာရ။ စွံအာကတိကဝတ် သွက်ဂွံဟံၚ်ပြာ်ကၟိန်ဍုၚ်ပိုဲစိုအ်”ဂှ် သ္ကိုပ်ဝန်ဇၞော်မလေယှာ ဟီုသ္ဂးလဝ်ရ။
သ္အာၚ်နူဂှ်ပၠန် သ္ကိုပ်ဝန်ဇၞော်ဂှ် စိုတ်ဟွံလုပ်စကဵု ပရေၚ်ဓမံက်ပတိုန် ပရောအလဵုအသဳကၠာတေံ သာသ္ပံဂှ်တုဲ ညံၚ်ကၟိန်ဍုၚ် ဂွံဆက်တန်တဴအာမာန်ဟေၚ် သ္ပအာအရီုဏောၚ်ဂှ် ဟီုသ္ဂးလဝ်ဏီရ။
“သၞိၚ်ရုပ်သၞာဲဒဴကၟိန်ဍုၚ် အေဲဇြမံၚ်ဂှ် ဒးကလေၚ်ထိၚ်ဒဝ်အာဏောၚ်။ အရာဏံဟေၚ် ကၠောန်သ္ပကဵု ပရေၚ်ပြံၚ်သၠာဲမာန်ရ။ ပရေၚ်သာသ္ပံ အခိၚ်ကၠာတေံဂှ် ဒှ်ဆၜိုတ်ဝၚ်မွဲပ္ၚံက်ဟေၚ်တုဲ ဟွံထေက်ကဵုကလေၚ်ဓမံက်ပတိုန်ရ။ သွက်အနာဂတ်ဂတဟေၚ် ပိုဲထေက်ကဵု ဒးပလေဝ်ပလေတ်လဝ်ဏောၚ်” ဂှ် သ္ကိုပ်ဝန်ဇၞော်မလေယှာ အာန်ဝါဂှ် ဟီုသ္ဂးလဝ်ရ။
သ္ကိုပ်ဝန်ဇၞော်မလေယှာတၟိဂှ် ညံၚ်ကၟိန်ဍုၚ် ဂွံကလေၚ်စိုပ် ဇရေၚ်တ္ၚဲသာ်ထဝ်မာန် သွက်ဂွံကၠောန်သ္ပအာ ပရေၚ်ပြံၚ်သၠာဲ အာတ်မိက်ကၠုၚ်လဝ် သၞာဲဒဴညးဍုၚ်ကွာန် ညံၚ်ဂွံပံၚ်တောဲကၠောန်အာ ကရောံအလဵုအသဳမွဲစွံရ။
ကသပ်ညာဏ် သၞာဲဒဴညးဍုၚ်ကွာန် မၞုံကဵုပရေၚ်ဆဵုဂဗ ပ္ဍဲအကြာဗွိုၚ်မဆေၚ်စပ်တအ်ဂှ်လေဝ် ကလၚ်ဂိုၚ်ကေတ်သၠဲသၠဲလးလးတုဲ ကၠောန်သ္ပအာ ညံၚ်ဂွံဒှ်ဒတုဲဖိုလ်ရောၚ်ဂှ် ဟီုသ္ဂးလဝ်ရ။
နပွမစမ်ၜတ် ပရေၚ်လုပ်သၞောဝ် အလဵုအသဳမလေယှာဂှ် ပ္ဍဲကောံဓရီုပါလဳမာန် ဂိတုဒဳဇြေန်ဗာ စၟတ်တ္ၚဲ (၁၉) ကၠုၚ်စိုပ်ဏံ သွက်ဂွံပတိုန်ထ္ၜးဖျေံသ္ဂုတ်သွာတ် တၚ်ပရေၚ်လျုၚ်ပတှ်ေမွဲတၚ် နွံဒၟံၚ်ရောၚ်ဂှ်လေဝ် ဂွံတီကေတ်လဝ်ရ။
Ref;CNA