လာန်ဒါန် – နဝ်ဝေမ်ဗာ(၃၀)
ကြဴနူသၟာထံၚ်ပရိုၚ်ဗဳဗဳဇြဳမွဲတၠ ဒးဒုၚ်ၜုၚ်တက် ပ္ဍဲဍုၚ်ယှာန်ဟိုၚ် ကၟိန်ဍုၚ်ကြုက်တုဲ ကြုက်ဂှ် ဒှ်ပရေၚ်ကော်ချဴ သၞောတ်စှ်ေစှ်ေ သွက်ၚုဟ်မး ကေုာံ ဒတုဲမြမောဝ်ဗျိတုၚ် မွဲတန်ရဂးတုဲ သ္ကိုပ်ဝန်ဇၞော် ယျဳချဳသွောန်နေတ်ဂှ် ဟီုသ္ဂးလဝ်ရ။
ပ္ဍဲဂလာန်ပၟိၚ် မူဝါဒပရေၚ်ဍုၚ်သ္အာၚ် အလန်ပထမ သွောန်နေတ်ဂှ် ပရေၚ်ဆက်ဆောံယူကေကေုာံကြုက် ပရေၚ်ကူသာန်ဗၞိက် ဟီုဂးခေတ်ထဝ်ဂှ် ပတဝ်အာက္ဍိုပ်ကဵု ပရေၚ်ပလေဝ်ပလေတ်ပြံၚ်သၠာဲ ပရေၚ်မၞိဟ် ကေုာံပရေၚ်ဍုၚ်ကွာန် အလဵုအလဵုဏောၚ်ဟီုဂှ် အိုတ်အာ ကရောံကသပ်ဒိုဟ်ဓီုတုဲရဂှ် ဟီုသ္ဂးလဝ်ရ။။
“သွက်ဂွံကၠောန်ရေၚ်တၠုၚ် ပရေၚ်ပိုဲဆုဲလုပ် ဇရေၚ်ကၟိန်ဍုၚ်ကြုက် ညံၚ်ဂွံဇြိုဟ်နက်ဂှ် နွံကၠုၚ်ပၟိၚ်ဏောၚ်” ဂှ် သွောန်နေတ် ဟီုလဝ်တုဲ ကြုက်ဂှ် “သုၚ်စောဲအဝဵုကၟိန်ဍုၚ်တုဲ ပလေဝ်ဒၟံၚ် သွက်ဩဇာဂွံဓလီုအလုမ်ဂၠးကဝ် သီုကဵုတၚ်ရန်တၟံနွံနွံရ” ဂှ် ဟီုသ္ဂးလဝ်ရ။
ညးလုပ်ဗော် ကောန်သာဗေတေတ်လ္ၚဵုဂှ်မ္ဂး တၚ်ဒတူလာၚ်သ္ကိုပ်ဝန်ဇၞော်တြေံ လေတ်ထရေတ်(သ်)ထေတ် လတူဍုၚ်ကြုက်ဂှ် ဍိုန်လျမံၚ်ရ ဟီုသ္ဂးဒၟံၚ်အိုတ်တုဲ ပါ်ပါဲဒၟံၚ်သ္ကိုပ်ဝန်ဇၞော်အိုတ်ရ။
က္ဍိုပ်သ္ကိုပ် ဗော်ကောန်သာဗေတေတ်တြေံ ကေုာံဒွောန်သမေတ် ညးမဒှ်က္ဍိုပ်သ္ကိုပ် ဗော်ကောန်သာဗေတေတ်တြေံ ညးမကေၚ်ယိုက်ဂၠေၚ်လဝ် တာလျိုၚ်ဥက္ကဌပံၚ်တောဲ ဂကောံမဟာမိတ်ပါလဳမာန် ဆေၚ်ကဵုဍုၚ်ကြုက်ဂှ် ကမၠောန်နဇိုၚ်နတဲ သွောန်နေတ် မခိုၚ်ကၠိုက်ဂှ် အရာလဵုဟွံဟီု ဒှ်ကၠုၚ်မာန်တုဲ ဒှ်ကၠုၚ်ဍုၚ်ထဝ် ၜိုဟ်သြိုဟ်မာန်ဏောၚ်ဂှ် ဟီုဂးလဝ်ရ။
သ္ကိုပ်ဝန်ဇၞော်သွောန်နေတ်ဂှ် ၜိုန်ရစဳဇန်လဝ် သွက်ဂွံဆဵုဂဗကဵုသမ္မတကြုက်ယှဳကျေန်ဖျေန် ပ္ဍဲကောံဓရီုကဆံၚ်လတူ G-20 မကၠောန်ဗဒှ် ပ္ဍဲဗာလဳဂှ်ကီုလေဝ် အစဳဇန်လီုလဝ်ရဂှ် ဂွံတီကေတ်ရ။
“သောၚ်ကၠးဒၟံၚ်ရ၊ ပရေၚ်ကူသာန်သွံရာန်ဗၞိက် ဟီုဂးဒၟံၚ် ‘ခေတ်ထဝ်’ ဂှ် အိုတ်အာ ကရောံတၚ်ဒုၚ်ဂိုၚ်ကေတ်လဝ်ဒိုဟ်ဓီု ပတဝ်အာက္ဍိုပ် ဇရေၚ်ပရေၚ်ပြံၚ်သၠာဲ ပရေၚ်မၞိဟ် ကေုာံပရေၚ်ဍုၚ်ကွာန်တုဲအာရ” ဂှ် သွောန်နေတ် နိဿဲကဵု တၚ်ဓမံက်ထ္ၜးပရေၚ်ဆက်ဆောံ ကြုက်-ဗျိတိသျှ သ္ကိုပ်ဝန်ဇၞော်တြေံ ဂျအ်အိုဝ်သဘောနဳ သၞာံ ၂၀၁၅တုဲ ဟီုသ္ဂးလဝ်ရ။
သ္အာၚ်နူဂှ်ပၠန် နကဵုအလဵုအသဳညးဍုၚ်ကွာန် ဆေၚ်ကဵုပရေၚ် ကူသာန်ဗၞိက် ကေုာံပရေၚ်ဂီုကၠီု မဟာမိတ်ဂမၠိုၚ် ပ္ဍဲဒေသ အေန်ဒေါ-ပသိဖုက်ဂှ် ကဵုအာဖျုန်ပရေၚ်ဆက်ဆောံဇြိုဟ်နက် ရေၚ်တၠုၚ်အာတုဲ ပရေၚ်ပိုန်ဒြပ် ကေုာံပရေၚ်ဂီုကၠီု ပ္ဍဲဒေသဂှ် ပါ်ပ္တိတ်တၞဟ်ခြာဟွံဂွံရောၚ်ဂှ် ညးဟီုသ္ဂးလဝ်ရ။
သတ္တာဟတုဲကၠုၚ်ဏံ ပ္ဍဲလာန်ဒါန် ပ္ဍဲစမြာၚ်အလဵုအသဳဂမၠိုၚ် စဵုဒၞာကၠုၚ်လဝ် ပွမဗဂပ်သုၚ်စောဲ ကေမ်မရာပရေၚ်ဂီုကၠီု ကြုက်ကၠောန်ပတိတ်လဝ်တုဲ သွောန်နေတ်ဂှ် သွက်ဂွံကၟာတ်လဒဵုအာ အေန်သတဳကျုတ် ကောန်ဖျူယှေန် မသၠုၚ်ပတိုန်ကဵု ယေန်သၞာၚ် ကေုာံအရေဝ်ဘာသာကြုက်အိုဿီုဂှ် ကဵုကၠုၚ်လဝ်ကတိပါၚ် နူအခိၚ်ကၠာတေံရ။
ဆဂးဂှ် အလဵုအသဳကြုက်ဂှ် ထံက်ပၚ်ကဵုလဝ်သြန် မွဲလစှ်ေမွဲဒကဴတုဲ က္ဍိုက်က္ဍိုပ်ဂကောံကၟိန်ဍုၚ်မဟာမိတ်နာနာ မဒစဵုဒစးကဵု ပရေၚ်ဘပဠ သိုက်ဗာကြုက်တုဲ သွက်ဂွံကလေၚ်ပလန်အာတဲကဵု ပြဝထံၚ်ပရိုၚ်ကြုက် ပ္ဍဲကုမ္ပဏဳ ကေုာံဘာတက္ကသိုလ်ဗျိတုၚ်ဂှ် ကဵုအာအရီုအဗၚ်ရောၚ်ဂှ် သ္ကိုပ်ဝန်ဇၞော် ဟီုသ္ဂးလဝ်ရ။
“ကြုက်ဂှ် သွက်ၚုဟ်မး ကေုာံဒတုဲမြမောဝ်ပိုဲ ဂွံတီလဝ် တၚ်ကော်ချဴသၞောတ်စှ်ေမွဲတၚ်ရ၊ အရာဏံဂှ် ဆုဲအာဒၟံၚ်ဇရေၚ် သၞောတ်တၠအဝဵု သာဇၞော်သၠဲမွဲဒမြိပ်ဂှ် ဒှ်ကၠုၚ်တၚ်ကော်ချဴ သာတုဲသ္ကာတ်မြဟ်ကၠုၚ် မွဲတၚ်ရ”ဂှ် သ္ကိုပ်ဝန်ဇၞော် ဟီုသ္ဂးလဝ်ရ။
Ref: Aljazeera