အောန်ဒေါ၊ ဂျောန် (၈)
ဘာကျာ် ကာတ္တလေတ်မွဲမ နူကဵုသ္ကုတ်နေရတိ ကၟိန်ဍုၚ်နိုၚ်ဂျဳရဳယျာဂှ် သၟာသေနာတ်တံ လုပ်စိုပ်ဗ္တိုက်လဝ်တုဲ သီုကဵု ကောန်ၚာ်သၟတ်တံ မပါလုပ် အောန်အိုတ် မၞိဟ် (၂၁) တၠ ချိုတ်အာလဝ်ရဂှ် ညးတာလျိုၚ် မဆေၚ်စပ်ကဵုဒေသတံ လလောၚ်ပ္တိတ်လဝ်ပရိုၚ်ရ။
ပ္ဍဲသ္ကုတ်သၟဝ်ကျာ ကၟိန်ဍုၚ်နိုၚ်ဂျဳရဳယျာဂှ် သၟာဝါဒဳဂျဳဟာတ်တံ ၜိုန်ရကေၚ်ကၠောန်ၜိုတ်ဒၟံၚ် ပွမဗ္တိုက်တံ ကေုာံ တံၚ်ရပ်မၞိဟ်တုဲအာတ်သြန် နကဵုဂအုံဗွဝ်တံကီုလေဝ် လၟေၚ်ဒဒှ် ဆီပါ်ဍာ်ဇွောဝ် မက္တဵုဒှ်လဝ် အပ္ဍဲဘာကျာ် ကာတ္တလေတ် သုက်ဝှရာတ်သေတ် မၞုံဍုၚ်အဵုဝ်ဝူဂှ်ဝွံ ဗွဲလၟေၚ်ဓမ္မတာမ္ဂး သွက်သ္ကုတ်နေရတိကၟိန်ဍုၚ် မၞုံကဵုပရေၚ်ဂီုကၠီုတံဂှ် ဟိုတ်နူဒှ်ဒၟံၚ် ပွဗ္တိုဟ်လအ်ဂွံဆဵုမွဲတုဲ သွက်ညးဍုၚ်ကွာန်မှာဇန်တံဂှ် သ္ကဵုက္တဵုဒှ်ကၠေံ စမြဗဟေက်စိုတ်တံအိုတ်ရ။
သၟာသေနာတ်ဂမၠိုၚ် ကၠာဟွံဂွံပန် ကုညးမသ္ပဒၟံၚ်ဝတ် အပ္ဍဲဘာကျာ်တံဂှ် ဖံက်ဗ္တိုဟ်လဝ် ဒိုၚ်နမိုက်ရဂှ် ညးမၞုံအခေါၚ်ဟီုဂး ရုၚ်ပရေၚ်အုပ်ဓုပ်တွဵုရးအောန်ဒေါ ဟီုဂးလဝ်ကဵု AFP ရ။
ပွမဗ္တိုဟ်က္တဵုဒှ်တုဲ စဵုကဵု လလအ်ပွိုၚ်မွဲတ္ၚဲ ပ္ဍဲကၞဳဘာကျာ် သုက်ဝှရာတ်သေတ်ဂှ် နဆီဂမၠိုၚ် ဍံက်ဍေန်စောန်ပြံက်ဒၟံၚ်ဏီဖိုဟ်တုဲ ပွမလီုလာ်လေၚ်ဒိုက်တံလေဝ် ပြးဇးဒၟံၚ်အိုတ်ရ။
“ဍေံတံဂှ် ဟွံလုပ်လဝ် အပ္ဍဲဘာကျာ်ဂှ်ပုဟ်၊ ပန်ပှော်လဝ် နူကဵုဗ္တၚ်တရၚ်တံရ” သာ်ဝွံ ဒဒှ်ရ မၞိဟ် (၂၁) တၠ ချိုတ်အာလဝ်ဂှ် သ္ကိုပ်အုပ်ဓုပ် သ္ပဒတန်ဟီုဂးလဝ်ရ။
ညးစၞးဒေသ အေဂျေန်ဇြဳကောပ်ကာဲကာတၟေၚ်ကၟိန်ဍုၚ်ဂှ် ပ္ဍဲကဵုညးမချိုတ်အာ (၂၂) တၠဂှ် ကောန်ၚာ်သၟတ် ဗွဲမဂၠိုၚ်ပါလုပ်တုဲ မၞိဟ် (၄၀) တၠ ဂွံလဝ်ဝပ်ဂှ် ဟီုဂးလဝ်ရ။
“ဟိုတ်နူရမျာၚ် သေနာတ်ကဵု ရမျာၚ်ဗ္တိုဟ်တံဂှ်ရ အဲ ကလေၚ်ဂြိပ်အာ ဘာကျာ်တုဲ ကော်ဏာ ကောန်အဲၜါ ဇရေၚ်သေန်တာ မဆေၚ်စပ်ကဵု ဂဥုဲတံရ၊ ညးမဂွံဒၟံၚ်ဝပ်တံ၊ ညးမချိုတ်ဒၟံၚ်တံဂှ် ဂွံဆဵုကေတ် တၟာဂလိုၚ်ရ” သာ်ဝွံ ပ္ဍဲအခိၚ် ပွမပန်ပှော်စက္တဵုဒှ်ဂှ် ညးဒေသမၞုံဒၟံၚ်ဇမ္ၚောဲ ဘာကျာ် မွဲတၠ ဟီုလဴထ္ၜးလဝ်ကဵု လၟေၚ်ဒဒှ် မဂွံဆဵုဂဗလဝ်ဂှ်ရ။
အပ္ဍဲအရှာံဘာကျာ်ဂှ် ဂွံဆဵုလဝ် သၟာသေနာတ် အောန်အိုတ် (၅) တၠ နွံဂှ် ညးမဆဵုညာတ်လဝ် နမတ်မွဲတၠ ဟီုကဵု AFP ရ။
ဒုတိယသမ္မတ ရေန်မဳအိုဝ်သေန်ဗာဂျာဝွံ သွက်ဂွံသ္ၚဳရံၚ်အာ ကုညးမဂွံလဝ်ဝပ်လ္ၚဵုတံဂှ်တုဲ ပ္ဍဲတ္ၚဲစန်ဂှ် စိုပ်ကၠုၚ်လဝ်တုဲ သွက်ညးမဒးပြဟ်လလုဲအာတံဂှ် လလအ်ပွိုၚ်ထပှ်တ္ၚဲ အလဵုအသဳတွဵုရး လလောၚ်တြးလဝ် နဒဒှ်ကာလလၞီအောန်စိုတ်တုဲ ပ္ဍဲဍုၚ်အောန်ဒေါ သွက်ဂွံပ္တိုန်အလာံကၟိန်ဍုၚ် ကဝက်တိုၚ်ဂှ် ကဵုလဝ်အမိၚ်ရ။
သွက်ပွဗ္တိုက်လၟုဟ်ဏံဂှ် နူကဵုဂကောံလဵု ဒဒှ်ရတာလျိုၚ်နွံကီု ကေုာံ ဟိုတ်နူတၚ်ရန်တၟံသာ်လဵုတုဲ ဗ္တိုက်လဝ်ကီုဟီုဂှ် ထ္မံက်ထ္ၜးဟီုဂးလဝ် သောၚ်ၚ်ကၠးကၠးဂှ် ဟွံမွဲဏီရ။
Ref: Bangkok Post