ပဠဝ်၊ ဂျောန် (၉)
ပ္ဍဲကွာန်ဂျေတ်ဂါ၊ ဂကောံကွာန်နာန်တံၚ်၊ ပွိုၚ်ဍုၚ်ပဠဝ်၊ ရးဒေသဇၞော်တၞၚ်သဳဂှ် စပ္တံနူ ဂိတုဂျောန် (၈) ပယျာံဂယးတုဲ ဒပ်ကံၚ်ဇြဳပၞာန် ဟိုတ်နူထ္ပက်ကၠုၚ်ကရောၚ်ပၞာန် နကဵုဇြဟတ်လၟိဟ်ဗွဲမဂၠိုၚ်တုဲ အလုံမွဲကွာန် ဒးဂြိပ်ဒဴပါဲဒလေတ်ဒၟံၚ်ရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် နကဵုဇြဟတ်ဒပ် ဗၞတ် (၁၀၀) ဂှ်ဝွံ လၟုဟ်ဂှ် လုပ်စိုပ်ဖျေံလဝ်ဒပ် ပ္ဍဲကွာန်ဂျေတ်ဂါ ကေုာံ ကွာန်ကုန်ပဠဝ် ဇြဟတ်ဗျူသဝ်ထဳ မခိုဟ်ဒၟံၚ်ဂှ်တုဲ ပ္ဍဲပွဳပွူဗ္ဒါဲတံဂှ် ပွမပန်ပှော် ကဵုလွဟ်လက်နက်ဇၞော် အဆက်က်တံ ကၠောန်ၜိုတ်ဒၟံၚ်ရ၊
ဒပ်ကံၚ်ဇြဳပၞာန်ဝွံ ဟိုတ်နူထ္ပက်ကၠုၚ်ပၞာန် လွာဲဂှ်တုဲ ပေါဲဗ္တိုက်ၜါလ္ပာ် က္တဵုဒှ်ကၠုၚ်ဂှ် ဂွိၚ်ဂွါဲကၠုၚ်ဂှ်ရ ညးဒေသနူကွာန်ဂျေတ်ဂါ ကေုာံ ကွာန်ဗ္ဒါဲဗ္ဒါဲတံဝွံ ဒးဂြိပ်ဒဴပါဲဒလေတ်ဒၟံၚ် ပ္ဍဲဒဵုဂြိုပ်မကြပ်တံကဵု ဒၞါဲဗၠးဘဲတံရဂှ် ညးဒေသမွဲတၠ ဟီုရ။
မွဲလ္ပာ်ဂှ်ပၠန် ဒပ်ကံၚ်ဇြဳပၞာန်ဝွံ ပ္ဍဲပွဳပွူကွာန်ဂျေတ်ဂါဂှ် နကဵုက္ၜၚ်ကျာ ဗက်ထံက်ကၠုၚ်ကၚ် အဆက်က်တံ ကၠောန်ၜိုတ်ဒၟံၚ်ရ။
ကွာန်ဂျေတ်ဂါ၊ ပွိုၚ်ဍုၚ်ပဠဝ် ဒပ်ကံၚ်ဇြဳပၞာန် မထ္ပက်ကၠုၚ်ပၞာန်ဝွံ ဒှ်ကွာန် နူအပ္ဍဲတိဍာ်ထိၚ်ဒဝ် ဒပ်မဟာ (၄) ဗော်သွးကောန်ဂကူကရေၚ် KNU မွဲတုဲ ပ္ဍဲပွဳပွူ ဗ္ဒါဲကွာန်ဏံဂှ် အကြာဒပ်ကံၚ်ဇြဳပၞာန်ကဵု ဒပ်စဵုဒၞါညးဍုၚ်ကွာန်ဒေသတံ ပေါဲဗ္တိုက်တံ က္တဵုဒှ်ဒၟံၚ် မွဲဏှမွဲဏှရ။
ပ္ဍဲပွိုၚ်ဍုၚ်ပဠဝ်ဂှ် ဗွဲကြဴဒပ်ပၞာန်သီအဝဵုတုဲ အကြာဒပ်ကံၚ်ဇြဳပၞာန်ကဵု ဒပ်စဵုဒၞါညးဍုၚ်ကွာန်တံဂှ် ဟိုတ်နူပေါဲဗ္တိုက်ၜါလ္ပာ်ဂမၠိုၚ်တုဲ ညးဒေသဗ္ဒါဲ (၁၀၀၀) ဒးဂြိပ်ဒဴပါဲဒလေတ်ဒၟံၚ်တုဲ ဒဵုကဵုအခိၚ်လၟုဟ် ကလေၚ်စဴဌာန်ဒၟံၚ် ဟွံမာန်ဏီရ။
ပရိုၚ်−သြၚ်လောန်တိုၚ်(မ်)